သစ်နှင့်ဝါး အလျှံပယ်ရှိသဖြင့် ပြည်တွင်းစက္ကူစက်ရုံများမှ စက္ကူများထုတ်လုပ်နိုင်ပါက အကျိုးများမည်ဟု နစက ဥက္ကဋ္ဌပြော

ပြည်တွင်း၌စက္ကူများလုံလောက်စွာထုတ်လုပ်နိုင်ရန် နိုင် ငံတော်မှဆောင်ရွက်ရန်လိုသကဲ့သို့ ပုဂ္ဂလိ ကနှင့်ပြည်ပရင်းနှီးမြှုပ်နှံမှုများကိုလည်း ဖိတ်ခေါ်ဆောင်ရွက်ရန်လိုဟု နစက ဥက္ကဋ္ဌပြော

နစက ဥက္ကဋ္ဌ၊ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်မှ နိုဝင်ဘာ ၁ ရက်မွန်းလွဲပိုင်းက နေပြည်တော်၌ပြုလုပ်သည့် ပြည်ထောင်စုအစိုးရအဖွဲ့အစည်းအဝေး အမှတ်စဥ် (၈/၂၀၂၂)သို့တက်ရောက်၍ အမှာစကားပြောကြားရာ၌ ထည့်သွင်းပြောကြားခဲ့ခြင်းဖြစ်သည်။

မိမိတို့နိုင်ငံတွင် စက္ကူလိုအပ်ချက်များရှိကာ နေ့ စဉ်ထုတ်သတင်းစာများ ရိုက်နှိပ်ထုတ်ဝေနေသ ကဲ့သို့ မဂ္ဂဇင်းများ၊ဂျာနယ်များနှင့်ကျောင်းသုံး စာအုပ်များအတွက် စက္ကူများလိုအပ်လျက်ရှိ၍ ပြည်ပမှတင်သွင်းနေရသည်ဟု ပြောသည်။

“မြန်မာနိုင်ငံမှာ စက္ကူထုတ်လုပ်နိုင်တဲ့ သစ်နဲ့ဝါးတွေ အလျှံပယ်ရှိသလို စက္ကူစက်ရုံတွေလည်းရှိပြီးဖြစ်ပါတယ် သို့သော် အကြောင်းအမျိုးမျိုးကြောင့် စက္ကူတွေထုတ်လုပ်နိုင်မှုမရှိသည်ကိုတွေ့ရပါတယ်။ နိုင်ငံမှာရှိပြီးဖြစ်တဲ့ စက္ကူစက်ရုံတွေက စက္ကူတွေထုတ်လုပ်နိုင်မယ်ဆိုရင် နိုင်ငံအတွက် များစွာအကျိုးဖြစ်ထွန်းစေမှာဖြစ်သလို စက္ကူပျော့ဖတ်တွေကိုလည်း ထုတ်လုပ်နိုင်မှာဖြစ်ပါတယ်”ဟု နစက ဥက္ကဋ္ဌကပြောသည်။

နိုင်ငံ၌ သစ်တောဖုံးလွှမ်းမှုရာခိုင်နှုန်းများ တဖြည်းဖြည်းကျဆင်းလာကာ တရားမဝင်သစ်ထုတ်လုပ်မှုများ ပိုမိုများပြားလျက်ရှိသည်ကိုတွေ့ရှိရပြီး သစ်တောများပြန်လည်ထိန်းသိမ်းဆောင်ရွက်ရန်လိုသည်ဟု ပြောသည်။

“နိုင်ငံမှာ ဝါးတောတွေအများအပြားရှိပါတယ် အဲဒီဝါးတွေကိုသုံးပြီး စက္ကူတွေကိုထုတ်လုပ်နိုင်မယ်ဆိုရင် များစွာအကျိုးရှိမှာဖြစ်ပါတယ် ပြည် နယ်နဲ့တိုင်းတွေအလိုက် ဝါးထုတ်လုပ်ရေးနဲ့ပတ် သက်ပြီး စနစ်တကျဆောင်ရွက်ကြစေလိုပါတယ် သစ်တောတွေ ပြန်လည်ဖုံးလွှမ်းရေးအတွက်လည်း ဆောင်ရွက်ကြစေလိုပါတယ်”ဟု နစက ဥက္ကဋ္ဌကပြောသည်။

သစ်တောများပြန်လည်စိုက်ပျိုးရေးအတွက် လာမည့်မိုးရာသီမှစ၍ အမျိုးသားရေးရည်မှန်းချက်အဖြစ် စီမံချက်ချမှတ်ဆောင်ရွက်ရန်လိုကာ ပြည် တွင်း၌စက္ကူများလုံလောက်စွာထုတ်လုပ်နိုင်ရန်အတွက် နိုင်ငံတော်မှဆောင်ရွက်ရန်လိုအပ်သကဲ့ သို့ ပုဂ္ဂလိကနှင့်ပြည်ပရင်းနှီးမြှုပ်နှံမှုများကိုလည်း ဖိတ်ခေါ်ဆောင်ရွက်ရန်လိုသည်ဟု ပြော သည်။

မြန်မာနိုင်ငံ၌ တစ်နှစ်လျှင်ဝါးအလုံးရေ ၂၆၅ သန်းခန့်ထုတ်လုပ်နိုင်မည်ဟု ခန့်မှန်းထားပြီး စစ်ကိုင်း၊ ပဲခူး၊ မကွေး၊ ဧရာဝတီတိုင်းနှင့်ရှမ်းပြည် နယ်(မြောက်ပိုင်း)တို့သည် ဝါးအများဆုံးထုတ် လုပ်နိုင်သည့် ဒေသများဖြစ်ကာ တစ်နိုင်ငံလုံးမှ ထွက်ရှိသည့်ဝါးများကို ပျော့ဖတ်အဖြစ်ထုတ် လုပ်ပါက ပျော့ဖတ်တန်ချိန် ၄ သန်းခန့်ရရှိနိုင်မည်ဟု ပြောသည်။

ယင်း ပျော့ဖတ်များဖြင့် နိုင်ငံအတွက်လိုအပ်သည့်စက္ကူအား လုံလောက်စွာထုတ်လုပ်နိုင်မည်ဖြစ်ကာ ပြည်ပနိုင်ငံများသို့လည်း ပျော့ဖတ်များတင်ပို့ရောင်းချနိုင်မည်ဖြစ်၍ နိုင်ငံအတွင်း တည် ဆောက်ထားရှိသည့် စက္ကူစက်ရုံများလည်ပတ် နိုင်ရန် သက်ဆိုင်ရာဝန်ကြီးဌာနများက ပူးပေါင်းတွက်ချက်ဆောင်ရွက်သွားရန်လိုအပ်သည်ဟု နစက ဥက္ကဋ္ဌကပြောသည်။