ကချင်ပြည်နယ်ရှိ မိုးကောင်းနှင့် ဖားကန့်ဒေသများအပါအဝင် ဒေသအချို့တွင် မိုးအဆက်မပြတ်သည်းထန်စွာ ရွာသွန်းမှုကြောင့် ရေကြီးနစ်မြုပ်မှုများ ဆိုးဆိုးရွားရွား ဖြစ်ပွားလျက်ရှိပြီး ဒေသခံများအတွက် ရိက္ခာ၊ သောက်သုံးရေနှင့် ဆေးဝါးများအပါအဝင် အရေးပေါ်အကူအညီများ လိုအပ်လျက်ရှိကြောင်း သိရသည်။
ဒေသခံများ၏ ပြောကြားချက်အရ မိုးကောင်းမြို့တွင် နန့်ယင်းချောင်းနှင့် နန့်ကောင်းချောင်းရေများ မြင့်တက်လာမှုကြောင့် မြို့ပေါ်ရပ်ကွက်အများစု ရေနစ်မြုပ်လျက်ရှိပြီး သွားလာရေးအခက်အခဲများနှင့် ရင်ဆိုင်နေရကြောင်း သိရသည်။
“မိုးကောင်းဆိုရင် တစ်မြို့လုံးနီးပါး ရေမြုပ်နေပြီ။ ဆက်ပြီးနေလို့မရတဲ့ နေရာတွေလည်းရှိတယ်။ တချို့ရပ်ကွက်တွေက နေလို့ရသေးပေမယ့် ဘယ်မှသွားလာလို့မရတော့ဘူး” ဟု မိုးကောင်းမြို့ခံ အမျိုးသမီးတစ်ဦးက ပြောသည်။
မြို့ဦး၊ ကျွန်းတော၊ နောင်ကိုင်၊ ဘူတာစုနှင့် ဈေးကုန်းစသည့် ရပ်ကွက်အုပ်စုများအပါအဝင် မိုးကောင်းမြို့ပေါ် ရပ်ကွက်အားလုံးနီးပါးတွင် ပြီးခဲ့သည့် သောကြာနေ့ ညနေပိုင်းမှစတင်ကာ ရေကြီးနစ်မြုပ်မှုများ ဖြစ်ပေါ်ခဲ့ခြင်းဖြစ်ပြီး ယနေ့အချိန်အထိ ရေကျဆင်းမှု မရှိသေးကြောင်း ဒေသခံများက ဆိုသည်။
အလားတူ ဖားကန့်၊ ကာမိုင်းနှင့် လုံးခင်းဒေသများတွင်လည်း ဥရုချောင်းရေ လျှံတက်လာမှုကြောင့် ဇွန် ၂၁ ရက် နံနက်ပိုင်းမှစတင်ကာ ရေကြီးနစ်မြုပ်မှုများ ဖြစ်ပွားခဲ့သည်။
နမ့်မှော်နှင့် ဝေခါမှော်အပါအဝင် ကျောက်စိမ်းတူးဖော်ရာ မှော်ဒေသများနှင့် လူနေရပ်ကွက်အချို့တွင် ရေအနက် ၄ ပေကျော်အထိ နစ်မြုပ်နေကြောင်း ဒေသခံများထံမှ သိရသည်။
“ရေက တော်တော်မြင့်နေတယ်။ အိမ်တချို့က အပေါ်ထပ်ကိုပဲ ရွှေ့နေရတယ်။ စားနပ်ရိက္ခာနဲ့ ဆေးဝါးတွေ လိုအပ်နေတယ်” ဟု ဖားကန့်မြို့နယ် ကျောက်ဝိုင်းရပ်ကွက်မှ ဒေသခံတစ်ဦးက ပြောသည်။
ထို့အပြင် မော်လူး၊ အင်းတော်ကြီးနှင့် အနီးဝန်းကျင်ဒေသများတွင်လည်း မိုးသည်းထန်စွာ ဆက်လက်ရွာသွန်းနေမှုကြောင့် ရေကြီးနစ်မြုပ်မှုများ စတင်ဖြစ်ပွားလာနေကြောင်း သိရသည်။
ဒေသခံများနှင့် လူမှုကူညီရေးအဖွဲ့များက ရေဘေးသင့်ပြည်သူများအတွက် အရေးပေါ်ကယ်ဆယ်ရေးလုပ်ငန်းများ၊ ရိက္ခာနှင့် ဆေးဝါးထောက်ပံ့မှုများ အမြန်ဆုံးလိုအပ်နေကြောင်း ပြောကြားထားသည်။
Photo- ကိုသန်းလွင်ဦး