နေပြည်တော်၊သြဂုတ်-၁၅
၂၀၂၆ ခုနှစ် ဝန်ကြီးဌာနပေါင်းစုံ ဖူဆယ် (အမျိုးသား)ပြိုင်ပွဲ ဗိုလ်လုပွဲတွင် ဆောက်လုပ်ရေးဝန်ကြီးဌာနအသင်းက ကာကွယ်ရေးဝန်ကြီးဌာနအသင်းကို အချိန်ပိုတွင် ၄ ဂိုး-၃ ဂိုးဖြင့် အနိုင်ရရှိကာ ပထမဆုနှင့် တံခွန်စိုက်ဆုဖလားကို ဆွတ်ခူးရရှိခဲ့ကြောင်း သိရသည်။
ဗိုလ်လုပွဲကို ဩဂုတ် ၁၄ ရက် မွန်းလွဲပိုင်းတွင် နေပြည်တော် ဝဏ္ဏသိဒ္ဓိအားကစားကွင်းရှိ ဖူဆယ်အားကစားရုံ၌ ကျင်းပခဲ့ခြင်းဖြစ်ပြီး နှစ်သင်းစလုံး အကြိတ်အနယ် ယှဉ်ပြိုင်ခဲ့ကြသည်။
ပထမပိုင်းတွင် ကာကွယ်ရေးဝန်ကြီးဌာနအသင်းက ငြိမ်းမင်းစိုးနှင့် ထွဋ်ဝေထွန်းတို့၏ ဂိုးများဖြင့် ဦးဆောင်ခဲ့သော်လည်း ဆောက်လုပ်ရေးဝန်ကြီးဌာနအသင်းက ထွန်းအောင်ကျော်နှင့် နိုင်ထွန်းလူတို့က ချေပဂိုးများ ပြန်လည်သွင်းယူနိုင်ခဲ့သည်။
ဒုတိယပိုင်းအပြီးတွင် နှစ်သင်းစလုံး ၃ ဂိုးစီ သရေကျခဲ့သဖြင့် အချိန်ပို ၅ မိနစ် နှစ်ပိုင်း ဆက်လက်ကစားခဲ့ရာ ဆောက်လုပ်ရေးဝန်ကြီးဌာနအသင်းက အနိုင်ဂိုးသွင်းယူပြီး ၄ ဂိုး-၃ ဂိုးဖြင့် ဗိုလ်စွဲခဲ့ခြင်းဖြစ်သည်။
ဆုချီးမြှင့်ပွဲတွင် ဆောက်လုပ်ရေးဝန် ကြီးဌာနအသင်းအား ပထမဆုအဖြစ် တစ်ဦးချင်းဆုတံဆိပ်၊ ဂုဏ်ပြုဆုကြေးငွေ ကျပ်သိန်း ၁၀၀ နှင့် အမျိုးသားတံခွန်စိုက်ဆုဖလား ပေးအပ်ချီးမြှင့်ခဲ့သည်။
ကာကွယ်ရေးဝန်ကြီးဌာနအသင်းက ဒုတိယဆု၊ ပြည်ထဲရေးဝန်ကြီးဌာနနှင့် ဘဏ္ဍာရေးနှင့်အခွန်ဝန်ကြီးဌာနအသင်းတို့က ပူးတွဲတတိယဆု ရရှိခဲ့ကြသည်။
ထို့အပြင် ကာကွယ်ရေးဝန်ကြီးဌာနအသင်းမှ မင်းခန့်အောင်က အကောင်းဆုံးဂိုးသမားဆု၊ ဆောက်လုပ်ရေးဝန်ကြီးဌာနအသင်းမှ နိုင်ထွန်းလူက ပြိုင်ပွဲတစ် လျှောက် အကောင်းဆုံးအားကစားသမားဆု ရရှိခဲ့ပြီး လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနအသင်းက အသန့်ရှင်းဆုံးအသင်းဆု ရရှိခဲ့သည်။
ဝန်ကြီးဌာနပေါင်းစုံ ဖူဆယ်ပြိုင်ပွဲကို ဝန် ကြီးဌာနနှင့် အဖွဲ့အစည်းများအကြား ချစ်ကြည်ရင်းနှီးမှုနှင့် စည်းလုံးညီညွတ်မှု ပိုမိုခိုင်မာလာစေရန်၊ မြန်မာ့ဖူဆယ်အားကစား အဆင့်အတန်း တိုးတက်မြင့်မားလာစေရန် ရည်ရွယ်၍ အားကစားရေးရာဝန်ကြီးဌာန၊ အားကစားနှင့်ကာ ယပညာဦးစီးဌာနနှင့် မြန်မာနိုင်ငံဘောလုံးအဖွဲ့ချုပ် ဖူဆယ်နှင့်သဲသောင်ပြင်ဆပ်ကော်မတီတို့ ပူးပေါင်းကျင်းပခဲ့ခြင်းဖြစ်သည်။
အဆိုပါပြိုင်ပွဲကို ဩဂုတ် ၃ ရက်မှ ၁၄ ရက်အထိ ၁၂ ရက်ကြာ ကျင်းပခဲ့ပြီး ဝန်ကြီးဌာနများမှ အမျိုးသားအသင်း ၂၅ သင်း၊ အုပ်ချုပ်သူ၊ နည်းပြနှင့် အား ကစားသမား စုစုပေါင်း ၄၄၅ ဦး ပါဝင်ယှဉ်ပြိုင်ခဲ့ကြောင်း သိရသည်။
