မေ ၂၆၊ ၂၀၂၆
မြန်မာ့စီးပွားရေး၏ အဓိကကဏ္ဍ ဖြစ်သော လယ်ယာစိုက်ပျိုးရေး ဖွံ့ဖြိုးတိုးတက်စေရန်နှင့် တောင်သူလယ်သမားများ၏ လူနေမှုဘဝ မြှင့်တင်နိုင်ရေးအတွက် နိုင်ငံတော်အစိုးရ၏ မူဝါဒလမ်းညွှန်ချက်များနှင့်အညီ စီမံကိန်းနှင့်ဘဏ္ဍာရေးဝန်ကြီးဌာနအောက်ရှိ မြန်မာ့လယ်ယာဖွံ့ဖြိုးရေးဘဏ် (MADB) က စိုက်ပျိုးစရိတ်ချေးငွေများကို စနစ်သစ်တစ်ရပ်ဖြင့် စတင်ထုတ်ချေးပေးနေပြီဖြစ်ကြောင်း သိရသည်။
ယခု ၂၀၂၆-၂၀၂၇ ဘဏ္ဍာရေးနှစ်အတွင်း ထုတ်ချေးပေးမည့် မိုးစပါးစိုက်ပျိုးစရိတ် ချေးငွေများကို တောင်သူများထံ ပေးအပ်ရာတွင် ယခင်နှစ်များကဲ့သို့ ငွေသားသက်သက်မဟုတ်ဘဲ စနစ်သစ်အနေဖြင့် ငွေသား ၅၀ ရာခိုင်နှုန်းနှင့် အီလက်ထရွန်နစ်ငွေကြေး (E-money) ၅၀ ရာခိုင်နှုန်း ခွဲဝေကာ အချိုးကျ ထုတ်ချေးပေးသွားမည်ဖြစ်ကြောင်း သိရသည်။
အဆိုပါ လုပ်ငန်းစဉ်ကို ကနဦး စမ်းသပ်ကာလ (Pilot Project) အဖြစ် ခရိုင်မြို့နယ် ၁၆ ခုတွင် မြေပြင်ကွင်းဆင်း အကောင်အထည်ဖော် ဆောင်ရွက်လျက်ရှိပြီး ယခုစမ်းသပ်ကာလအတွင်း တောင်သူလယ်သမား ၈၀,၀၀၀ ကျော်အား လယ်တစ်ဧကလျှင် ၃၀၀,၀၀၀ ကျပ်နှုန်းဖြင့် အများဆုံး ချေးငွေကျပ်သိန်း ၃၀ အထိ ခွဲဝေထုတ်ချေးပေးလျက်ရှိကြောင်း သိရသည်။
ဤသို့ အစိုးရက ဒီဂျစ်တယ်စနစ်ဖြင့် ချေးငွေထုတ်ချေးရန် စီမံလာသည့်အပေါ် ကျေးလက်ဒေသ၏ အခြေခံစီးပွားရေးဖြစ်သည့် စိုက်ပျိုးရေး လုပ်ငန်းနှင့် နည်းပညာပိုင်း ချိတ်ဆက်ပေးနိုင်ရန်အတွက် ပြည်တွင်းပုဂ္ဂလိကဘဏ်ကြီးများအနက် ကမ္ဘောဇဘဏ်က ပထမဆုံး ပူးပေါင်းပါဝင်လာကြောင်း သိရသည်။
အဆိုပါ လုပ်ငန်းစဉ်များ အဆင်ပြေချောမွေ့စေရန်အတွက် ကမ္ဘောဇဘဏ်နှင့် KBZPay ဝန်ထမ်းများသည် ကျေးရွာများအထိ ကိုယ်တိုင်ကွင်းဆင်းကာ နည်းပညာနှင့် အသားမကျသေးသည့် တောင်သူဦးကြီးများနှင့် ဒေသခံအေးဂျင့်များအား ဒီဂျစ်တယ်နည်းပညာ အသုံးပြုပုံသင်တန်းများနှင့် အသိပညာပေး ဆွေးနွေးပွဲများ ဆောင်ရွက်ပေးနေကြောင်း သိရသည်။
တောင်သူများအနေဖြင့် လက်ခံရရှိမည့် E-money ၅၀ ရာခိုင်နှုန်းကို လက်တွေ့အသုံးချနိုင်ရန်အတွက် ကမ္ဘောဇဘဏ်၏ ဝန်ဆောင်မှုကွန်ရက်များမှတစ်ဆင့် ငွေသားပြန်ထုတ်ယူနိုင်ရန်နှင့် တိုက်ရိုက်အသုံးပြုကာ မြေသြဇာနှင့် စိုက်ပျိုးရေးသွင်းအားစုများကိုပါ အလွယ်တကူ ဝယ်ယူနိုင်ရန် စီစဉ်ထားရှိကြောင်း သိရသည်။
