ဂျပန်၊ စက်တင်ဘာ ၁၆
ဂျပန်ဘောလုံးအဖွဲ့ချုပ် (JFA) ၏ ဖိတ်ကြားချက်ဖြင့် ဂျပန်နိုင်ငံ နီဂါတာ၌ ကျင်းပမည့် (၂၈) ကြိမ်မြောက် International Youth Soccer in Niigata ပြိုင်ပွဲသို့ မြန်မာ U-17 အမျိုးသားလက်ရွေးစင်အသင်း ဝင်ရောက်ယှဉ်ပြိုင်မည်ဖြစ်ပြီး ကမ္ဘာ့ဖလားပြိုင်ပွဲဝင် ဂျပန်နှင့် နယူးဇီလန် U-17 အသင်းတို့နှင့်ပါ ယှဉ်ပြိုင်ရမည်ဖြစ်ကြောင်း သိရသည်။
ပြိုင်ပွဲကို စက်တင်ဘာ ၁၇ ရက်မှ ၂၁ ရက်အထိ ပတ်လည်စနစ်ဖြင့် ကျင်းပမည်ဖြစ်ပြီး မြန်မာ U-17၊ အိမ်ရှင် ဂျပန် U-17၊ နယူးဇီလန် U-17 နှင့် နီဂါတာဒေသရွေးချယ်အသင်းတို့ ပါဝင်ယှဉ်ပြိုင်ကြမည်ဖြစ်သည်။
မြန်မာ U-17 အသင်းသည် စက်တင်ဘာ ၁၇ ရက်တွင် ဂျပန် U-17 အသင်း၊ စက်တင်ဘာ ၁၉ ရက်တွင် နယူးဇီလန် U-17 အသင်းနှင့် စက်တင်ဘာ ၂၁ ရက်တွင် နီဂါတာဒေသရွေးချယ်အသင်းတို့ကို အသီးသီး ယှဉ်ပြိုင်ရမည်ဖြစ်သည်။
ယင်းပြိုင်ပွဲတွင် မြန်မာအသင်းအနေဖြင့် 2026 FIFA U-17 World Cup ပြိုင်ပွဲဝင် ဂျပန်နှင့် နယူးဇီလန် U-17 အသင်းတို့နှင့် ယှဉ်ပြိုင်ခွင့်ရရှိမည်ဖြစ်သဖြင့် နိုင်ငံတကာပြိုင်ပွဲအတွေ့အကြုံ ရရှိနိုင်မည့် အခွင့်အရေးတစ်ရပ်လည်း ဖြစ်လာမည်ဖြစ်သည်။
ထို့ပြင် အိမ်ရှင် ဂျပန် U-17 အသင်းအတွက် ပြိုင်ဆိုင်မှု ပိုမိုမြင့်မားစေရန် မြန်မာ U-17 အသင်း၌ U-19 ကစားသမား ငါးဦးအထိ ပေါင်းစပ်အသုံးပြုခွင့် ပြုထားကြောင်း သိရသည်။
မြန်မာ U-17 အသင်းကို ဂျပန်လူမျိုးနည်းပြ Ryuji Sueoka က နည်းပြချုပ်အဖြစ် ကိုင်တွယ်မည်ဖြစ်ပြီး မြန်မာ့လက်ရွေးစင်ကစားသမားဟောင်း ဦးရန်ပိုင်က အသင်းအုပ်ချုပ်သူအဖြစ် တာဝန်ယူမည်ဖြစ်ကြောင်း သိရသည်။