အာဆီယံ၊ ပင်လယ်ကွေ့ပူးပေါင်းဆောင်ရွက်ရေးကောင်စီ(ဂျီစီစီ) နှင့် တရုတ်နိုင်ငံတို့အကြား စတင်ဖွင့်လှစ်လိုက်သည့် ထိပ်သီးအစည်းအဝေးသည် မဟာဗျူဟာမြောက် ပူးပေါင်းဆောင်ရွက်မှု၏ စာမျက်နှာသစ်ဖြစ်ကြောင်း မလေးရှားဝန်ကြီးချုပ် အန်ဝါအီဘရာဟင်မ်က ပြောကြားခဲ့သည်။
ယမန်နေ့(မေလ ၂၆ရက်နေ့) ညပိုင်းက အာဆီယံခေါင်းဆောင်များကို ဂုဏ်ပြု သောညစာစားပွဲ၌ ကြိုဆိုနှုတ်ခွန်းဆက်စကားပြောကြားရာတွင် ဂျီစီစီ၏ ထူးခြားသောအသွင်ကူးပြောင်းမှုကို အန်ဝါက မီးမောင်းထိုးပြခဲ့ရာ၌ နည်းပညာသစ်နှင့် ညဏ်ရည်တုနည်းပညာဖြင့် မောင်းနှင်သည့် “ကမ္ဘာပေါ်တွင် အငြိမ်းချမ်းဆုံးနှင့် အလျင်မြန်ဆုံး တိုးတက်နေသည့် စီးပွားရေး” အဖြစ် ဖော်ပြခဲ့သည်။
ထို့အပြင် အာဆီယံသည် တရုတ်နိုင်ငံကို တန်ဖိုးထားရသော မိတ်ဆွေအဖြစ်မှတ်ယူကြောင်း သူက ထုတ်ဖော်ပြောဆိုခဲ့ပြီး ရှုပ်ထွေးသော ပထဝီနိုင်ငံရေးဆိုင်ရာ ဖြစ်ရပ်များနှင့်ရင်ဆိုင်နေရချိန်တွင် ဒေသနှင့် အပြုသဘောဆောင်သော ထိတွေ့ဆက်ဆံမှု ဆက်ရှိနေကြောင်း ၎င်းက ပြောကြားခဲ့သည်။
“ဒါဟာ ကုန်သွယ်မှု မြှင့်တင်လိုတဲ့သူတွေ၊ ရင်းနှီးမြှုပ်နှံမှုတွေ တိုးတက်စေလိုတဲ့သူတွေနဲ့ လွတ်လပ်မှု၊ လူ့အခွင့်အရေး၊ ဒီမိုကရေစီကို ယုံကြည်သူတွေ၊ သူတို့နိုင်ငံတွေကို တိုးတက်စေလိုသူတွေ၊ စိတ်စေတနာတွေရဲ့ အစည်းအဝေးတစ်ခုဖြစ်ပါတယ်” ဟု သူက ပြောကြားခဲ့သည်။
အာဆီယံ-ဂျီစီစီ-တရုတ် ထိပ်သီးအစည်းအဝေးတွင် ကူဝိတ်အိမ်ရှေ့မင်းသား ရှိတ်ဆာဘားခါလက် အယ်လ်ဟာမက် အယ်လ်ဆာဘားနှင့် တရုတ်ဝန်ကြီးချုပ် လီချန်းတို့ ပူးပေါင်းပါဝင်မှု၏ အရေးပါမှုကိုလည်း အန်ဝါက အလေးပေးပြောကြားခဲ့ပြီး ၎င်းတို့၏ ပါဝင်မှုသည် မိတ်ဖက်များအကြား မယိုင်လဲသော ချစ်ကြည်ရင်းနှီးမှုနှင့် ယုံကြည်မှုကို ရောင်ပြန်ဟပ်စေသည့် အရေးပါမှုအဖြစ် အလေးပေးပြောကြားခဲ့သည်။
ယင်းသည် နိုင်ငံများ၏ တွေ့ဆုံမှုသာမက အာဆီယံခေါင်းဆောင်များ၏ တုနှိုင်းမမီ ထူးခြားသော ယုံကြည်မှု၊ ချစ်ခင်မှုနှင့် ထောက်ခံမှု ဖြစ်ပါကြောင်း ဆိုခဲ့သည်။
ဝန်ကြီးချုပ်လီကို ပြောလိုသည်မှာ အာဆီယံသည် တရုတ်နိုင်ငံ၏ မိတ်ဆွေအဖြစ် ဤနေရာတွင် ရှိနေသည်ကို စိတ်ချယုံကြည်ပါရန်နှင့် ယင်းမိတ်ဖက်ဆက်ဆံရေးသည် အပြန်အလှန်ယုံကြည်မှုဖြင့် ဆက်လက်တည်ဆောက်ရမည်ဖြစ်ပါကြောင်း သူကပြောကြားခဲ့သည်။
ကူဝိတ်ကိုယ်စားလှယ်အဖွဲ့ကို ဦးဆောင်လာသည့် အိမ်ရှေ့မင်းသားသည် ယနေ့(မေလ ၂၇ရက်နေ့) တွင် ကျင်းပမည့် ဒုတိယအကြိမ်မြောက် အာဆီယံ-ဂျီစီစီ ထိပ်သီးနှင့် အာဆီယံ-ဂျီစီစီ-တရုတ် ထိပ်သီးအစည်းအဝေးများကို တက်ရောက်မည်ဖြစ်သည်။
Ref: မလေးမေးလ်