ဂျပန်သမိုင်း၌ကာဂါဝါသည်ပထမဆုံးမီးဖွားခွင့်ယူသောမြို့တော်ဝန်ဖြစ်

ဂျပန်နိုင်ငံရှိ မြို့ငယ်လေးတစ်မြို့၏ မြို့တော်ဝန်သည် ဇူလိုင်လ ၂၀ ရက်နေ့တွင် မီးဖွားခွင့်ယူလိုက်ရာ နိုင်ငံတွင် ပထမဆုံး မီးဖွားခွင့်ယူသော တာဝန်ထမ်းဆောင်ဆဲ မြို့တော်ဝင်အဖြစ် မှတ်တမ်းဝင်ခဲ့သည်။ ယင်းဆုံးဖြတ်ချက်သည် ပြည်တွင်း၌ ဝေဖန်မှု အချို့ကြုံခဲ့ရကာ နိုင်ငံတကာ မီဒီယာများ၏ အာရုံစိုက်မှုကို ရရှိခဲ့သည်။

ဂျပန်အနောက်ပိုင်းရှိ လူဦးရေ ၆၉,၀၀၀ ခန့်နေထိုင်သော ယာဝါတာမြို့၏ မြို့တော်ဝန် ကာဝါတာသည် ၂၀၂၃ ခုနှစ် အသက် ၃၃ နှစ်အရွယ်တွင် ဂျပန်နိုင်ငံ၏ အသက်အငယ်ဆုံး မြို့တော်ဝန်ဖြစ်လာချိန်က သူ့အနေဖြင့် ကလေးယူရန် အစီအစဉ်ရှိကြောင်း ပြောကြားခဲ့သည်။

သို့ရာတွင် ယာဝါတာမြို့တော်ဝန်ထမ်းများအတွက် ရက်သတ္တ ၁၆ ပတ် မီးဖွားခွင့်ယူနိုင်သည့် အာမခံချက်ရှိသော်လည်း မြို့တော်ဝန်ကဲ့သို့သော ရာထူးအတွက် လက်ရှိတွင် ထိုကဲ့သို့လုပ်ထုံးလုပ်နည်းမရှိသောကြောင့် သူ့အနေဖြင့် ထိုခွင့်ကို တီထွင် ခဲ့ရကြောင်း ပြောကြားခဲ့သည်။

“ကျွန်မက မီးဖွားခွင့်ယူတဲ့ ပထမဆုံး မြို့တော်ဝန်ဆိုတာ သိလိုက်ရတော့ အရမ်းအံ့သြသွားမိတယ်။ ဒီအချက်အရ ယခုအချိန်အထိ မြို့တော်ဝန်ဖြစ်လာသူတွေထဲမှာ ယေဘုယျအားဖြင့် အမျိုးသမီးငယ်တွေ ဒါမှမဟုတ် အမျိုးသမီးတွေ များများစားစား မရှိဘူးဆိုတာ သဘောပေါက်လိုက်ရတယ်” ဟု ကာဝါတာက ဇူလိုင် ၂၀ ရက်နေ့တွင် ယာဝါတာမြို့တော်ခန်းမ၌ ရိုက်တာသတင်းဌာနကို ပြောကြားခဲ့သည်။

၂၀၂၅ ခုနှစ်တွင် ဆနအဲ တာကာအိချီ သည် ဂျပန်နိုင်ငံ၏ ပထမဆုံးအမျိုးသမီးဝန်ကြီးချုပ်ဖြစ်လာခဲ့သော်လည်း နိုင်ငံ၏ ကျား၊မ ကွာဟချက်သည် အထူးသဖြင့် အမျိုးသားများ လွှမ်းမိုးထားသော နိုင်ငံရေးတွင် ကြီးမားလှသည်။

မကြာသေးမီက ကမ္ဘာ့စီးပွားရေးဖိုရမ်က ထုတ်ပြန်ခဲ့သည့် ကျား၊မ ကွာဟချက်အစီရင်ခံစာတွင် ဂျပန်နိုင်ငံသည် နိုင်ငံပေါင်း ၁၄၈ နိုင်ငံတွင် အဆင့် ၁၁၈ ရှိပြီး နိုင်ငံရေးလုပ်ပိုင်ခွင့်ကဏ္ဍတွင် အဆင့် ၁၂၅ ၌ ရှိနေခဲ့သည်။

အထူးသဖြင့် သက်ကြီးရွယ်အိုဦးရေ တိုးပွားနေပြီး ကမ္ဘာပေါ်တွင် မွေးဖွားနှုန်းအနိမ့်ဆုံး နိုင်ငံကို တိုးတက်အောင်ကြိုးစားမည်ဆိုပါက ပြုပြင်ပြောင်းလဲရေးအတွက် အခွင့်အလမ်းများစွာ ရှိနေသေးကြောင်း ကာဝါတာက ပြောသည်။

ဂျပန်အမျိုးသမီးများသည် မီးဖွားခွင့် ၁၄ ပတ်ခန့်ကို တရားဝင်တောင်းဆိုခွင့်ရှိပြီး ၎င်းတို့ လုပ်ခလစာ၏ သုံးပုံနှစ်ပုံခန့်နှင့် မွေးဖွားခြင်းဆုကြေးငွေကို ရရှိကြသကဲ့သို့ အချို့အစိုးရဝန်ထမ်းများသည်မူ ပိုမိုကောင်းမွန်သော ခံစားခွင့်များကို ရရှိကြသည်။

ဒေသခံအများစုက သူ့ကို ထောက်ခံခဲ့ကြပြီး လုပ်ဖော်ကိုင်ဖက်များက သူ့ကို ခွင့်ယူရန် တိုက်တွန်းခဲ့ကြသော်လည်း သူ၏ ခွင့်ယူခြင်းနှင့်ပတ်သက်၍ မီဒီယာများတွင် ကျယ်ကျယ်ပြန့်ပြန့်ဖော်ပြလာသောအခါ အွန်လိုင်းတွင် ဝေဖန်မှုများထွက်လာ၍ စိတ်ပျက်ခဲ့ရကြောင်း ကာဝါတာက ပြောကြားခဲ့သည်။

သူ မရှိချိန်တွင် နေ့စဉ်လုပ်ငန်းတာဝန်များကို စီမံခန့်ခွဲရန် လက်ထောက်တစ်ဦး ကို စီစဉ်ပေးခဲ့သော်လည်း အရေးကြီးသည့် ဆုံးဖြတ်ချက်များတွင် သူ ဆက်လက်ပါဝင်နေမည်ဖြစ်သည်။

ရိုက်တာသတင်းဌာနက အင်တာဗျူးခဲ့သော ယာဝါတာ ဒေသခံအများစုသည် ကာဝါတာ၏ ဆုံးဖြတ်ချက်ကို ထောက်ခံကြောင်း ပြောကြားခဲ့သည်။ သို့သော် ဒေသခံအိမ်ရှင်မတစ်ဦးဖြစ်သူ ချီယီ ဖူဂျီတာ အပါအဝင် အချို့ကမူ မြို့တော်ဝန်သည် ခွင့်ယူကာလတွင် သူ၏ လစာအပြည့်အဝခံစားရခြင်းကို ကန့်ကွက်ခဲ့ကြသည်။

“ကျွန်မက အမျိုးသမီးတစ်ယောက်ဖြစ်ပြီး ကိုယ်တိုင်လည်း ကလေးမွေးဖူးတဲ့အတွက် အမျိုးသမီးတစ်ယောက်ရဲ့ အခွင့်အရေးနဲ့ ကလေးမွေးတဲ့အခါ အားလပ်ရက်ယူသင့်တယ်လို့ ကျွန်မ ယုံကြည်ပါတယ်။ ဒါပေမဲ့ သူရဲ့ လစာနဲ့ ပတ်သက်လို့တော့ သူ့အားလပ်ရက်မှာ လစာရာနှုန်းပြည့်ရတာကိုတော့ ကျွန်မ လုံး၀ သဘောမတူပါဘူး” ဟု ဖူဂျီတာက ပြောကြားခဲ့သည်။

Ref: သယ်စထရိတ်တိုင်းမ်စ်