၂၀၂၅ ခုနှစ် မတ် ၂၀ ရက်မှ ၂၅ ရက်အထိ အိန္ဒိယနိုင်ငံ၌ ကျင်းပခဲ့သည့် ISTAF SEPAKTAKRAW WORLD CUP 2025 ပြိုင်ပွဲတွင် ရွှေငွေကြေး ဆုတံဆိပ်များ ရရှိခဲ့သည့် ပိုက်ကျော်ခြင်းအားကစားအဖွဲ့ကို ယမန်နေ့က နေပြည်တော် အားကစားလေ့ကျင့်ရေးစခန်း၌ ဂုဏ်ပြုချီးမြှင့်ခဲ့ကြောင်း သိရသည်။
အဆိုပါ ပြိုင်ပွဲတွင် ထိုင်း၊ဗီယက်နမ်၊မလေးရှား၊တရုတ်၊ အီတလီနိုင်ငံအပါအဝင် နိုင်ငံပေါင်း ၂၀ ခန့် ပါဝင်ယှဉ်ပြိုင်ခဲ့ခြင်းဖြစ်ပြီး မြန်မာအသင်းအနေဖြင့် အမျိုးသမီးနှစ်ယောက်တွဲပြိုင်ပွဲတွင် ရွှေတံဆိပ်တစ်ခု၊ အမျိုးသားအမျိုးသမီးလေးယောက်တွဲပြိုင်ပွဲ၊ အမျိုးသားနှစ်ယောက်တွဲပြိုင်ပွဲတွင် ငွေတံဆိပ်တစ်ခုစီနှင့် အမျိုးသားလေးယောက်တွဲပြိုင်ပွဲတွင် ကြေးတံဆိပ်တစ်ခု စုစုပေါင်း ဆုတံဆိပ်လေးခုရရှိခဲ့ကြောင်း သိရသည်။
အဆိုပါ ဆုတံဆိပ်များရရှိခဲ့သည့် ပိုက်ကျော်ခြင်းအားကစားအဖွဲ့ကို ဂုဏ်ပြုချီးမြှင့်ပွဲ၌ စုစုပေါင်း ကျပ် သိန်း ၁၄၄၀ ကို ဂုဏ်ပြုချီးမြှင့်ပေးအပ်ခဲ့ကြောင်း သိရသည်။
နိုင်ငံတကားအားကစားပြိုင်ပွဲများ အောင်မြင်မှုဆုတံဆိပ်များ ဆွတ်ခူးရယူခဲ့ခြင်းသည် နိုင်ငံတော်နှင့် လူမျိုး၏ ဂုဏ်သိက္ခာကို မြှင့်တင်ပေးခြင်းသာမက အားကစားအဆင့်အတန်းတိုးတက်မြင့်မားခြင်းကို ဖော်ဆောင်နိုင်ခြင်းဖြစ်ကြောင်းလည်း အားကစားနှင့် လူငယ်ရေးရာဝန်ကြီးဌာန ပြည်ထောင်စုဝန်ကြီး Jeng Phang နော်တောင်က ဂုဏ်ပြု အမှာစကားပြောကြားခဲ့သည်။
မြန်မာနိုင်ငံပိုက်ကျော်ခြင်း အဖွဲ့ချုပ်ကို ၁၉၉၁ ခုနှစ်တွင် စတင်တည်ထောင်ခဲ့ပြီး ယနေ့ထိ ကမ္ဘာ့အဆင့်ပြိုင်ပွဲများတွင် ရွှေတံဆိပ်လေးခု၊ ငွေတံဆိပ် ၂၀ ကျော်၊ ကြေးတံဆိပ် ၃၀ ကျော်၊ အာရှအဆင့်ပြိုင်ပွဲများတွင် ရွှေတံဆိပ်ခြောက်ခု၊ ငွေတံဆိပ် ၁၀ ခု၊ ကြေးတံဆိပ် ၁၀ ခု နှင့် အရှေ့တောင်အာရှအဆင့်တွင် ရွှေတံဆိပ် ၁၈ ခု၊ ငွေတံဆိပ် ၂၉၊ ကြေးတံဆိပ် ၃၀ ကျော်ထိ ဆုခူးရယူထားနိုင်ကြောင်း သိရသည်။