တောင်တရုတ်ပင်လယ်ရှိ ပိုင်နက်အငြင်းပွားမှုတွင် အမေရိကန်က ဝင်ရောက်စွက်ဖက်ခြင်းမပြုရန် သို့မဟုတ် ရန်စလှုံ့ဆော်တိုက်တွန်းခြင်း မပြုသင့်ကြောင်း တရုတ်သမ္မတ ရှီကျင့်ဖိန်က (၃၁)ကြိမ်မြောက် အာရှ-ပစိဖိတ် စီးပွားရေး ပူးပေါင်းဆောင်ရွက်မှု (APEC) ထိပ်သီးအစည်းအဝေးကျင်းပနေစဉ် အမေရိကန်သမ္မတ ဂျိုးဘိုင်ဒင်နှင့် သီးသန့်တွေ့ဆုံရာဝယ် သတိပေးပြောကြားခဲ့သည်။
“သက်ဆိုင်ရာပြည်နယ်များကြား ဆွေးနွေးညှိနှိုင်းခြင်းသည် တောင်တရုတ်ပင်လယ်ရှိ ကွဲလွဲမှုများကို စီမံခန့်ခွဲရန် အကောင်းဆုံးနည်းလမ်းဖြစ်ပြီး၊ နန်ရှားကျွန်းများနှင့်ပတ်သက်၍ နှစ်နိုင်ငံအငြင်းပွားမှုများတွင် အမေရိကန်ပြည်ထောင်စုအနေဖြင့် မပါဝင်သင့်သလို ရန်စမှုများပြုလုပ်ရန် လှုံ့ဆော်မှုကိုလည်း အထောက်အကူမပြုသင့်ပေ။”ဟု တရုတ်ခေါင်းဆောင်က ပြောကြားသည်။
ထိုင်ဝမ်ရှိ ခွဲထွက်ရေးလှုပ်ရှားမှုများသည် ထိုင်ဝမ်ရေလက်ကြား ငြိမ်းချမ်းရေးနှင့် တည်ငြိမ်မှုအတွက် သဟဇာတမဖြစ်ကြောင်းကို ရှီက အလေးပေးပြောကြားခဲ့သည်။
“ထိုင်ဝမ်ရေလက်ကြားမှာ ငြိမ်းချမ်းရေးကို ထိန်းသိမ်းဖို့ အမေရိကန်က ကြိုးစားတယ်ဆိုရင် ထိုင်ဝမ်အရေးကို သတိနဲ့ ချဉ်းကပ်သင့်တယ်။ ထိုင်ဝမ်ရဲ့ လွတ်လပ်ရေးကို ပြတ်ပြတ်သားသား ဆန့်ကျင်ပြီး ငြိမ်းချမ်းစွာ ပြန်လည်ပေါင်းစည်းရေးကို ထောက်ခံပါတယ်” ဟု တရုတ်ခေါင်းဆောင်၏ ပြောကြားချက်ကို ကိုးကား၍ Xinhua သတင်းဌာနက ဖော်ပြခဲ့သည်။ .
ကိုရီးယားကျွန်းဆွယ်တွင် မငြိမ်မသက်ဖြစ်မှုကို ပေကျင်းက ခွင့်ပြုမည်မဟုတ်ကြောင်း တရုတ်ခေါင်းဆောင်က ပြောကြားခဲ့သည်။
“တရုတ်သည် ကိုရီးယားကျွန်းဆွယ်တွင် ပဋိပက္ခနှင့် မငြိမ်မသက်မှုများ ဖြစ်ပွားခြင်းကို ခွင့်ပြုလိမ့်မည်မဟုတ်ဘဲ ၎င်း၏ ဗျူဟာမြောက် လုံခြုံရေးနှင့် အဓိက အမျိုးသားအကျိုးစီးပွားများကို ခြိမ်းခြောက်လာသည့်အခါတွင်လည်း ငြိမ်နေမည်မဟုတ်” ဟု ရှီက ပြောကြားခဲ့သည်။