Myanmar National League ချန်ပီယံအသင်းဖြစ်သည့် ရှမ်းယူနိုက်တက်အသင်း၏ စုဖွဲ့လေ့ကျင့်မှုများကို ယခုလ ဒီဇင်ဘာ (၉)ရက်တွင် ပြန်လည်စတင်သွားမည်ဖြစ်ကြောင်း သိရသည်။
လက်ရှိတွင် အသင်းကစားသမားများအနေဖြင့် ဒီဇင်ဘာလ (၈) ရက်အထိ ရပ်နားထားသော်လည်း တစ်ဦးချင်းလေ့ကျင့်မှု အစီအစဉ်များ မပျက်မကွက်ပြုလုပ်နေကြရကြောင်း သိရသည်။
ကစားသမားများအနေဖြင့် National Duty ထမ်းဆောင်နေသူနှင့် ဒဏ်ရာရနေသူများမှလွဲ၍ ကျန်ကစားသမား အားလုံး နေ့စဉ် (၃)ကီလိုမီတာ အပြေးလေ့ကျင့်နေကြရကြောင်း အသင်းဝင် ကစားသမားများထံက သိရသည်။
“ဒုတိယ အကျော့မှာ Myanmar National League (၈) ပွဲကျန်တယ်။ Shopee ပွဲတွေ ကျန်တယ်။ AFC ကန်ရမယ်၊ အကောင်းဆုံး ပုံစံရအောင် ကြိုးစားနေတယ်။ နည်းပြကလည်း ရှင်းတယ်။ ထရိန်နင်မှာ သေချာလုပ်မှ ကြိုက်တယ်။ မဟုတ်ရင် Bench မှာ ထိုင်ရဖို့တောင် မသေချာဘူး။ ကစားခွင့် ရဖို့က တော်တော်လုပ်ရတယ်။ အခုဆို ကျွန်တော် လေ့ ကျင့်ခန်းလည်း အားစိုက်လုပ်တယ်။ စိတ်ငြိမ်ဖို့ အကောင်းတွေ ဖြစ်လာဖို့ ဘုရားလည်း မမေ့ဘူး။ ဒုတိယ အကျော့မှာအကောင်းဆုံးဖြစ်ဖို့ စိတ်ရော လူပါ ပြင်ဆင်ထားတယ်”ဟု ရှမ်းယူနိုက်တက်အသင်း ကစားသမား ဈာနေယျသူက ပြောကြားထားသည်။
ယခုနှစ် မြန်မာနိုင်ငံဘောလုံးအဖွဲ့ချုပ်၊ မြန်မာနေရှင်နယ်လိဂ်ကော်မတီက ကြီးမှူးကျင်းပသည့် MNL (U-20) Youth League 2024 ရာသီပိတ် နောက်ဆုံးပွဲစဉ်ကို နိုဝင်ဘာ (၃၀) ရက်၌ ကျင်းပပြီးစီးခဲ့ပြီး ရှမ်းယူနိုက်တက်အသင်းက ရမှတ်ပေါင်း (၅၂)မှတ်ဖြင့် ချန်ပီယံဆုကို ရရှိထားသည်။