လပေါ်မှာ သွားရောက်တာဝန်ထမ်းဆောင်မယ့် အာကာသယာဉ်မှူးတွေကို လေ့ကျင့်ပေးဖို့အတွက် မြေပြင်အခြေစိုက် ‘လကမ္ဘာ လေ့ကျင့်ရေးကွင်း’ တစ်ခုကို ရုရှားနိုင်ငံက တည်ဆောက်နေပါတယ်။
ဒီအကြောင်းအရာနဲ့ ပတ်သက်ပြီး ရုရှားနိုင်ငံရဲ့ ဖက်ဒရယ် ဆေးဘက်ဆိုင်ရာနဲ့ ဇီဝဗေဒအေဂျင်စီ (FMBA) က တာဝန်ရှိသူတစ်ဦးက အခုလို ပြောပြထားတာပါ။
“ကျွန်တော်တို့ FMBA ရဲ့ အာကာသဆေးပညာနဲ့ ဇီဝဗေဒဗဟိုဌာနဟာ ဒီလုပ်ငန်းခွင်ကို အထူးတလည် အကောင်အထည်ဖော်နေပြီး ဒါဟာ ရုရှားအာကာသစက်မှုလုပ်ငန်းရဲ့ မဟာဗျူဟာမြောက် ဦးစားပေးလုပ်ငန်းတစ်ခုလည်း ဖြစ်ပါတယ်။ အဓိကအနေနဲ့ကတော့ ‘လကမ္ဘာစမ်းသပ်ကွင်း’ လို့ ပြောလို့ရမယ့် မြေပြင်အခြေစိုက် တူညီပတ်ဝန်းကျင်တစ်ခုကို ဖန်တီးဖို့ ကြိုးစားနေတာပါ။ အဲဒီကွင်းထဲမှာ လကမ္ဘာမျက်နှာပြင်နဲ့ အနီးစပ်ဆုံးတူညီတဲ့ အခြေအနေတွေကို ဖန်တီးပေးထားမှာဖြစ်ပြီး အာကာသယာဉ်မှူးတွေ လပေါ်မှာ အလုပ်လုပ်နိုင်အောင် ကြိုတင်လေ့ကျင့်ပေးမှာ ဖြစ်ပါတယ်” လို့ ပြောသွားပါတယ်။
အာကာသယာဉ်မှူးတွေဟာ အဲဒီကွင်းထဲမှာ ယာဉ်အပြင်ဘက်ထွက်ပြီး လုပ်ဆောင်ရမယ့် လုပ်ငန်းစဉ်တွေကို လေ့ကျင့်ကြရမှာပါ။ ဥပမာ အပြင်ကို ထွက်တာ၊ တံခါးပိတ်တာ၊ စက်ပစ္စည်းတွေကို ထိန်းသိမ်းပြုပြင်တာတွေအပြင် လကမ္ဘာပေါ်မှာ အလုပ်လုပ်ပြီး နေထိုင်မယ့် အခန်းထဲကို ပြန်ဝင်လာတဲ့အခါ လကမ္ဘာကဖုန်မှုန့်တွေကို ဘယ်လိုခါချရမလဲ ဆိုတာတွေကိုပါ လေ့ကျင့်ကြရမှာ ဖြစ်ပါတယ်။
ဒါတင်မကသေးပါဘူး၊ လကမ္ဘာကဖုန်မှုန့်တွေကြောင့် ဖြစ်လာနိုင်တဲ့ ဘေးထွက်ဆိုးကျိုးတွေကို ကာကွယ်ဖို့၊ အရေးပေါ်အခြေအနေတွေကို ကိုင်တွယ်ဖြေရှင်းဖို့နဲ့ ရေရှည်စိတ်ဖိစီးမှုတွေ ကြုံရတဲ့အခါ (ဥပမာ- စိတ်ပညာပိုင်းဆိုင်ရာ အခြေအနေနဲ့ အဖွဲ့လိုက် ပူးပေါင်းဆောင်ရွက်မှုတွေမှာ) လူသားတွေရဲ့ ခန္ဓာကိုယ်နဲ့ စိတ်ပိုင်းဆိုင်ရာ တုံ့ပြန်မှုကို ဆန်းစစ်ဖို့အတွက် သီးသန့်အခန်းတစ်ခုကိုလည်း ထည့်သွင်းဖို့ အဆိုပြုထားပါတယ်။
FMBA အေဂျင်စီဟာ အာကာသယာဉ်မှူးတွေ လပေါ်ကို ဆင်းသက်ပြီးတာနဲ့ ချက်ချင်း အလုပ်လုပ်နိုင်စွမ်း ရှိ၊ မရှိ ဆန်းစစ်မယ့် နည်းလမ်းတွေကို ဖော်ထုတ်နေသလို၊ လေယာဉ်စီးတဲ့အခါ ကြုံရမယ့် အခြေအနေတွေအတွက် အာကာသယာဉ်မှူးတွေရဲ့ အာရုံခံစနစ်နဲ့ ဟန်ချက်ထိန်းစနစ်တွေ အသားကျအောင် လေ့ကျင့်ပေးမယ့် တုပလေ့ကျင့်ရေးစက်(Simulator)တွေကိုလဲ တီထွင်နေပါတယ်။
“ဒီအလုပ်က ဆေးပညာ၊ ရူပဗေဒနဲ့ အင်ဂျင်နီယာပညာရပ်တွေ အကုန်လုံး ဆုံစည်းနေတဲ့ ခက်ခဲနက်နဲတဲ့ လုပ်ငန်းတစ်ခု ဖြစ်ပါတယ်။ ဒီနေရာမှာတော့ ကျွန်တော်တို့ ရုရှားနိုင်ငံရဲ့ FMBA အဖွဲ့ဟာ နိုင်ငံတွင်းမှာ တခြားသူတွေမရှိတဲ့ ထူးခြားဆန်းသစ်တဲ့ ကျွမ်းကျင်မှု အသိပညာတွေ ပိုင်ဆိုင်ထားပါတယ်” လို့ တာဝန်ရှိသူက ပြောကြားသွားခဲ့ပါသေးတယ်။