မြန်မာနိုင်ငံတောင်ပိုင်းရှိ ပြည်နယ်နှင့်တိုင်းဒေသကြီးများတွင် ခရမ်းလွန်ရောင်ခြည် (UV Index) ၁၁ အထက်အထိ မြင့်တက်နိုင်ကြောင်း မိုးလေဝသပညာရှင် ဦးဝင်းနိုင်၏ ခန့်မှန်းချက်များအရ သိရသည်။
UV11+ အဆင့်ထိရောက်နိုင်သော ဒေသများတွင် တနင်္သာရီတိုင်းဒေသကြီး၊ မွန်ပြည်နယ်၊ ကရင်ပြည်နယ်၊ ဧရာဝတီတိုင်းဒေသကြီး၊ ရန်ကုန်တိုင်းဒေသကြီးနှင့် ပဲခူးတိုင်းဒေသကြီးတို့ ပါဝင်ကြောင်း သိရသည်။
ရန်ကုန်တိုင်းဒေသကြီးအတွင်းတွင်လည်း တာမွေ၊ အင်းစိန်၊ သင်္ဃန်းကျွန်း၊ မြောက်ဥက္ကလာ၊ ရန်ကင်း၊ မရမ်းကုန်း၊ မင်္ဂလာဒုံနှင့် ထောက်ကြန့် စသည့် မြို့နယ်များတွင် ခရမ်းလွန်ရောင်ခြည် အလွန်ပြင်းထန်နေကြောင်း သိရသည်။
ထို့ကြောင့် နေ့လယ်အပူချိန်အမြင့်ဆုံးအချိန်များတွင် အပြင်ထွက်ခြင်းကို လျှော့ချရန်နှင့် မဖြစ်မနေထွက်ရပါက ထီး၊ ဦးထုတ်၊ နေကာမျက်မှန်များ အသုံးပြုခြင်းနှင့် နေရောင်ကာခရင်မ် လိမ်းထားခြင်းတို့ လိုအပ်ကြောင်း အကြံပြုထားသည်။
ထို့အပြင် ဧပြီလ ၅ ရက်နေ့ မြန်မာစံတော်ချိန် နံနက် ၁၀ နာရီခွဲ အချိန်အထိ update အရ ချောက်၊ မုံရွာ၊ မကွေး၊ ရွှေဘို၊ မင်းဘူး၊ မန္တလေး၊ စစ်ကိုင်း၊ တောင်ငူနှင့် မိတ္ထီလာ မြို့များသည် ကမ္ဘာပေါ်ရှိ အပူဆုံးမြို့ ၁၅ မြို့စာရင်းအတွင်း ပါဝင်နေကြောင်း သိရသည်။
တာဝန်ရှိသူများနှင့် ကျန်းမာရေးပညာရှင်များက ပြည်သူများအား နေရောင်အန္တရာယ်မှ ကာကွယ်နိုင်ရန် သတိပြုနေထိုင်ကြရန် တိုက်တွန်းထားသည်။