ထရမ့်ပ်အစိုးရသစ်မတက်မီ တောင်ကိုရီးယားနှင့်ဂျပန်ခေါင်းဆောင်များ ကို ဘိုင်ဒင်တွေ့

မဟာမိတ်များအပေါ် လွှမ်းမိုးလာနိုင်သူဟူသော စိုးရိမ်ချက်များစွာရှိနေသည့် ထရမ့်ပ်အစိုးရအသစ် မတက်မီတွင် ၎င်းတို့၏ သံတမန်ရေးတိုးတက်မှုကို ခိုင်မြဲစေရန် ကြိုးပမ်းမှုအဖြစ် အမေရိကသမ္မတ ဂျိုးဘိုင်ဒင်နှင့် တောင်ကိုရီးယား၊ ဂျပန်ခေါင်းဆောင်များ သောကြာနေ့တွင် တွေ့ခဲ့ကြသည်။

တရုတ်နိုင်ငံ၏ စီးပွားရေးကို ထိခိုက်စေနိုင်သည့် အခွန်စည်းကြပ်မှုများ တိုးမြှင့်မည်ဟူသော ကတိကဝတ်ကြောင့် ဇန်နဝါရီ ၂၀ ရက်တွင် ဒေါ်နယ်ထရမ့်ပ် သမ္မတ ကျမ်းသစ္စာကျိန်ဆိုပြီးနောက်တွင် ပေကျင်းနှင့် အမေရိကန်၏ ဆက်ဆံရေး၌ ထိပ်တိုက်တွေ့မှုများ ပိုမို ကြီးမားလာမည်ဟု မျှော်လင့်နေရချိန်တွင် ဝါရှင်တန်နှင့် ၎င်း၏ အရင်းနှီးဆုံး အာရှမဟာမိတ်နှစ်နိုင်ငံတို့တွေ့ဆုံခဲ့ကြခြင်းဖြစ်သည်။

ထို့အတူ ယူကရိန်းနှင့် စစ်ပွဲတွင် ရုရှားကို ကူညီရန် မြောက်ကိုရီးယားက တပ်ဖွဲ့ဝင်များ စေလွှတ်ခဲ့မှုအပြင် မြောက်ကိုရီးယား၏ နျူကလီးယားလက်နက် စီမံကိန်းများ၊ တောင်ကိုရီးယားနှင့် ဆယ်စုနှစ်များစွာရှည်ကြာနေသော ပဋိပက္ခကို ငြိမ်းချမ်းဖြေရှင်းနိုင်ရေးအလားအလာများ ဆုတ်ယုတ်လာပြီး အာရှတွင် တင်းမာမှုများမြင့်တက်နေချိန်လည်းဖြစ်သည်။

ရုရှား၏ ရန်လိုသောစစ်ပွဲကို အန္တရာယ်များသည့်အနေအထားရောက်သွားအောင် ချဲ့ထွင်လိုက်သည့် မြောက်ကိုရီးယားနှင့် ရုရှား ခေါင်းဆောင်များ၏ ဆုံးဖြတ်ချက်ကို ဂျပန်၊ တောင်ကိုရီးယားနှင့် အမေရိကတို့က ပြင်းပြင်းထန်ထန်ရှုတ်ချသည်ဟု ပူးတွဲထုတ်ပြန်ချက်တွင် ပြောကြားထားသည်။

ပီရူးနိုင်ငံ လီမာမြို့တွင် ကျင်းပနေသည့် အေပက်ထိပ်သီးအစည်းအဝေး၏ ပြင်ပတွင် ဘိုင်ဒင်၊ တောင်ကိုရီးယားသမ္မတ ယွန်းဆွတ်ယိုးလ်နှင့် အောက်တိုဘာလကမှ စတင်တာဝန်ထမ်းဆောင်သည့် ဂျပန်ဝန်ကြီးချုပ် ရှီဂီယူ အီရှီဘာတို့ တွေ့ဆုံဆွေးနွေးခဲ့ကြသည်။

ဆွေးနွေးမှုအပြီးတွင် အစည်းအဝေးများစွာ လုပ်နေသည့်ပုံစံမျိုးမဟုတ်ဘဲ ဆက်ဆံရေးပုံမှန်ဖြစ်စေရန် ရည်ရွယ်သည့် သုံးနိုင်ငံအတွင်းဝန်ရုံးကို ဖွဲ့စည်းခဲ့သည်ဟု နိုင်ငံတော်လုံးခြုံရေးအကြံပေး ဂျိတ်ဆူလီဗန်က ဘိုင်ဒင်၏ ခရီးစဉ်နှင့်အတူ အဲရ်ဖို့စ်ဝမ်း လေယာည်ပေါ်လိုက်ပါသည့် သတင်းထောက်များကို ပြောကြားခဲ့သည်။

Ref: ယာဟူးနူးစ်