ရန်ကုန်၊ စက်တင်ဘာ ၂၂
နိုင်ငံတော်ဩဝါဒါစရိယ၊ ရွှေကျင်နိကာယ မဟာနာယက၊ အဘိဓဇအဂ္ဂမဟာသဒ္ဓမ္မဇောတိက၊ အဂ္ဂမဟာကမ္မဋ္ဌာနာစရိယ ချမ်းမြေ့ဆရာတော်ဘုရားကြီး ဘဒ္ဒန္တဇနကာဘိဝံသ၏ အန္တိမအဂ္ဂိဈာပန သာဓုကီဠနပူဇော်ပွဲကို နိုင်ငံတော်အဆင့် အခမ်းအနားအဖြစ် စက်တင်ဘာ ၂၅ ရက်တွင် ကျင်းပသွားမည့် အစီအစဉ် ထုတ်ပြန်ထားကြောင်း သိရသည်။
အန္တိမအဂ္ဂိဈာပန အစီအစဉ်အရ စက်တင်ဘာ ၂၅ ရက် မွန်းတည့် ၁၂ နာရီခွဲတွင် မရမ်းကုန်းမြို့နယ်ရှိ ချမ်းမြေ့ရိပ်သာကျောင်းတိုက်၌ အန္တိမအဂ္ဂိဈာပန သာဓုကီဠနပူဇော်ပွဲသဘင်ကို စတင်ကျင်းပမည် ဖြစ်သည်။ မွန်းလွဲ ၂ နာရီတွင် ဆရာတော်ဘုရားကြီး၏ ဥတုဇရုပ်ကလာပ်တော်ကို ပင့်ဆောင်မည်ဖြစ်ကြောင်း သိရသည်
ထို့နောက် ဥတုဇရုပ်ကလာပ်တော်ကို သင်္ဃန်းကျွန်းမြို့နယ်၊ သံသုမာလမ်းရှိ သုဝဏ္ဏဘူမိ Event Park သို့ ပင့်ဆောင်ကာ ဆရာတော်၊ သံဃာတော်များနှင့် ဒါယကာ၊ ဒါယိကာမများက နောက်ဆုံးဖူးမြော်ပူဇော်ကန်တော့ကြမည်ဖြစ်ပြီး အန္တိမအဂ္ဂိဈာပနပူဇော်ပွဲကို ဆက်လက်ကျင်းပသွားမည်ဖြစ်သည်။
အခမ်းအနားသို့ နိုင်ငံတော်အဆင့်တာဝန်ရှိသူများ၊ ဆရာတော် သံဃာတော်များ၊ ပြည်တွင်းပြည်ပမှ ဒါယကာ၊ ဒါယိကာမများ တက်ရောက်ပူဇော်နိုင်ရေးနှင့် လာရောက်ကြမည့် ရဟန်းရှင်လူပြည်သူများ သွားလာရေး၊ နေထိုင်ရေး၊ စားသောက်ရေးနှင့် အခြားလိုအပ်ချက်များ အဆင်ပြေစေရေးတို့ကိုလည်း သက်ဆိုင်ရာကဏ္ဍအလိုက် စနစ်တကျ စီစဉ်ဆောင်ရွက်လျက်ရှိကြောင်း သိရသည်။
ယင်းအပြင် အန္တိမအဂ္ဂိဈာပနပူဇော်ပွဲသို့ တက်ရောက်လာကြမည့် ဆရာတော်၊ သံဃာတော်များနှင့် ဧည့်ပရိသတ်များအတွက် လုံခြုံရေး၊ ယာဉ်ရပ်နားရေးနှင့် ယာဉ်ကြောစီမံခန့်ခွဲရေးတို့ကိုလည်း သတ်မှတ်အစီအစဉ်များအတိုင်း ဆောင်ရွက်သွားမည်ဖြစ်သည်။
သက်တော် ၉၉ နှစ်၊ သိက္ခာတော် ၇၉ ဝါ ရှိ ချမ်းမြေ့ဆရာတော်ဘုရားကြီးသည် စက်တင်ဘာ ၁၉ ရက်တွင် ဘဝနတ်ထံ ပျံလွန်တော်မူခဲ့ခြင်းဖြစ်ပြီး ဆရာတော်ဘုရားကြီး၏ အန္တိမအဂ္ဂိဈာပနပူဇော်ပွဲကို စည်ကားသိုက်မြိုက်၍ ဂုဏ်သိက္ခာရှိသည့် နိုင်ငံတော်အဆင့် အခမ်းအနားအဖြစ် ကျင်းပနိုင်ရေး ကော်မတီများဖွဲ့စည်းကာ တာဝန်များခွဲဝေဆောင်ရွက်သွားမည် ဖြစ်ကြောင်း သိရသည်။