၂၀၂၆ ခုနှစ် စက်မှု၊ စိုက်ပျိုး၊ မွေးမြူရေး တက္ကသိုလ်ဝင်စာမေးပွဲ အောင်မြင်ထားကြသည့် မျိုးဆက်သစ် ကျောင်းသား၊ ကျောင်းသူများအနေဖြင့် မိမိတို့ရရှိထားသည့် အဆင့်သတ်မှတ်ချက် (Grade) များအလိုက် မိမိတို့ ဝါသနာပါရာ သက်ဆိုင်ရာ တက္ကသိုလ်နှင့် ကောလိပ်များကို စတင်လျှောက်ထားနိုင်ပြီဖြစ်ကြောင်း ပညာရေးအသိုင်းအဝိုင်းထံမှ သိရသည်။
ကျောင်းသား၊ ကျောင်းသူများ အဆင်ပြေချောမွေ့စွာ ရွေးချယ်လျှောက်ထားနိုင်ရန်အတွက် ဘာသာရပ်ကဏ္ဍနှင့် ရရှိသည့် အဆင့်အလိုက် တက်ရောက်ခွင့်ရှိမည့် ပညာရေးအဖွဲ့အစည်းများကို အောက်ပါအတိုင်း စနစ်တကျ ခွဲခြားသတ်မှတ်ထားသည် –
၁။ စက်မှုအတတ်ပညာ (Engineering) ကဏ္ဍ
A+ အဆင့်ရရှိသူများ
Naypyitaw State Polytechnic University၊ ရန်ကုန်နည်းပညာတက္ကသိုလ် (YTU) နှင့် မန္တလေးနည်းပညာတက္ကသိုလ် (MTU) ကဲ့သို့သော နိုင်ငံတော်အဆင့် ထိပ်တန်းနည်းပညာတက္ကသိုလ်ကြီးများသို့ လျှောက်ထားခွင့်ရရှိမည်။
A အဆင့်ရရှိသူများ
မိမိတို့ တိုင်းဒေသကြီးနှင့် ပြည်နယ်အသီးသီးရှိ နည်းပညာတက္ကသိုလ် (TU) များသို့ လျှောက်ထားနိုင်သည်။
B အဆင့်ရရှိသူများ
အစိုးရနည်းပညာကောလိပ် (GTC) များနှင့် အစိုးရစက်မှုလက်မှုသိပ္ပံ (GTI) ကျောင်းများသို့ တက်ရောက်ရန် လျှောက်ထားနိုင်မည်ဖြစ်သည်။
၂။ စိုက်ပျိုးရေးအတတ်ပညာ (Agriculture) ကဏ္ဍ
A အဆင့်ရရှိသူများ
ရေဆင်းစိုက်ပျိုးရေးတက္ကသိုလ်နှင့် စိုက်ပျိုးရေးနှင့် မွေးမြူရေးတက္ကသိုလ် (မအူပင်) တို့တွင် ဘွဲ့သင်တန်းများ တက်ရောက်ရန် လျှောက်ထားခွင့်ရရှိမည်။
B အဆင့်ရရှိသူများ
စိုက်ပျိုးရေးနှင့် မွေးမြူရေးသိပ္ပံကျောင်းများ (စိုက်ပျိုးရေးဒီပလိုမာ) နှင့် အစိုးရစက်မှုလက်မှုသိပ္ပံကျောင်းများတွင် ဖွင့်လှစ်သည့် (စက်မှုလယ်ယာနည်းပညာ ဒီပလိုမာ) သင်တန်းများသို့ လျှောက်ထားနိုင်သည်။
၃။ မွေးမြူရေးအတတ်ပညာ (Livestock) ကဏ္ဍ
A အဆင့်ရရှိသူများ
မွေးမြူရေးဆိုင်ရာ ဆေးတက္ကသိုလ် (ရေဆင်း) နှင့် စိုက်ပျိုးရေးနှင့် မွေးမြူရေးတက္ကသိုလ် (မအူပင်) တို့သို့ လျှောက်ထားတက်ရောက်နိုင်သည်။
B အဆင့်ရရှိသူများ
စိုက်ပျိုးရေးနှင့် မွေးမြူရေးသိပ္ပံ (မွေးမြူရေးဒီပလိုမာ) သင်တန်းများနှင့် ငါးလုပ်ငန်းသိပ္ပံကျောင်းများတွင် ဖွင့်လှစ်မည့် (ငါးလုပ်ငန်းသိပ္ပံဒီပလိုမာ) သင်တန်းများသို့ လျှောက်ထားခွင့်ရရှိမည်ဖြစ်ကြောင်း သိရသည်။
၂၀၂၆ ခုနှစ်၏ အောင်ချက်အခြေအနေ
ယခုနှစ်တွင် ကျင်းပပြုလုပ်ခဲ့သည့် စက်မှု၊ စိုက်ပျိုး၊ မွေးမြူရေး တက္ကသိုလ်ဝင်စာမေးပွဲကြီးတွင် တစ်နိုင်ငံလုံးရှိ တိုင်းဒေသကြီးနှင့် ပြည်နယ်အသီးသီးမှ စုစုပေါင်း ဝင်ရောက်ဖြေဆိုသူ ၃,၃၆၄ ဦး ရှိခဲ့သည့်အနက် ၁,၆၇၂ ဦး အောင်မြင်ခဲ့သဖြင့် အောင်ချက်ရာခိုင်နှုန်းအားဖြင့် ၄၉ ဒသမ ၇၀ ရာခိုင်နှုန်းအထိ ရှိခဲ့ကြောင်း တရားဝင်စာရင်းဇယားများအရ သိရှိရသည်။