ရှမ်းပြည်နယ်၊ စက်တင်ဘာ ၁၉
ရှမ်းပြည်နယ်မှ ထွက်ရှိသည့် ဟင်းသီးဟင်းရွက်များကို တန်ဖိုးမြှင့်အခြောက်ခံထုတ်ကုန်များအဖြစ် ပြုပြင်ထုတ်လုပ်ကာ ဂျပန်နိုင်ငံဈေးကွက်သို့ အဓိကတင်ပို့ရောင်းချလျက်ရှိကြောင်း ရှမ်းပြည်နယ် စက်မှုကြီးကြပ်ရေးနှင့် စစ်ဆေးရေးဦးစီးဌာနမှ သိရသည်။
ကလောခရိုင်၊ ဟဲဟိုးမြို့နယ်ရှိ မြန်မာဘဲလ် ဟင်းသီးဟင်းရွက်အခြောက်ခံစက်ရုံသည် ဒေသတွင်းထွက်ရှိသည့် ဂေါ်ဖီထုပ်၊ မုန်လာဥရွက်၊ မုန်လာဥနီ၊ မုန်လာဥဖြူနှင့် ဟင်းနုနွယ်ရွက် စသည့်သီးနှံများကို တန်ဖိုးမြှင့်ထုတ်ကုန်များအဖြစ် ပြုပြင်ထုတ်လုပ်၍ ဂျပန်နိုင်ငံသို့ တင်ပို့နေခြင်းဖြစ်သည်။
ဂျပန်ဈေးကွက်သို့ တင်ပို့နိုင်ရန် ကုန်ကြမ်းရရှိသည့် စိုက်ခင်းအဆင့်မှစ၍ အရည်အသွေးစစ်ဆေးခြင်း၊ ရိတ်သိမ်းခြင်း၊ သန့်စင်ခြင်း၊ ပြုပြင်ထုတ်လုပ်ခြင်း၊ အခြောက်ခံခြင်းနှင့် ထုပ်ပိုးခြင်းအထိ ထုတ်လုပ်မှုကွင်းဆက်တစ်လျှောက် Food Safety Guideline နှင့်အညီ စနစ်တကျဆောင်ရွက်လျက်ရှိကြောင်း သိရသည်။
“စိုက်ခင်းကနေ ရရှိလာတဲ့ ကုန်ကြမ်းတွေကို အရည်အသွေးစစ်ဆေးပြီးမှ သုံးစွဲပါတယ်။ ရိတ်သိမ်းတာ၊ သန့်စင်တာ၊ ပြုပြင်ထုတ်လုပ်တာ၊ အခြောက်ခံတာနဲ့ ထုပ်ပိုးတာဆိုတဲ့ ထုတ်လုပ်မှုကွင်းဆက်တစ်ခုလုံးကို Food Safety Guideline အတိုင်း ဆောင်ရွက်နေတာပါ။ နိုင်ငံတကာအသိအမှတ်ပြု GAP၊ GMP၊ HACCP စတဲ့ စံချိန်စံညွှန်း အသိအမှတ်ပြုလက်မှတ်တွေလည်း ရရှိထားပါတယ်” ဟု ရှမ်းပြည်နယ် စက်မှုကြီးကြပ်ရေးနှင့် စစ်ဆေးရေးဦးစီးဌာနမှ ခေတ္တပြည်နယ်မှူး ဦးကျော်စိုးက ပြောသည်။
ဒေသထွက်စိုက်ပျိုးရေးထွက်ကုန်များကို ယင်းကဲ့သို့ တန်ဖိုးမြှင့်ထုတ်ကုန်များအဖြစ် ပြောင်းလဲ၍ ဂျပန်ကဲ့သို့ ပြည်ပဈေးကွက်သို့ တင်ပို့နိုင်ခြင်းကြောင့် စိုက်ပျိုးရေးကဏ္ဍအပြင် Processing၊ Packing နှင့် Logistics လုပ်ငန်းများပါ ချိတ်ဆက်ဖွံ့ဖြိုးလာပြီး ဒေသတွင်းအလုပ်အကိုင်အခွင့်အလမ်းများ တိုးတက်လာကြောင်း သိရသည်။
ထို့ပြင် လူငယ်များအတွက် Food Technology၊ Quality Control၊ Packing နှင့် Export လုပ်ငန်းများတွင် အလုပ်အကိုင်အခွင့်အလမ်းများ ပိုမိုဖန်တီးပေးနိုင်ကြောင်း သိရသည်။
ရှမ်းပြည်နယ် စက်မှုကြီးကြပ်ရေးနှင့် စစ်ဆေးရေးဦးစီးဌာနအနေဖြင့်လည်း MSME လုပ်ငန်းရှင်များ ဈေးကွက်နှင့် အရင်းအနှီးချေးငွေ ရရှိနိုင်ရေးအတွက် ဘဏ်များနှင့် ချိတ်ဆက်ဆောင်ရွက်ပေးလျက်ရှိပြီး ဒေသထွက် ပြောင်း၊ အာလူးနှင့် ခရမ်းချဉ်သီးတို့အတွက် နိုင်ငံတကာအဆင့်မီဈေးကွက်များ ပိုမိုရရှိလာစေရေး ဆောင်ရွက်လျက်ရှိကြောင်း သိရသည်။