ရှမ်းပြည်နယ်၊ ဟိုပုံးမြို့၊ ထမ်းဆန်းလှိုဏ်ဂူအနီးရှိ နန်းလုံဟွမ်တောင်ပေါ်တွင် ပွင့်နေသော သဘာဝပန်းများဆီ လာရောက်သူများပြားလွန်းသဖြင့် ထိန်းသိမ်းပေးရန် လိုအပ်လျက်ရှိနေသည်။
ထိုပန်းခင်းသည် နှစ်ပေါင်း တစ်ရာကျော်မှ တစ်ကြိမ်သာပွင့်သည့်ပန်း၊ တချို့က ဆယ်နှစ်တစ်ကြိမ်ပွင့်သည့်ပန်းစ သဖြင့်ပြောဆိုကြပြီး လာရောက် လည်ပတ်သူ ဓါတ်ပုံရိုက်ကူး သူများဖြင့် စည်ကားနေခြင်းဖြစ်ကာ လက်ရှိ၌ လူမှုကွန်ယက်ပေါ်တွင်လည်း သွားရောက်လည်ပတ်ရန် ရေပန်းစားနေသည်။
ထိုကဲ့သို့ လာရောက်သူများပြားလွန်းသည်နှင့်အညီ နောက်ဆက်တွဲအဖြစ် အချို့သောလာရောက်သူများသည် ပန်းခင်းများထဲကို ဓာတ်ပုံရိုက်ရန် တိုးဝှေ့ဝင်ရောက်ခြင်း၊ ပန်းများကို ချိုးယူခြင်း၊ အမှိုက်များ ကျန်ရှိခဲ့ခြင်းများလည်း ရှိလာနေသည်။
“အမှန်တော့ ထိုင်းကိုပဲ ကျွန်တော်တို့ ပြန်အတုယူရတော့မယ်၊ လမ်းကြောင်းတစ်ခုတည်း သတ်မှတ်ပြီး ပန်းခင်းကြီးကို လေ့လာကြည့်ရမဲ့အရာကို တောတွင်းတစ်ခုလုံး အခုက ဝင်ချင်သလိုဝင်၊ လမ်းကြောင်းအစုံဝင်ရောက်နေကြတယ်” ဟု သဘာဝခရီးသွားလုပ်ငန်းလုပ်ကိုင်သူတစ်ဦးက မှတ်ချက်ပေးသည်။
ထိုကဲ့သို့ဝင်ရောက်ခြင်းကြောင့်လည်း ထိုတောင်ကြော ပန်းခင်းရှိ ဒေသနေတိရစ္ဆာန်များအတွက် အကျိုးဆိုးနှင့် အပင်ဂေဟစနစ်လည်ပတ်မှု ပျ-က်စီးခြင်းတို့ ဖြစ်ပေါ်လာနိုင်ကြောင်းလည်း မျှဝေနေကြသည်။
ပန်းခင်းနာမည်ကြီးပြီးနောက် ဩဂုတ်လ ၂၂ ရက် လကွယ်နေ့ကစတင်ကာ လာရောက်လည်ပတ်သူ များပြားခဲ့ပြီး ထမ်းဆန်း ရွှေတိဂုံဘုရားလမ်းဆုံမှ တစ်မိုင်ကျော်အထိ တစ်ဖက်တွင်လည်း ထမ်းဆန်းဂူ သွားရာလမ်းအထိ လွိုင်လင်သွားလမ်းတစ်လျှောက် ကားတန်းကြီး ပိ-တ်ဆို့နေခဲ့ကြောင်း သိရသည်။
“အဲတောင်က ဘယ်သူမှ မပိုင်ဘူးဆိုလည်း စနစ်တကျ မလုပ်တတ်ရင် ဘာပေါ်လာပေါ်လာ Tourismနဲ့ ရပ်တည်လို့ရမယ့် နိုင်ငံဖြစ်လာမှာမဟုတ်ဘူး” ဟု ခရီးသွားလမ်းညွှန်တစ်ဦးကလည်း ပေါ်ပြူလာနယူးကို မှတ်ချက်ပေးသည်။
လက်ရှိ၌” နောက်ရက်ဆိုရင် ပန်းတောင်ကျန်ပါ့တော့မလား မသိဘူး။ ပြောမရဘူး၊ ဘယ်သူမှ မပိုင်ဘူးလေ။ တောင်ပေါ်မှ အလေ့ကျပေါက်တဲ့ ပန်းဆိုတော့ လူတိုင်းပန်းမျိုးကို ခူးပြန်နေကြတာ အများကြီးပဲ” ဟု သွားရောက်ခဲ့သူတစ်ဦးကလည်း ပြောသည်။
ထို့ကြောင့် သွားရောက်လည်ပတ်သူများအနေဖြင့် ပန်းများမခူးကြရန်၊ လမ်းကြောင်းအသစ်များမလုပ်ကြရန်၊ အမှိုက်များမထားခဲ့ရန် အထူးလိုအပ်လျက်ရှိနေကြောင်းလည်း လူမှုကွန်ယက်တွင် ပြန်လည်မျှဝေနေကြသည်။