ပဲခူးတိုင်းဒေသကြီးရှိ ညောင်ခါးရှည်အမြဲတမ်းစစ်ဆေးရေးစခန်းကို ရှောင်ကွင်းသွားလာသည့် လမ်းကြောင်းများတွင် ပိတ်ဆို့ရှာဖွေစစ်ဆေးမှုများကို စဉ်ဆက်မပြတ် ဆောင်ရွက်သွားမည်ဖြစ်ကြောင်း ပဲခူးတိုင်းဒေသကြီးအစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီး က ပြောကြားသည်။
ဇွန် ၂၂ ရက်က ကျင်းပပြုလုပ်သည့် ပဲခူးတိုင်းဒေသကြီး တရားမဝင်ကုန်သွယ်မှုတိုက်ဖျက်ရေး အထူးအဖွဲ့၏ လုပ်ငန်းညှိနှိုင်းအစည်းအဝေးတွင် ၎င်းက အထက်ပါအတိုင်း ပြောကြားခဲ့ခြင်းဖြစ်သည်။
အစည်းအဝေးတွင် ပဲခူးတိုင်းဒေသကြီးအတွင်း ဖမ်းဆီးရမိထားသည့် လိုင်စင်ရှိနှင့် လိုင်စင်မဲ့ မော်တော်ယာဉ်များ၊ ဆိုင်ကယ်များနှင့် စက်ပစ္စည်းများကို လုပ်ထုံးလုပ်နည်းနှင့်အညီ အမြန်ဆုံး အပ်နှံဆောင်ရွက်ရန် မှာကြားခဲ့သည်။
ထို့ပြင် တရားမဝင်ကုန်သွယ်မှုများကို ဥပဒေနှင့်အညီ ထိရောက်စွာ တားဆီးအရေးယူလျက်ရှိရာ ဖမ်းဆီးရမိအမှုတွဲများကိုလည်း ဥပဒေလုပ်ထုံးလုပ်နည်းများနှင့်အညီ အမြန်ဆုံး အရေးယူဆောင်ရွက်ရန် ညွှန်ကြားခဲ့ကြောင်း သိရသည်။
ပဲခူးတိုင်းဒေသကြီးအစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီးက စစ်ဆေးရေးအဖွဲ့များအနေဖြင့် တားဆီးစစ်ဆေးဖမ်းဆီးမှုများ ဆောင်ရွက်ရာတွင် အဂတိတရားကင်းစင်စွာ ဆောင်ရွက်ကြရန်နှင့် ဥပဒေကို တိကျစွာ လိုက်နာကျင့်သုံး၍ တာဝန်ထမ်းဆောင်ကြရန်လည်း မှာကြားခဲ့ကြောင်း သိရသည်။
