နေပြည်တော်၊ ဇူလိုင် ၃၁
ပြည်သူ့စစ်မှုထမ်းဥပဒေကို ဆက်လက်အကောင်အထည်ဖော်သွားမည်ဖြစ်ပြီး တပ်မတော်ကို တိုက်စွမ်းရည်နှင့် တိုက်စွမ်းအားပြည့်ဝသည့် ခေတ်မီတပ်မတော် (Standard Army) အဖြစ် တည်ဆောက်သွားမည်ဖြစ်ကြောင်း နိုင်ငံတော်သမ္မတ ဦးမင်းအောင်လှိုင်က ပြောကြားသည်။
နိုင်ငံတော်သမ္မတသည် ယနေ့ ဇူလိုင် ၃၁ ရက်တွင် ပြည်ထောင်စုလွှတ်တော်၌ ပြောကြားသည့် အစိုးရရက်ပေါင်း (၁၀၀) ပြည့် နိုင်ငံတော်အခြေပြမိန့်ခွန်းတွင် ယင်းသို့ ထည့်သွင်းပြောကြားခဲ့ခြင်းဖြစ်သည်။
ဖွဲ့စည်းပုံအခြေခံဥပဒေပုဒ်မ ၃၄၀ နှင့်အညီ တပ်မတော်၏ဦးဆောင်မှုဖြင့် ပြည်သူ့စစ်မဟာဗျူဟာကို ဖော်ဆောင်ကာ နိုင်ငံတော်၏ လုံခြုံရေးနှင့် ကာကွယ်ရေးလုပ်ငန်းစဉ်များတွင် ပြည်သူတစ်ရပ်လုံး ပါဝင်လာစေရေး ဆောင်ရွက်သွားမည်ဖြစ်ကြောင်း နိုင်ငံတော်သမ္မတက ပြောကြားသည်။
ထို့ပြင် တပ်မတော်ကို တိုက်စွမ်းရည်နှင့် တိုက်စွမ်းအားရှိသည့် ခေတ်မီတပ်မတော် (Standard Army) အဖြစ် တည်ဆောက်နိုင်ရေးအတွက် လိုအပ်သည့် အရင်းအမြစ်များကို အစိုးရက မူဝါဒများချမှတ်၍ ဖြည့်ဆည်းပေးသွားမည်ဖြစ်သည်။
၂၀၁၀ ပြည့်နှစ်တွင် ပြဋ္ဌာန်းခဲ့ပြီး ၂၀၂၄ ခုနှစ် ဖေဖော်ဝါရီ ၁၀ ရက်တွင် စတင်အာဏာတည်စေခဲ့သည့် ပြည်သူ့စစ်မှုထမ်းဥပဒေကိုလည်း ဆက်လက်ကျင့်သုံးသွားမည်ဖြစ်ကြောင်း ထည့်သွင်းပြောကြားသည်။
ပြည်တွင်းလုံခြုံရေးနှင့် တရားဥပဒေစိုးမိုးရေးလုပ်ငန်းများ ပိုမိုထိရောက်စေရန် မြန်မာနိုင်ငံရဲတပ်ဖွဲ့ကို နယ်မြေထိန်းသိမ်းသည့် ရဲတပ်ဖွဲ့နှင့် ဥပဒေစည်းမျဉ်းစည်းကမ်းထိန်းသိမ်းသည့် ရဲတပ်ဖွဲ့ (Law Force Police) ဟူ၍ လုပ်ငန်းတာဝန်အလိုက် ခွဲခြားလေ့ကျင့်ပေးသွားမည်ဖြစ်သည်။
အလားတူ အဂတိကင်းရှင်းပြီး လေ့ကျင့်သားပြည့်ဝသည့် ရဲတပ်ဖွဲ့ဖြစ်ပေါ်လာစေရေး ဆောင်ရွက်သွားမည်ဖြစ်သကဲ့သို့ ရဲတပ်ဖွဲ့ဝင်များ၏ နေထိုင်ရေးအဆင်ပြေစေရန် ရဲတပ်ဖွဲ့အိမ်ရာများကိုလည်း တည်ဆောက်ပေးလျက်ရှိကြောင်း နိုင်ငံတော်သမ္မတက ပြောကြားခဲ့သည်။
