ဒိန်းမတ်နိုင်ငံ၏ ကိုယ်ပိုင်အုပ်ချုပ်ခွင့်ရနယ်မြေကို အမေရိကပိုင်အဖြစ် ထိန်းချုပ်ရယူလိုကြောင်း ဖခင်ဖြစ်သူက ထုတ်ဖော်ပြောကြားခဲ့အပြီး ရက်သတ္တပတ်အကြာတွင် ဂရင်းလန်းသို့ ဒေါ်နယ်ထရမ့်ပ် ဂျူနီယာရောက်ရှိလာခဲ့သည်။
နေ့ချင်းပြန်ခရီးစဉ် ဖြစ်ကြောင်းနှင့် အစိုးရအရာရှိများနှင့် တွေ့ဆုံရန်အစီအစဉ်မရှိကြောင်း ခရီးစဉ်မတိုင်မီတွင် ထရမ့်ပ်ဂျူနီယာက ပြောဆိုခဲ့သည်။
ဂရင်းလန်းအပေါ် ပိုင်ဆိုင်မှုနှင့် ထိန်းချုပ်မှုသည် အမေရိကအတွက် လုံး၀ မရှိမဖြစ်လိုအပ်သည်ဟု ပြီးခဲ့သည့်လတွင် ပြောဆိုခဲ့သော အငြင်းပွားဖွယ်အကြောင်းအရာကို မကြာခင်ရက်ပိုင်းတွင် ထရမ့်ပ်က ထပ်မံအသက်သွင်းလာခဲ့ခြင်းဖြစ်သည်။ ထရမ့်ပ်က ထိုသို့ပြောခဲ့ချိန်တွင် မိမိတို့အနေဖြင့် ရောင်းချရန်မရှိပါဟု ကျွန်း၏ ဝန်ကြီးချုပ်က တုန့်ပြန်ထားခဲ့သည်။
အဆိုပါကိစ္စနှင့်ပတ်သက်၍ စစ်ရေး သို့မဟုတ် စီးပွားရေးအင်အားသုံးနိုင်ပါသလားဆိုသောအမေးကို မသံုးဘူးဟု မဆိုနိုင်ဟု ထရမ့်ပ်က ဖြေကြားခဲ့သည်။
လူဦးရေ ၅၇၀၀၀ ရှိသော ဂရင်းလန်းသည် ကိုယ်ပိုင်အုပ်ချုပ်ခွင့်ေဒသသော်လည်း ယင်း၏ စီးပွားရေးသည် ကိုပင်ဟေဂင်၏ ထောက်ပံ့မှုအပေါ် များစွာမှီခိုထားရကာ ဒိန်းမတ်ဘုရင့်နိုင်ငံတော်၏ အစိတ်အပိုင်းအဖြစ် ဆက်တည်ရှိနေသည်။
ထရမ့်ပ်သည် သူ၏ ပထမဆုံး အမေရိကန်သမ္မတသက်တမ်းအတွင်းကလည်း အာတိတ်ကျွန်းကို ဝယ်ယူရန် စိတ်ဝင်စားကြောင်း ထုတ်ဖော်ပြောဆိုခဲ့ဖူးပြီး ယင်းအချိန်ကလည်း ယခုကဲ့သို့ပင် ငြင်းဆန်ခဲ့ရသည်။
ထရမ့်ပ်ဂျူနီယာ၏ ခရီးစဉ်နှင့်ပတ်သက်၍ ဒိန်းမတ်ဝန်ကြီးချုပ် Mette Frederiksen ကို ဒိန်းမတ်ရုပ်သံက မေးမြန်းခဲ့ရာ၌ ဂရင်းလန်းကို ဂရင်းလန်းကျွန်းသူ/သားများက ပိုင်ဆိုင်ကြောင်းနှင့် သူတို့၏ အနာဂတ်ကို ဒေသခံလူထုကသာ ဆုံးဖြတ်နိုင်ကြောင်း တုန့်ပြန်ဖြေကြားခဲ့သည်။
“ဂရင်းလန်းသည် ရောင်းရန်မဟုတ်” ဆိုသည်ကို သူ သဘောတူသော်လည်း ရင်းနှီးသည့်နေတိုးမဟာမိတ် အမေရိကနှင့် အလွန်နီးကပ်သော ပူးပေါင်းဆောင်ရွက်မှုလိုအပ်ကြောင်း သူကပြောကြားခဲ့သည်။
Ref: ဘီဘီစီ