လီဆာ၏ ပုံရိပ်ဖြင့် ထိုင်းသစ်သီးဝလံများကို နိုင်ငံတကာအရောင်းမြှင့်တင်ရန် တောင်းဆို

ထိုင်းသစ်သီးဝလံများကို နိုင်ငံတကာတွင် အရောင်းမြှင့်တင်ရေးလှုပ်ရှားမှုတွင် ထိုင်းနိုင်ငံဖွား ကေပေါ့ပ်နာမည်ကျော် လာလီဆာ လီဆာမန်နိုဘောလ်ကို ထည့်သွင်းပေးရန် ဒေသတွင်း သစ်သီးစိုက်တောင်သူများက ဝန်ကြီးချုပ် ပေတုံတန်ရှင်နာဝပ်ထရာကို တောင်းဆိုခဲ့ကြသည်။

စနေနေ့က သူ၏ချန်သာဘူရီပြည်နယ် ခရီးစဉ်အတွင်း မစ္စပေတုံတန်သည် အရှေ့ပိုင်းဒေသမှ သစ်သီးစိုက်ပျိုးသူများ၊ လုပ်ငန်းရှင်များနှင့် တွေ့ဆုံခဲ့ရာတွင် ထုတ်လုပ်မှု ကုန်ကျစရိတ်များ မြင့်တက်လာခြင်း၊ တင်ပို့မှု နှောင့်နှေးကြန့်ကြာခြင်းနှင့် လုပ်သားရှားပါးခြင်းတို့ အပါအဝင် စိုးရိမ်ပူပန်မှုများကို ၎င်းတို့က ထုတ်ဖော်ပြောဆိုခဲ့ကြသည်။ အဆိုပါ စိန်ခေါ်မှုများကို အစိုးရက ကူညီဖြေရှင်းပေးနိုင်မည့် နည်းလမ်းများကို ၎င်းတို့က အဆိုပြုတင်ပြခဲ့ကြသည်။

ထင်ရှားသော အဆိုပြုချက်များအနက်တစ်ခုမှာ သစ်သီးဝလံများ အရောင်းမြှင့်တင်ရေး ကြိုးပမ်းမှုများတွင် လီဆာကို ဦးဆောင်ပါဝင်စေရန် ဖိတ်ခေါ်ပေးရေးဖြစ်သည်။ သူ၏ နိုင်ငံတကာသို့ လွှမ်းမိုးသောပုံရိပ်သည် ထိုင်းသစ်သီးဝလံများကို ဈေးကွက်သစ်များသို့ အထူးသဖြင့် တရုတ်နိုင်ငံသို့ ဈေးကွက်ချဲ့ထွင် တင်ပို့နိုင်ရေးတွင် အထောက်အကူပြုနိုင်သည်ဟု စိုက်ပျိုးသူများက ယုံကြည်ကြသည်။

ယင်း လှုပ်ရှားမှုအရ နှစ်စဉ် ထိုင်းသစ်သီးဝလံတင်ပို့မှုကို လက်ရှိ ဘတ် ၂၀၀ မှ ၃၀၀ ဘီလျံရှိနေရာမှ ဘတ် ၅၀၀ ဘီလျံအထိ တိုးမြှင့်နိုင်ရန် မျှော်လင့်ထားသည်။

တင်ပို့မှုများသည် ၁၂ ရက်အထိ နှောင့်နှေးကြန့်ကြာမှုများနှင့် ကြုံရသည့် နယ်စပ်စစ်ဆေးရေးဂိတ်များ၏ အကောက်ခွန်ကိစ္စများကို ပိုမိုပြန်ဆန်စေရေး ဆောင်ရွက်ပေးရန်လည်း စိုက်ပျိုးသူများက တောင်းဆိုခဲ့သည်။

နောက်ထပ် အဓိကစိုးရိမ်စရာတစ်ခုမှာ လုပ်သားရှားပါးမှုဖြစ်သည်။ ယင်းကိစ္စနှင့်ပတ်သက်၍ ရွှေ့ပြောင်းလုပ်သားများကို အလုပ်လုပ်ခွင့် သက်တမ်းတိုးပေးရန်ှနှင့် ၎င်းတို့ကို ပြည်နယ်တစ်ခုမှ တစ်ခုသို့ ပြောင်းရွှေ့လုပ်ကိုင်ခွင့်ပေးရန် စိုက်ပျိုးသူများက အဆိုပြုခဲ့သည်။ တောဆင်ကျူးကျော်မှုများကြောင့် ထိခို-က်ခဲ့သော ဒူးရင်းစိုက်ပျိုးသူများနှင့် ဒေသခံများအတွက် ဘတ်သန်း ၁၀၀ လျော်ကြေးငွေကိုလည်း ၎င်းတို့က တောင်းဆိုခဲ့သည်။

ယင်းအဆိုပြုချက်များနှင့် ပတ်သက်၍ အစိုးရသည် ပိုလျှံထွက်ကုန်များကို ဝယ်ယူရန်နှင့် အလေအလွင့်ဖြစ်မှုများ လျှော့ချနိုင်ရန် ကုမ္ပဏီများနှင့် ပူးပေါင်းဆောင်ရွက်နေကြောင်း မစ္စပေတုံတန်က ပြောကြားခဲ့သည်။

ထို့အပြင် ပို့ကုန်လုပ်ထုံးလုပ်နည်းများကို မြန်ဆန်လာ‌စေရန် ကတိပြုခဲ့ကာ စိုက်ပျိုးရေးကဏ္ဍတွင် လုပ်သားရှားပါးမှုကို ကိုင်တွယ်ဖြေရှင်းရန် အလုပ်သမားဝန်ကြီးဌာနကို ညွှန်ကြားထားပြီးဖြစ်ကြောင်း အတည်ပြုခဲ့သည်။

Ref: ဘန်ကောက်ပို့စ်