နေပြည်တော်၊ဇူလိုင်-၂၁
ဇူလိုင်လ တတိယ ၁၀ ရက်ပတ်အတွင်း ဘင်္ဂလားပင်လယ်အော်တွင် လေဖိအားနည်းရပ်ဝန်းတစ်ကြိမ် ဖြစ်ပေါ်နိုင်ပြီး မြန်မာနိုင်ငံရှိ မြို့အများအပြားတွင် မြစ်ရေများ ဆက်လက်မြင့်တက်လာနိုင်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက ခန့်မှန်းထုတ်ပြန်ထားသည်။
အဆိုပါ ခန့်မှန်းချက်အရ အနောက်တောင်မုတ်သုံလေသည် ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့တွင် အားအသင့်အတင့်မှ အားကောင်းနိုင်ပြီး ဒေသအများစုတွင် တိမ်အသင့်အတင့်မှ တိမ်ထူထပ်နိုင်ကြောင်း သိရသည်။
မိုးရွာသွန်းမှုအခြေအနေအရ ရန်ကုန်၊ ပဲခူး(အရှေ့ပိုင်း)၊ တနင်္သာရီ၊ ကချင်၊ ကရင်နှင့် မွန်ဒေသများတွင် ရွာသွန်းမြဲအောက် လျော့နည်းနိုင်သော်လည်း နေပြည်တော်၊ မန္တလေး၊ မကွေး၊ စစ်ကိုင်း၊ ဧရာဝတီ၊ ကယား၊ ချင်း၊ ရခိုင်နှင့် ရှမ်းပြည်နယ်တို့တွင် ရွာသွန်းမြဲခန့် မိုးထစ်ချုန်းရွာနိုင်ကြောင်း ဖော်ပြထားသည်။
ထို့ပြင် ရန်ကုန်၊ ဧရာဝတီ၊ တနင်္သာရီ၊ ကချင်၊ ကရင်၊ မွန်၊ ရခိုင်နှင့် ရှမ်းပြည် နယ် တောင်ပိုင်းနှင့် အရှေ့ပိုင်းတို့တွင် ၈ ရက်မှ ၁၀ ရက်ခန့် မိုးထစ်ချုန်းရွာနိုင်ပြီး နေပြည်တော်၊ မန္တလေး၊ မကွေး၊ စစ်ကိုင်းအောက်ပိုင်း၊ ကယားနှင့် ရှမ်းပြည်နယ်မြောက်ပိုင်းတို့တွင် ၅ ရက်မှ ၇ ရက်ခန့် မိုးရွာနိုင်ကြောင်း ခန့်မှန်းထားသည်။
မြစ်ရေအခြေအနေအရ ဧရာဝတီမြစ်ရေသည် မြစ်ကြီးနားမှ မြင်းမူအထိ မြို့အချို့တွင် ၃ ပေမှ ၅ ပေခန့် မြင့်တက်လာနိုင်ပြီး ပခုက္ကူမှ ဇလွန်အထိ မြို့များတွင် ၁ ပေခွဲမှ ၃ ပေခန့် မြင့်တက်လာနိုင်ကြောင်း သိရသည်။
အလားတူ ချင်းတွင်းမြစ်ရေသည်လည်း ခန္တီး၊ ဟုမ္မလင်း၊ ဖောင်းပြင်၊ မော်လိုက်၊ ကလေးဝ၊ မင်းကင်း၊ ကနီနှင့် မုံရွာတို့တွင် ၂ ပေမှ ၅ ပေခန့် မြင့်တက်လာနိုင်ကြောင်း ထုတ်ပြန်ထားသည်။
ထို့ပြင် မြစ်သာမြစ်၊ ဒုဋ္ဌဝတီမြစ်၊ စစ်တောင်းမြစ်၊ ရွှေကျင်မြစ်၊ ပဲခူးမြစ်၊ သံ လွင်မြစ်၊ သောင်ရင်းမြစ်၊ ငဝန်မြစ်၊ တိုးမြစ်နှင့် ဘီးလင်းမြစ်တို့၏ ရေမှတ်များလည်း လက်ရှိအခြေအနေထက် ဆက် လက်မြင့်တက်လာနိုင်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက သတိပေးထားသည်။