ဖနွမ်းပင်၊ ဧပြီ ၂၁ ရက်
ကမ္ဘောဒီးယားနိုင်ငံတွင် ၂၀၂၆ ခုနှစ်၊ အပြည်ပြည်ဆိုင်ရာ တရုတ်ဘာသာစကားနေ့ကို ကျင်းပခဲ့ရာ ဒေသခံအရာရှိများ၊ ပညာရေးလောကမှ ပညာရှင်များ၊ ကျောင်းသားများနှင့် တရုတ်ဘာသာစကား ဝါသနာပါသူ ရာပေါင်းများစွာ တက်ရောက်ခဲ့ကြောင်း ကမ္ဘောဒီးယား ပညာရေး၊ လူငယ်နှင့် အားကစားဝန်ကြီးဌာန၏ အင်္ဂါနေ့ သတင်းထုတ်ပြန်ချက်အရ သိရသည်။
တနင်္လာနေ့မွန်းလွဲပိုင်းက ကမ္ဘောဒီးယား တော်ဝင်အကယ်ဒမီရှိ ကွန်ဖြူးရှပ်အင်စတီကျုတွင် ကျင်းပခဲ့သည့် အဆိုပါအခမ်းအနား၌ ကမ္ဘောဒီးယား ဒုတိယဝန်ကြီးချုပ်နှင့် ပညာရေး၊ လူငယ်နှင့် အားကစားဝန်ကြီး Hang Chuon Naron က တရုတ်ဘာသာစကားသည် ကမ္ဘောဒီးယားနှင့် တရုတ်နိုင်ငံတို့အကြား ခိုင်မာသော ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုကို အားကောင်းစေသည့် တံတားတစ်စင်းအဖြစ် အရေးပါပုံကို အလေးပေး ပြောကြားခဲ့သည်။
၎င်းက ကမ္ဘောဒီးယား၏ ပညာရေးစနစ်အတွင်း တရုတ်ဘာသာစကား သင်ကြားမှုသည် လျင်မြန်စွာ တိုးတက်လာခဲ့ကြောင်း ပြောကြားခဲ့သည်။
“တရုတ်ဘာသာစကား ကျွမ်းကျင်မှုဟာ ၂၁ ရာစုရဲ့ အလုပ်အကိုင်နဲ့ စီးပွားရေး အခွင့်အလမ်းတွေကို ဆုပ်ကိုင်နိုင်ဖို့ ကမ္ဘောဒီးယား လူငယ်တွေအတွက် အဓိကကျတဲ့ ယှဉ်ပြိုင်နိုင်စွမ်း အားသာချက်တစ်ခု ဖြစ်ပါတယ်” ဟု Chuon Naron က ဆိုသည်။
“ဘာသာစကားကို ကျွမ်းကျင်ပိုင်နိုင်ခြင်းဟာ တစ်ဦးချင်း ဖွံ့ဖြိုးတိုးတက်မှုအတွက်သာမက ကမ္ဘောဒီးယားနိုင်ငံကို ၂၀၅၀ ခုနှစ်မှာ ဝင်ငွေမြင့်မားတဲ့ နိုင်ငံဖြစ်လာစေဖို့ မျှော်မှန်းချက်နဲ့အညီ စီးပွားရေး ဖွံ့ဖြိုးတိုးတက်မှုအတွက်လည်း အထောက်အကူပြုစေမှာ ဖြစ်ပါတယ်” ဟု ၎င်းက ဆက်လက်ပြောကြားခဲ့သည်။
ဝန်ကြီးက ကျောင်းသားများအနေဖြင့် ကမ္ဘောဒီးယား-တရုတ် ဆက်ဆံရေး တိုးတက်စေရန် တရုတ်ဘာသာစကားကို လေ့လာသင်ယူကြရန် တိုက်တွန်းခဲ့ပါသည်။ အဆိုပါ အခမ်းအနားတွင် တက်ရောက်လာသူများသည် တရုတ်ရိုးရာယဉ်ကျေးမှု ဖျော်ဖြေပွဲများကို ကြည့်ရှုခဲ့ကြပြီး တရုတ်လက်ရေးလှပညာရပ်ကိုလည်း လက်တွေ့အတွေ့အကြုံ ယူခဲ့ကြပါသည်။
Ref: ဆင်ဟွာ
