ဧရာဝတီတိုင်းမှ ရေဘေးသင့်ဒေသများအတွက် တိုင်းအစိုးရအဖွဲ့၏ မြွေအန္တရာယ်သတိပေးနှိုးဆော်လွှာ 

ဧရာဝတီတိုင်း၌ မိုးသည်းထန်စွာရွာ သွန်းမှုကြောင့် ရေကြီးရေလျှံမှုများဖြစ်ပေါ်လျက်ရှိရာ ရေဘေးသင့်ဒေသများ ၌ မြွေအန္တရာယ်သတိပြုလိုက်နာဆောင်ရွက်ရမည့် သတိပေးစာလွှာကို တိုင်းအစိုးရအဖွဲ့က အရေးပေါ်အသိပေးစာအဖြစ်ထုတ်ပြန်ခဲ့သည်။

ရေကြီးရေလျှံမှုများကြောင့် မြွေများကျက်စားရာနေရာများရေနစ်မြုပ်ကာ သစ်ပင်များ၊ အမိုးအကာများ၊ အ ထက်စီးနေရာများနှင့် လူနေအိမ်များအတွင်းသို့ မြွေများပုန်းအောင်းဝင်ရောက်လာနိုင်၍ ရေဘေးသင့်သူများနှင့် ကူညီကယ်ဆယ်ရေးအဖွဲ့များအနေဖြင့် အမှောင်ထဲတွင်သွားလာခြင်းမှရှောင်ကြဉ်ကြရန်၊ မဖြစ်မနေသွားလာရပါက မီးအိမ်၊ လက်နှိပ်ဓာတ်မီးသေချာစွာ အသုံးပြုရန် အသိပေးခဲ့သည်။

ရေပေါ်မျောနေသော သစ်ကိုင်း၊ သစ်တုံးများနှင့် အိမ်အတွင်းရှိ အဝတ်အထည်၊ စောင်၊ မွေ့ယာများကို ကိုင်တွယ်ရာတွင်သေချာစွာမီးထွန်းကြည့်ရှုရန်၊ ကူညီကယ်ဆယ်ရေးအဖွဲ့များအနေဖြင့် ရေထဲ၌ကူးခတ်ရှာဖွေစဉ်နှင့် အပျက်အစီးများဖယ်ရှားစဉ်တို့တွင် ခြေစွပ်၊ လက်စွပ်(သို့)ဘုဖိနပ် (Rubber Boots)များဝတ်ဆင်၍ ဝါး လုံး/သစ်ကိုင်းများဖြင့် အရင်ထိုးဆွစစ်ဆေးရန်လည်း အသိပေးခဲ့သည်။

မြွေကိုက်ခံရပါက လူနာကိုငြိမ်ငြိမ်သက်သက်ထားရမည်ဖြစ်ကာ(လူနာ လှုပ်ရှားလေ အဆိပ်ပြန့်နှံ့မှုမြန်လေဖြစ်၍ ငြိမ်ငြိမ်ထိုင်/လှဲနေပါစေ)၊ ကိုက်ခံရသည့်အစိတ်အပိုင်းကိုမလှုပ်ရှားစေရဘဲ(ကိုက်ခံရသော ခြေ/လက်တွင် သစ်သားချောင်း/ဂျပတ်စည်း၍မလှုပ်ရှားနိုင်အောင်ထိန်းချည်ထားရမည်)ထားရမည်ဖြစ်သည်။

ဖူးရောင်လာနိုင်သဖြင့် ကိုက်ခံရသည့်နေရာအနီးရှိ လက်စွပ်၊ နာရီ၊ ကြိုးများနှင့် ကျပ်သိပ်သော အဝတ်အထည်များကိုချက်ချင်းချွတ်ရမည်ဖြစ်ပြီး အချိန်မဆိုင်းဘဲ နီးစပ်ရာအစိုးရဆေးရုံ/ကျန်းမာရေးစခန်းသို့ မြန်ဆန်စွာပို့ဆောင်ရမည်ဖြစ်သည်။

ဒဏ်ရာကိုမလှီးရန်၊ မစုပ်ယူရန်၊ ကြိုး၊ ကြိုးပြားများဖြင့်အပြင်းအထန်မစည်းရန်(ဆဲလ်များပုပ်သိုးနိုင်)၊ တိုင်းရင်းဆေး၊ အရက်(သို့)အခြားဆေးဝါးများလုံးဝမတိုက်ရန်၊ အစိုးရကုသရေးစခန်းများသို့ ချက်ချင်းသွားရန်လည်း သတိပေးခဲ့သည်။

အစိုးရဆေးရုံများနှင့် အရေးပေါ်ကုသရေးစခန်းများတွင် မြွေဆိပ်ဖြေဆေး (Antivenom)များ လုံလောက်စွာ စု ဆောင်းပြင်ဆင်ထားပြီးဖြစ်၍ မြွေကိုက်ခံရပါက ဆေးမှီတိုနှင့်အချိန်မဖြုန်းဘဲ နီးစပ်ရာ အစိုးရကုသရေးစခန်း/ဆေးရုံများသို့ အမြန်ဆုံးလာရောက်ကုသမှုခံယူကြရန် အသိပေးနှိုးဆော်ခဲ့သည်။