UFC ဖလိုင်းဝိတ်တန်း ကမ္ဘာ့ချန်ပီယံခါးပတ်အတွက် လက်ရှိချန်ပီယံ ဂျော့ရှူးဝါးဗန် (Joshua Van) နှင့် ဘရာဇီးနိုင်ငံသား ချန်ပီယံဟောင်း အလက်ဇန်းဒါး ပန်တိုဂျာ (Alexandre Pantoja) တို့၏ မကျေပွဲ (Rematch) ကို စက်တင်ဘာ ၁၉ ရက်တွင် အမေရိကန်နိုင်ငံ၊ လော့စ်အိန်ဂျလိစ်မြို့၌ ကျင်းပမည်ဖြစ်သည်။
အဆိုပါပွဲကို လော့စ်အိန်ဂျလိစ်မြို့ရှိ Crypto.com Arena ၌ ကျင်းပမည့် UFC 331 ပြိုင်ပွဲ၏ ခေါင်းတွဲဆိုင်း (Main Event) အဖြစ် ထည့်သွင်းကျင်းပမည်ဖြစ်ပြီး ကစားသမားနှစ်ဦးစလုံး လော့စ်အိန်ဂျလိစ်သို့ ရောက်ရှိနေပြီဖြစ်ကြောင်း UFC ၏ Fight Week အစီအစဉ်များအရ သိရသည်။
၎င်းတို့နှစ်ဦးသည် ပြီးခဲ့သည့် UFC 323 ပြိုင်ပွဲတွင် ပထမဆုံးအကြိမ် တွေ့ဆုံခဲ့ကြပြီး ပွဲစတင်ပြီး ၂၆ စက္ကန့်အကြာတွင် ပန်တိုဂျာ လက်မောင်းဒ-ဏ်ရာရရှိခဲ့သဖြင့် ဂျော့ရှူးဝါးဗန်က TKO ဖြင့် အနိုင်ရကာ ဖလိုင်းဝိတ်တန်း ကမ္ဘာ့ချန်ပီယံခါးပတ်ကို ရယူခဲ့ခြင်းဖြစ်သည်။
အသက် ၂၄ နှစ်အရွယ် ဂျော့ရှူးဝါးဗန်သည် ယင်းနောက် မေလက ကျင်းပခဲ့သည့် UFC 328 ပြိုင်ပွဲတွင် ဂျပန်ဖို-က်တာ တတ်ဆူရို တိုင်ရာ (Tatsuro Taira) ကို ပဉ္စမအချီ TKO ဖြင့် အနိုင်ယူကာ ချန်ပီယံခါးပတ်ကို ပထမဆုံးအကြိမ် အောင်မြင်စွာ ကာကွယ်ထားနိုင်ခဲ့သည်။
အသက် ၃၆ နှစ်အရွယ် ပန်တိုဂျာသည် ဂျော့ရှူးဝါးဗန်နှင့် မတွေ့ဆုံမီ ဖလိုင်းဝိတ်ချန်ပီယံခါးပတ်ကို လေးကြိမ်အထိ အောင်မြင်စွာ ကာကွယ်ထားနိုင်ခဲ့သူဖြစ်ပြီး ယခုပွဲတွင် ချန်ပီယံခါးပတ် ပြန်လည်ရယူနိုင်ရေး ကြိုးပမ်းမည်ဖြစ်သည်။
UFC 331 ပြိုင်ပွဲကို စက်တင်ဘာ ၁၉ ရက်တွင် လော့စ်အိန်ဂျလိစ်မြို့ Crypto.com Arena ၌ ကျင်းပမည်ဖြစ်ပြီး ဂျော့ရှူးဝါးဗန်နှင့် ပန်တိုဂျာတို့၏ ဖလိုင်းဝိတ်ချန်ပီယံ မကျေပွဲကို Main Event အဖြစ် ကျင်းပသွားမည်ဖြစ်သည်။