နေပြည်တော်၊ စက်တင်ဘာ ၂၂
မူဆယ်ကုန်သွယ်ရေးလမ်းကြောင်း၏ လက်ရှိ နယ်မြေအခြေအနေများကြောင့် ၂၀၂၆-၂၀၂၇ ဘဏ္ဍာရေးနှစ်အတွင်း စက်သုံးဆီတင်သွင်းရန် အခက်အခဲများ ရှိနေသော်လည်း ယခင်တင်သွင်းခဲ့သည့် အခြေအနေများနှင့် အခြားနယ်စပ်စခန်းများမှ တင်သွင်းနိုင်မှု အခြေအနေများကို စိစစ်၍ ပြန်လည်တင်သွင်းခွင့်ပြုနိုင်ရေး တင်ပြဆောင်ရွက်သွားမည်ဖြစ်ကြောင်း လျှပ်စစ်နှင့်စွမ်းအင်ဝန်ကြီးဌာန ဒုတိယဝန်ကြီး ဦးကျော်နိုင်ဝင်းက ပြောကြားလိုက်သည်။
ယနေ့ ကျင်းပသည့် တတိယအကြိမ် ပြည်သူ့လွှတ်တော် တတိယပုံမှန်အစည်းအဝေး ဒုတိယနေ့တွင် မူဆယ်မဲဆန္ဒနယ် ပြည်သူ့လွှတ်တော်ကိုယ်စားလှယ် ဦးအောင်ဇော်မိုး (ခ) အောင်ဇော်မိုးထွန်း၏ မူဆယ်မြို့တွင် စက်သုံးဆီဈေးနှုန်း သက်သာစွာ ဝယ်ယူနိုင်ရန် တရုတ်နိုင်ငံမှ စက်သုံးဆီတင်သွင်းနိုင်ရေး သွင်းကုန်လိုင်စင်အား မည်သည့်အချိန်တွင် စတင်ချထားပေးမည်နည်းဟူသော မေးမြန်းချက်ကို ဒုတိယဝန်ကြီးက ပြန်လည် ဖြေကြားခဲ့ခြင်း ဖြစ်သည်။
ရှမ်းပြည်နယ် (မြောက်ပိုင်း) ရှိ မူဆယ်၊ ကွတ်ခိုင်၊ တန့်ယန်းနှင့် လားရှိုးခရိုင်အတွင်းရှိ စက်သုံးဆီဆိုင်များသို့ ဖြန့်ဖြူးပေးနိုင်ရန် စက်သုံးဆီတင်သွင်းဖြန့်ဖြူးခြင်းလုပ်ငန်းလိုင်စင်ရရှိထားသော ကုမ္ပဏီ ၄ ခုကို ၂၀၂၃ ခုနှစ် မတ်လမှစ၍ မူဆယ်နယ်စပ်မှတစ်ဆင့် စက်သုံးဆီများ တင်သွင်းစေ၍ မူဆယ်နှင့် နမ့်ခမ်းမြို့နယ်အတွင်းရှိ စက်သုံးဆီအရောင်းဆိုင်များသို့ Pilot Project အနေဖြင့် စမ်းသပ်တင်သွင်းခွင့်ပြုခဲ့ကြောင်း သိရသည်။
အဆိုပါကုမ္ပဏီ ၄ ခုမှ လစဉ် ဓာတ်ဆီတန် ၁,၀၀၀ နှင့် ဒီဇယ်တန် ၁,၀၀၀ ခန့် တင်သွင်းဖြန့်ဖြူးနိုင်ခဲ့ကြောင်း သိရသည်။သို့သော် ၂၀၂၃ ခုနှစ် အောက်တိုဘာလကုန်တွင် နယ်မြေမတည်ငြိမ်မှုများကြောင့် ကုန်သွယ်ရေးဂိတ်များ ပိတ်သွားသဖြင့် မူဆယ်မြို့ပေါ်ရှိ မန်ဝိန်းဂိတ်မှတစ်ဆင့် ပြောင်းလဲတင်သွင်းစေခဲ့သည်။
ထို့နောက် ၂၀၂၄ ခုနှစ် အောက်တိုဘာလကုန်တွင် တရုတ်နိုင်ငံမှ စက်သုံးဆီတင်သွင်းမှုကို ယာယီရပ်ဆိုင်းခဲ့ပြီး ၂၀၂၅ ခုနှစ် မတ်လတွင်မှ ပြန်လည်တင်သွင်းခွင့်ပြုခဲ့ကြောင်း၊ တစ်လလျှင် ဓာတ်ဆီတန် ၄၀၀ နှင့် ဒီဇယ်တန် ၄၀၀ ခန့် တင်သွင်းနိုင်ခဲ့ကာ သွင်းကုန်လိုင်စင်ခွင့်ပြုသည့်ပမာဏများ ကုန်ဆုံးသွားသောကြောင့် ၂၀၂၅ ခုနှစ် ဇူလိုင်လဆန်းအထိသာ တင်သွင်းနိုင်ခဲ့ပြီး ထပ်မံ၍ သွင်းကုန်လိုင်စင်ခွင့်ပြုပေးနိုင်ခဲ့ခြင်း မရှိကြောင်း သိရသည်။