လူကုန်ကူးခံရသောတရုတ်သရုပ်ဆောင်ထိုင်းသို့ထပ်လာဦးမည်ဟုကတိပြု

မြန်မာနိုင်ငံဘက်သို့ လူကုန်ကူးခံရခြင်းမှ ယခုသီတင်းပတ်တွင် ပြန်ကယ်တင်ပေးခဲ့ရသည့် တရုတ်လူမျိုး သရုပ်ဆောင်က သူ့အနေဖြင့် ထိုင်းနိုင်ငံနှင့်ပတ်သက်၍ စိုးရိမ်ပူပန်ခြင်းမရှိကြောင်းနှင့် ထိုင်းနိုင်ငံသို့ ထပ်မံလာရောက်ဦးမည်ဖြစ်ကြောင်း ရဲတပ်ဖွဲ့ကို ပြောကြားသွားသည်ဟု အကြီးတန်းရဲအရာရှိတစ်ဦးက ပြောဆိုသည်။

လေးရက်ကြာ ဒုက္ခကြုံခဲ့ရသော ရှင်းရှင်းဟုလည်း သိကြသည့် ဝမ်ရှင်းသည် စိတ်ပိုင်းဆိုင်ရာ၌ ပုံမှန်အခြေအနေတွင်ရှိနေသည်ဟု ထိုင်းတော်ဝင်ရဲတပ်ဖွဲ့၏ ရဲချုပ် ရဲဗိုလ်ချုပ်ကြီး သက်ချိုင်း ဖိတာနီးလာဘတ်က ဗုဒ္ဓဟူးနေ့တွင် ပြောဆိုခဲ့သည်။

“ရှင်းရှင်းက အိမ်ပြန်ချင်ပါတယ်၊ သူ့အနေနဲ့ အထူးတလည်တောင်းဆိုတာမျိုးတော့ မရှိပါဘူး၊ ထိုင်းနိုင်ငံနဲ့ပတ်သက်လို့ သူ စိုးရိမ်မှုမရှိပါဘူး၊ နောက်တစ်ကြိမ် ထပ်လာဦးမယ်လို့ ပြောသွားပါတယ်” ဟု ရဲဗိုလ်ချုပ်ကြီး သက်ချိုင်းက ပြောကြားခဲ့သည်။

အင်္ဂါနေ့က တာ့ခ်ပြည်နယ်သို့ ပြန်လည်ရောက်ရှိလာသည့် ရှင်းရှင်းကို စစ်ဆေးမေးမြန်းမှုများလုပ်ခဲ့ပြီးနောက် သူသည် လူကုန်ကူးခံရခြင်းဖြစ်သည်ဟု ရဲတပ်ဖွဲ့က ကောက်ချက်ချခဲ့ကာ စုံစမ်းစစ်ဆေးမှုများကို တိုးချဲ့ဆောင်ရွက်ခဲ့သည်။ လက်ရှိအထိ စုစည်းရရှိထားမှုများအရ ဖြစ်စဉ်တွင် ထိုင်းလူမျိုးများ ပါဝင်ပတ်သက်ခြင်းမရှိဟု သူက ပြောဆိုခဲ့သည်။

ဖုန်းမှတ်တမ်းအချက်အလက်များအရ သူသည် အိမ်နီးချင်း(မြန်မာ)နိုင်ငံတွင် သရုပ်ဆောင်အလုပ်တစ်ခုအတွက် ဖိတ်ခေါ်ခံခဲ့ခြင်းဖြစ်သော်လည်း နယ်စပ်ကိုဖြတ်၍ ရောက်ရှိသွားချိန်တွင် သရုပ်ဆောင် အလုပ် မဟုတ်သော အခြားအလုပ်တစ်ခုအတွက် ခိုင်းစေခံခဲ့ရသည်ဟု ရဲဗိုလ်ချုပ်ကြီး သက်ချိုင်းက ပြောဆိုခဲ့သည်။

သရုပ်ဆောင်ရှင်းရှင်းထံမှ ရရှိသော သတင်းအချက်အလက်များအရ နောက်ထပ် လူကုန်ကူးခံရသူများစွာရှိနေသည်ဟု ထိုင်းရဲက ယုံကြည်ထားသည်ဟု သူက ပြောဆိုခဲ့သည်။

သူ့ကို ကရင်နယ်ခြားစောင့်တပ်က ထိန်းချုပ်ထားသည့် နယ်မြေ ဖြစ်သော မြဝတီမြို့ရှိ တရုတ်အွန်လိုင်းငွေလိမ်ဂိုဏ်းတစ်ခုက ဖမ်းဆီးခေါ်ဆောင်သွားခြင်းဖြစ်သည်ဟု ထိုင်းရဲက ယုံကြည်ထားကြောင်းလည်း သိရသည်။

Ref: ဘန်ကောက်ပို့စ်