နီပေါနိုင်ငံသည် ဒေသတွင်း ပဋိပက္ခကြောင့် လုပ်ငန်းစဉ်များကို ရပ်ဆိုင်းထားခဲ့အပြီး ရက်သတ္တခြောက်ပတ်အကြာတွင် ၎င်း၏ နိုင်ငံသားများအတွက် အရှေ့အလယ်ပိုင်းတွင် အလုပ်လုပ်ရန် ခွင့်ပြုချက်များကို ပြန်လည်ထုတ်ပေးခဲ့ကြောင်း အရာရှိတစ်ဦးက ဧပြီလ၂၁ ရက် နေ့တွင် ပြောကြားခဲ့သည်။
ပြည်ပရောက် နီပေါလုပ်သားအားလုံး၏ ၇၅ ရာခိုင်နှုန်းခန့်သည် အရှေ့အလယ်ပိုင်းနိုင်ငံများ၌ အဓိကအားဖြင့် ဆောက်လုပ်ရေးလုပ်ငန်းခွင်များတွင် လုပ်ကိုင်ကြပြီး အလုပ်သမားများထံမှ ပြန်ပို့ငွေများသည် ငွေကြေးချို့တဲ့သော ဟိမဝန္တာဒေသနိုင်ငံ၏ ဒေါ်လာ ၄၂ ဘီလျံတန်စီးပွားရေးတွင် လေးပုံတစ်ပုံကျော်ရှိသည်ဟု ကျွမ်းကျင်သူများက ပြောသည်။
ခွင့်ပြုချက်ပြန်လည်ထုတ်ပေးခြင်းသည် နိုင်ငံခြားရေးဝန်ကြီးဌာန၏ အကြံညဏ်နှင့် အလုပ်သမားထံမှ မြင့်မားသော တောင်းဆိုမှုများအရဖြစ်သည်ဟု အလုပ်သမားဝန်ကြီးဌာန၏ ပြောရေးဆိုခွင့်ရှိသူ ပီတမ်ဘား ဂီမီရီက ရိုက်တာသတင်းဌာနကို ပြောကြားခဲ့သည်။
နီပေါနိုင်ငံသည် နိုင်ငံသားများ ပြည်ပတွင် အလုပ်လုပ်ကိုင်ရန်အတွက် အစိုးရထံမှ အလုပ်လုပ်ခွင့်လက်မှတ်ရယူရန် လိုအပ်သော်လည်း အီရန်နှင့် အမေရိက-အစ္စရေးစစ်ပွဲစတင်ပြီး တစ်ရက်အကြာ မတ်လ ၁ ရက်နေ့တွင် ပင်လယ်ကွေ့နိုင်ငံများအတွက် ခွင့်ပြုချက်ပေးအပ်ခြင်းကို ရပ်ဆိုင်းခဲ့သည်။
ကမ္ဘာ့ဘဏ်၏ အချက်အလက်များအရ လူဦးရေ သန်း ၃၀ ရှိသော နီပေါနိုင်ငံ၏ လူငယ်အလုပ်လက်မဲ့နှုန်းသည် ၂၀ ဒဿမ ၆ ရာခိုင်နှုန်းရှိပြီး တောင်နှင့် အရှေ့တောင်အာရှနိုင်ငံအားလုံးတွင် အမြင့်ဆုံးဖြစ်ကြောင်း သိရသည်။
နီပေါနိုင်ငံသား အနည်းဆုံး သုံးသန်းခန့်သည် ပြည်ပတွင် အလုပ်လုပ်ကိုင်နေကြသည်ဟု အရာရှိများက ပြောကြားခဲ့သည်။ ပြည်တွင်းအလုပ်အကိုင် အခွင့်အလမ်းရှားပါးမှုကြောင့် နီပေါနိုင်ငံမှ လူငယ် ၁,၅၀၀ ခန့်သည် ပြည်ပအလုပ်အကိုင်အတွက် နေ့စဉ် ထွက်ခွာနေကြသည်ဟု အလုပ်သမားသမဂ္ဂများက ခန့်မှန်းထားသည်။
Ref: သယ်စထရိတ်တိုင်းမ်စ်