အားကစားရေးရာဝန်ကြီးဌာန ဒုတိယဝန်ကြီး ဦးညီညီသည် အင်ဒိုနီးရှားနိုင်ငံ၊ ဘာလီမြို့တွင် ကျင်းပခဲ့သည့် ၂၀၂၆ ခုနှစ်၊ လူငယ်နှင့်အားကစားဆိုင်ရာ အရှေ့တောင်အာရှဝန်ကြီးများအဆင့် အစည်း အဝေးသို့ တက်ရောက်ခဲ့ပြီးနောက် ယနေ့နံနက်တွင် ရန်ကုန်မြို့သို့ ပြန်လည်ရောက်ရှိလာကာ မကြာမီကျင်းပမည့် အပြည်ပြည်ဆိုင်ရာ ကာယဗလပြိုင်ပွဲအတွက် ပြင်ဆင်မှုများကို ကွင်းဆင်းစစ်ဆေးခဲ့သည်။
ယခုလ မေ ၃ ရက်မှ ၅ ရက်အထိ ကျင်းပသည့် အစည်းအဝေးသို့ တက်ရောက်ခဲ့သည့် ဒုတိယဝန်ကြီးနှင့်အတူ ဝန်ကြီးရုံးလက်ထောက်အတွင်းဝန် ဦးထွန်းသန့်တို့သည် ယနေ့ နံနက် (၉) နာရီတွင် ရန်ကုန်အပြည်ပြည်ဆိုင်ရာလေဆိပ်သို့ ရောက်ရှိခဲ့ပြီးနောက် အပြည်ပြည်ဆိုင်ရာ ကာယဗလပြိုင်ပွဲအတွက် ပြင်ဆင်မှုများကို ကွင်းဆင်းစစ်ဆေးခဲ့သည်။
မင်းဓမ္မလမ်းရှိ မြန်မာကွန်ဗေးရှင်းစင်တာ (MCC) သို့ သွားရောက်၍ မေလ (၁၄) ရက် မှ ၁၈ ရက်အထိ ကျင်းပမည့် (၂၀) ကြိမ်မြောက် အရှေ့တောင်အာရှ ကာယဗလနှင့် ကာယကြံ့ခိုင်မှုအားကစားပြိုင်ပွဲအတွက် ကြိုတင်ပြင်ဆင်ထားမှုများကို စစ်ဆေးခဲ့သည်။
ဒုတိယဝန်ကြီးမှ ပြိုင်ပွဲကျင်းပရာတွင် နိုင်ငံတကာအဆင့်အတန်းနှင့်အညီ သပ်ရပ်ကောင်းမွန်စေရေးအတွက် လိုအပ်သည်များကို တာဝန်ရှိသူများအားအသေးစိတ်မှာကြားခဲ့ကြောင်း သိရပသည်။