၂၀၂၄ ခုနှစ်အတွက် မြန်မာ့ရုပ်ရှင်ထူးချွန်ဆု ချီးမြှင့်ပွဲအခမ်းအနားကို မနက်ဖြန် ဖေဖော်ဝါရီလ (၉) ရက် ညနေ (၆) နာရီတွင် နေပြည်တော်ရှိ MICC (1) ၊ ကျောက်စိမ်းခန်းမ၌ ကျင်းပသွားမည်ဖြစ်ပြီး ကြိုတင်ပြင်ဆင်မှုများ လုပ်ဆောင်နေကြောင်း ပြန်ကြားရေး ဝန်ကြီးဌာနနှင့် မြန်မာနိုင်ငံ ရုပ်ရှင်အစည်းအရုံးထံမှ သိရသည်။
၂၀၂၄ ခုနှစ်အတွင်း ရုံတင်ပြသခဲ့သည့် ရုပ်ရှင်ဇာတ်ကားများအနက်မှ ဆန်ကာတင် ဇာတ်ကား (၁၈) ကားကို ရုပ်ရှင်ထူးချွန်ဆု ရွေးချယ်ရေးအဖွဲ့မှ စိစစ်ရွေးချယ်ထားပြီး ယင်းဇာတ်ကားများထဲမှ ထူးချွန်ဆုရရှိသူများကို ဖေဖေါ်ဝါရီ (၉) ရက် ညပိုင်းတွင် ချီးမြှင့်ပေးသွားမည်ဖြစ်သည်။
၂၀၂၄ ခုနှစ်အတွက် မြန်မာ့ရုပ်ရှင် ထူးချွန်ဆု (အကယ်ဒမီ) ရရှိနိုင်သူများအနေဖြင့် နေတိုး၊ စိုင်းစိုင်းခမ်းလှိုင်၊ မြင့်မြတ်၊ ဟိန်းဝေယံ၊ အေးချမ်းမောင်၊ အလင်းရောင် ၊ ဝတ်မှုန်ရွှေရည်၊ မိုးဟေကို၊ မေမီကိုကို၊ စိုးမြတ်သူဇာ၊ မျိုးသန္တာထွန်း၊ ခိုင်နှင်းဝေ၊ မယ်လိုဒီ၊ ခင်ဝင့်ဝါ၊ ခြူးလေး၊ ပိုးမမှီသာ စသည့် အနုပညာရှင်များမှာ လတ်တလော ရေပန်းစားလျက်ရှိသည်။
အကယ်ဒမီ ဆုပေးပွဲတွင် ပါဝင်အားဖြည့်ရန်အတွက် ရွှေကြိုမောင်မယ် အယောက် (၄၀) ကိုလည်း မြတ်မာ့ရုပ်ရှင်အစည်းအရုံးက ရွေးချယ်ထားပြီး ကြိုတင်စခန်းသွင်း လေ့ကျင့်မှုများ ပြုလုပ်ပေးလျက်ရှိနေသည်။
ယခုနှစ်အတွက် မြန်မာ့ရုပ်ရှင်ထူးချွန်ဆု အကယ်ဒမီ (၁၅) ဆုအထိ ရွေးချယ်ချီးမြှင့်သွားရန် လျာထားပြီး အကယ်ဒမီ ပွဲတက်ဝတ်စားဆင်ယင်မှုဆု (၄) ဆုကိုလည်း ရွေးချယ်ချီးမြှင့်သွားမည်ဖြစ်ကြောင်း မြန်မာ့ရုပ်ရှင်အစည်းအရုံထံမှ သိရသည်။
“အကယ်ဒမီမှာ ဆု (၁၅)ဆုပေးမယ် လျာထားပေမယ့် အတိအကျ မသိနိုင်သေးဘူး။ ဘယ်သူပေးမယ်ဆိုတာကိုလည်းခန့်မှန်းမရသေးဘူး”ဟု မြန်မာနိုင်ငံ ရုပ်ရှင်အစည်းအရုံး ဥက္က ဋ္ဌ ဦးကြည်စိုးထွန်းက ဆိုသည်။
လက်ရှိတွင် ၂၀၂၄ ခုနှစ် မြန်မာ့ရုပ်ရှင် ထူးချွန်ဆုချီးမြှင့်ပွဲအခမ်းအနားကျင်းပမည့် နေပြည်တော် MICC (1) ရှိ ကျောက်စိမ်းခန်းမတွင် ပြန်ကြားရေးဝန်ကြီးဌာနနှင့် မြန်မာနိုင်ငံရုပ်ရှင်အစည်းအရုံးမှ တာဝန်ရှိသူများ ဦးဆောင်ကာ ကြိုတင်ပြင်ဆင်မှုများ လုပ်ဆောင်နေပြီး အခမ်းအနားတက်မည့် အနုပညာရှင်အချို့လည်း နေပြည်တော်သို့ ရောက်ရှိနေပြီဖြစ်ကြောင်း သိရသည်။
ပြီးခဲ့သည့် ၂၀၂၃ ခုနှစ် မြန်မာ့ရုပ်ရှင်ထူးချွန်ဆု ချီးမြှင့်ပွဲ အခမ်းအနားသို့ နိုင်ငံတော် ဒုတိယဝန်ကြီးချုပ်၊ နစက ဒုတိယဥက္ကဋ္ဌ ၊ ဒုတိယ တပ်မတော်ကာကွယ်ရေးဦးစီးချုပ် ဒုတိယဗိုလ်ချုပ်မှူးကြီးစိုးဝင်း တက်ရောက်ဖွင့်လှစ်ပေးခဲ့သည်။