ရန်ကုန်၊ စက်တင်ဘာ ၁၉
ယူအက်ဖ်စီ (UFC) ဖလိုင်းဝိတ်တန်း ကမ္ဘာ့ချန်ပီယံခါးပတ်အတွက် လက်ရှိချန်ပီယံ မြန်မာဖိုက်တာ ဂျိုရှုဝါဗန် (Joshua Van) နှင့် ချန်ပီယံဟောင်း အလက်ဇန်းဒါး ပန်တိုဂျာ (Alexandre Pantoja) တို့၏ မကျေပွဲ (Rematch) ကို မြန်မာစံတော်ချိန် စက်တင်ဘာ ၂၀ ရက် နံနက်ပိုင်းတွင် ယှဉ်ပြိုင်ထိုးသတ်သွားမည်ဖြစ်သည်။
အဆိုပါ ချန်ပီယံလုပွဲကို အမေရိကန်နိုင်ငံ ကယ်လီဖိုးနီးယားပြည်နယ်၊ လော့စ်အိန်ဂျလိစ်မြို့ရှိ Crypto.com Arena ၌ ကျင်းပမည့် UFC 331 ပြိုင်ပွဲ၏ ခေါင်းတွဲဆိုင်း (Main Event) အဖြစ် ထည့်သွင်းကျင်းပသွားမည်ဖြစ်သည်။
ဂျိုရှုဝါဗန်နှင့် ပန်တိုဂျာတို့သည် ပြီးခဲ့သည့် ဒီဇင်ဘာလ UFC 323 ပြိုင်ပွဲတွင် ပထမဆုံးအကြိမ် တွေ့ဆုံခဲ့ကြပြီး ပွဲစတင်ပြီး ၂၆ စက္ကန့်အကြာ၌ ပန်တိုဂျာ တံတောင်ဆစ်ဒဏ်ရာရရှိခဲ့သဖြင့် ဂျိုရှုဝါဗန်က TKO ဖြင့် အနိုင်ရကာ UFC ဖလိုင်းဝိတ်တန်း ကမ္ဘာ့ချန်ပီယံခါးပတ်ကို သိမ်းပိုက်နိုင်ခဲ့သည်။
ယင်းနောက် အသက် ၂၄ နှစ်အရွယ် ဂျိုရှုဝါဗန်သည် ဂျပန်ဖိုက်တာ တတ်ဆူရို တိုင်ရာ (Tatsuro Taira) နှင့် ယှဉ်ပြိုင်ခဲ့ရာ အနိုင်ရရှိခဲ့ပြီး ချန်ပီယံခါးပတ်ကို ပထမဆုံးအကြိမ် အောင်မြင်စွာ ကာကွယ်ထားနိုင်ခဲ့သည်။
ယခုမကျေပွဲတွင် ပန်တိုဂျာက ဆုံးရှုံးထားသည့် ချန်ပီယံခါးပတ်ကို ပြန်လည်ရယူရန် ယှဉ်ပြိုင်မည်ဖြစ်ပြီး ဂျိုရှုဝါဗန်ကလည်း လက်ရှိချန်ပီယံခါးပတ်ကို ထပ်မံကာကွယ်ရန် ယှဉ်ပြိုင်သွားမည်ဖြစ်သည်။
ပြိုင်ပွဲမတိုင်မီ တရားဝင်ကိုယ်အလေးချိန်ချိန်တွယ်ရာတွင် ဂျိုရှုဝါဗန်နှင့် ပန်တိုဂျာတို့ နှစ်ဦးစလုံး ၁၂၅ ပေါင်စီဖြင့် သတ်မှတ်ကိုယ်အလေးချိန် ပြည့်မီခဲ့ကြောင်း UFC က ထုတ်ပြန်ထားသည်။