ဟောလိဝုဒ်သရုပ်‌ဆောင်များက အဝတ်အစား အသုံးအဆောင်များကို မီးဘေးအတွက်ပေးလှူ

အမေရိကန်ပြည်ထောင်စု လော့စ်‌ဆန်းဂျလိစ်ဒေသများကို ယခုသီတင်းပတ်တွင် တောမီးဝါးမြိုဖျက်ဆီးနေခဲ့သည့်အတွက် အိမ်ခြံမြေကိုယ်စားလှယ်တစ်ဦးဖြစ်သူ ဂျန်နာကူးပါးက လိုအပ်သူများကို ကူညီရန်အတွက် မိတ်ဆွေသူငယ်ချင်းများထံမှ အဝတ်အထည်များနှင့် အခြားအသုံးအဆောင်ပစ္စည်းများကို စတင်အလှူခံခဲ့သည်။

သူ၏ တောင်းခံမှုသည် သြဇာကြီးသော အမျိုးသမီးကွန်ရက်တစ်ခုမှတဆင့် တမုဟုတ်ခြင်း ပျံ့နှံ့သွားခဲ့ပြီး ရှာရွန်စတုန်းနှင့် ဟယ်လီဘယ်ရီအပါအဝင် သရုပ်ဆောင်များသည် အင်္ကျီများ၊ ဖိနပ်များ၊ အဝတ်အစားများ၊ လက်ကိုင်အိတ်များ၊ ခါးပတ်များ၊ ညဝတ် ဝတ်စုံများနှင့် သူတို့ပိုင် အသုံးအဆောင်ပစ္စည်းများကို ထုတ်ယူ လှူဒါန်းခဲ့ကြသည်။

“ကျွန်မ ဗီရိုတစ်ခုလုံးက အထည်တွေကို ထုပ်ပိုးနေပါတယ်” ဟု မင်းသမီး ဘယ်ရီက အင်စတာဂရမ်တွင် ရေးသားခဲ့သည်။ “ရှင်တို့သာ တောင်ကယ်လီဖိုးနီးယားဧရိယာမှာနေသူဆိုရင် ဒီအတိုင်းလုပ်ဖို့ တိုက်တွန်းပါတယ်၊ ဒါက ဒီအချိန်မှာ ကျွန်မတို့လုပ်နိုင်တဲ့အရာပါ” ဟု သူက ဆိုခဲ့သည်။

+COOP ဟုခေါ်သော အိမ်သုံးပစ္စည်းစတိုးဆိုင်လည်းဖွင့်ထားသော ကူးပါးသည် မီးဘေးသင့်သူများ သူတို့လိုရာပစ္စည်းရနိုင်ရေးအတွက် ကြိုက်ရာရွေးယူနိုင်သည့် pop-up ဈေးဝယ်နေရာတစ်ခုဖန်တီးရန် သူ့ဆိုင်နေရာတစ်ဝက်ကို ရှင်းလင်းခဲ့သည်။ လက်ရှိအချိန်အထိ လောင်ကျွမ်းနေဆဲဖြစ်သော တောမီးကြောင့် လော့စ် ဆန်းဂျလိစ်ဒေသခံများစွာသည် နေအိမ်များ လုံးဝဆုံးရှုံးခဲ့ကြရသည်။

စတုန်းသည် ယင်းလှူဒါန်းမှုနှင့်ပတ်သက်၍ ဆိုရှယ်မီဒီယာတွင် သတင်းအချက်အလက်ဖြန့်ဝေခဲ့ပြီး သူ၏လုပ်ရပ်သည် အများကို ဆွဲဆောင်နိုင်ခဲ့သည်။ သူနှင့် ညီမဖြစ်သူ ကယ်လီစတုန်းသည် အဝတ်အစား၊ အိပ်ယာနှင့် အခြားအသုံးအဆောင်များကို လှူဒါန်းခဲ့ပြီး ကယ်လီသည် ဈေးဝယ်သူများကို စေတနာဝန်ထမ်း ကူညီပေးခဲ့သည်။

ကူးပါး၏ စတိုးဆိုင်တွင် သန့်ရှင်းသောTarget အတွင်းခံထုပ်များမှအစပြုကာ သစ်လွင်ပေါ့ပါးသော ဇာရာ ဝတ်စုံများ၊ ဂူချီ အဝတ်အထည်အချို့နှင့် Ferragamo ရှူးဖိနပ်များထိတိုင် ရောနှောပြသထားသည်။

သရုပ်ဆောင်များ၊ အမှုဆောင်များ၊ ရှေ့နေများ၊ စားသောက်ဆိုင်ပိုင်ရှင်များနှင့် မိခင်များအပါအဝင် လော့စ် ဆန်းဂျလိစ်တစ်ဝန်းမှ သြဇာတိက္ကမ ကြီးသူများထံမှ လှူဒါန်းမှုများနှင့် စေတနာ့ဝန်ထမ်း ပံ့ပိုးကူညီမှုများကို လက်ခံရရှိခဲ့သည်ဟု ကူးပါးက ပြောဆိုသည်။ နူးယော့ခ်ရှိ သူ၏ အိမ်ခြံမြေကွန်ရက်အေးဂျင့်သည် လက်ဆောင်ကတ်များ ပေးပို့ခဲ့သည်ဟုလည်း သူက ပြောဆိုခဲ့သည်။

Ref: Aol.