အမေရိကန်သမ္မတ ဒေါ်နယ်ထရမ့်၏ ပေကျင်းခရီးစဉ်အတွင်း မြင်တွေ့ရသည့် မြင်ကွင်းများဖြစ်သော အမေရိကန်အလံကို ဝှေ့ယမ်းနှုတ်ဆက်နေကြသည့် ကျောင်းသားလူငယ်လေးများ၊ အမေရိကန်ခေါင်းဆောင်နှင့်အတူ လိုက်ပါလာသည့် နည်းပညာကုမ္ပဏီ အမှုဆောင်အရာရှိများအဖွဲ့ စသည်တို့ထက် ပိုမိုအရေးပါသည့် အဓိကသတင်းစကားမှာ တရုတ်သမ္မတ ရှီကျင့်ဖိန်ကိုယ်တိုင် ပြောကြားခဲ့သည့် “အပြုသဘောတည်ဆောက်မှုရရှိစေမည့် မဟာဗျူဟာမြောက် တည်ငြိမ်မှု” ပင် ဖြစ်သည်။
ခေါင်းဆောင်နှစ်ဦးစလုံးက တစ်ဦးကိုတစ်ဦး ပြိုင်ဘက်များအဖြစ် ရှုမြင်ကြသော်လည်း ဆက်ဆံရေးများ ပြိုကွဲသွားသည်ကိုမူ မလိုလားကြောင်း ဖော်ပြခဲ့ကြရသည်။ တရုတ်နိုင်ငံပိုင်မီဒီယာများ၏ အဆိုအရ “တရုတ်နိုင်ငံ၏ တံခါးပေါက်သည် အမေရိကန်စီးပွားရေးလုပ်ငန်းများအတွက် ပိုမိုကျယ်ပြန့်စွာ ပွင့်လင်းလာမည်” ဟူသော ရှီကျင့်ဖိန်၏ အမေရိကန်အမှုဆောင်အရာရှိချုပ်များအပေါ် ကတိကဝတ်ပြုချက်ကို ထရမ့်က ကျေနပ်အားရမည်မှာ သေချာပါသည်။
သို့သော် ၎င်းတို့အကြား သဘောထားကွဲလွဲမှုများ မရှိခြင်းတော့ မဟုတ်ပေ။ အမေရိကန်သမ္မတနှင့် တံခါးပိတ်ဆွေးနွေးမှုများအတွင်း တရုတ်နိုင်ငံက အချုပ်အခြာအာဏာပိုင်ဆိုင်ကြောင်း ကြေညာထားသည့် ကိုယ်ပိုင်အုပ်ချုပ်ခွင့်ရကျွန်းဖြစ်သော ထိုင်ဝမ်ကိစ္စနှင့် ပတ်သက်၍ အင်အားကြီးနိုင်ငံနှစ်ခုအကြား “ထိပ်တိုက်တွေ့ခြင်း သို့မဟုတ် ပဋိပက္ခဖြစ်ပွားခြင်း” အထိ ဖြစ်လာနိုင်ကြောင်း ရှီကျင့်ဖျင်က သတိပေးခဲ့သည်။ တရုတ်နိုင်ငံခြားရေးဝန်ကြီးဌာန၏ အဆိုအရ ထိုင်ဝမ်ကိစ္စသည် “တရုတ်-အမေရိကန် ဆက်ဆံရေးတွင် အရေးအကြီးဆုံးသော ကိစ္စရပ်ဖြစ်သည်” ဟု ရှီကျင့်ဖိန်က ပြောကြားခဲ့သည်။
ဤသို့သော နောက်ခံအခြေအနေများရှိနေသော်လည်း ထရမ့်သည် သောကြာနေ့ မွန်းလွဲပိုင်းတွင် ပေကျင်းမှ ထွက်ခွာစဉ် လေယာဉ်တံခါးဝမှ လှိုက်လှဲစွာ နှုတ်ဆက်ခဲ့ပြီး အောက်မှလူအုပ်ကြီးကလည်း အမေရိကန်အလံများကို ဝှေ့ယမ်းကာ ပြန်လည်နှုတ်ဆက်ခဲ့ကြသည်။ ထရမ့်အနေဖြင့် ယခုခရီးစဉ်ကို အောင်မြင်မှုတစ်ခုအဖြစ် ဂုဏ်ယူမည်မှာ သေချာသော်လည်း တရုတ်နိုင်ငံတွင်မူ ယင်းကို ပိုမိုကြီးမားသော အပြောင်းအလဲတစ်ခု၏ အမှတ်အသားအဖြစ် ရှုမြင်ကြမည်ဖြစ်သည်။
“တရုတ်နိုင်ငံဟာ သူတို့ကိုယ်သူတို့ အမေရိကန်နဲ့ တန်းတူအဆင့်အတန်းရှိတဲ့ နိုင်ငံတစ်နိုင်ငံအဖြစ် ရှင်းရှင်းလင်းလင်း ရပ်တည်နိုင်ခဲ့ပြီဆိုတာကို ပြသလိုက်တာပဲ ဖြစ်ပါတယ်” ဟု Australian National University မှ တရုတ်ခေါင်းဆောင်မှုဆိုင်ရာ ပညာရှင် ဆွန်ဝမ်တီက မှတ်ချက်ပြုခဲ့သည်။
Ref: TIME Magazine Cover Story
