မနီလာ၊ ဇူလိုင် ၂၂
မြန်မာနိုင်ငံနှင့်ပတ်သက်၍ ကာလကြာရှည် ရပ်တန့်နေသည့် အာဆီယံ၏ အချက်ငါးချက်ပါ ဘုံသဘောတူညီချက် (Five-Point Consensus) ကို ပိုမိုထိရောက်စွာ အကောင်အထည်ဖော်နိုင်ရေးအတွက် မြန်မာ့အရေးတိုးတက်မှုကို တိုင်းတာမည့် စံနှုန်းများ ချမှတ်ရေးနှင့် ရေရှည်တာဝန်ထမ်းဆောင်မည့် အထူးသံတမန်တစ်ဦး ခန့်အပ်ရေးဆိုင်ရာ ဆွေးနွေးမှုများကို စတင်ရန် အာဆီယံနိုင်ငံခြားရေးဝန်ကြီးများက ဇူလိုင် ၂၁ ရက်တွင် သဘောတူညီခဲ့ကြောင်း သိရသည်။
အဆိုပါ အဆိုပြုချက်များကို မနီလာမြို့တွင် ကျင်းပသည့် (၅၉) ကြိမ်မြောက် အာဆီယံနိုင်ငံခြားရေးဝန်ကြီးများအစည်းအဝေး၏ ပြင်ပ၌ ပြုလုပ်သည့် မြန်မာ့အရေး အလွတ်သဘော တိုင်ပင်ဆွေးနွေးပွဲတွင် ဆွေးနွေးခဲ့ခြင်းဖြစ်ပြီး၊ နိုဝင်ဘာလတွင် ကျင်းပမည့် အာဆီယံထိပ်သီးအစည်းအဝေးသို့ မတင်ပြမီ အကြီးတန်းအရာရှိများက ဆက်လက်ညှိနှိုင်း ပြင်ဆင်သွားမည်ဖြစ်ကြောင်း ဖိလစ်ပိုင်နိုင်ငံခြားရေးဝန်ကြီး မာသီရိဆာ လာဇာရို က ပြောကြားခဲ့သည်။
ယင်းဆွေးနွေးမှုများသည် ဇူလိုင် ၁၂ ရက်က ဘန်ကောက်မြို့တွင် အာဆီယံနိုင်ငံခြားရေးဝန်ကြီးများနှင့် မြန်မာနိုင်ငံခြားရေးဝန်ကြီးတို့အကြား ပြုလုပ်ခဲ့သည့် အလွတ်သဘောတွေ့ဆုံမှု၏ နောက်ဆက်တွဲအဖြစ် ဆောင်ရွက်ခြင်းဖြစ်ကြောင်း သိရသည်။
ဝန်ကြီးများသည် မြန်မာ့အရေး တိုးတက်မှုကို အကဲဖြတ်နိုင်မည့် အာဆီယံမူဘောင်တစ်ရပ် ဖန်တီးရေးနှင့် နှစ်စဉ်အလှည့်ကျ တာဝန်ယူသည့်စနစ်အစား ရေရှည်တာဝန်ထမ်းဆောင်မည့် အထူးသံတမန်တစ်ဦး ခန့်အပ်ရေး အဆိုပြုချက်များကို ပြန်လည်သုံးသပ်ခဲ့ကြသည်။
“ဒီကိစ္စဟာ နိုဝင်ဘာလမှာ ကျင်းပမယ့် အာဆီယံခေါင်းဆောင်များအစည်းအဝေးမှာ ထည့်သွင်းစဉ်းစားရမယ့် အရေးကြီးအချက်ဖြစ်တဲ့အတွက် အကြီးတန်းအရာရှိတွေကို အသေးစိတ် ဆွေးနွေးပြင်ဆင်ဖို့ တာဝန်ပေးထားပါတယ်” ဟု အာဆီယံဥက္ကဋ္ဌ၏ မြန်မာနိုင်ငံဆိုင်ရာ အထူးသံတမန်အဖြစ်လည်း တာဝန်ထမ်းဆောင်နေသည့် လာဇာရိုက ပြောကြားခဲ့သည်။
ထို့ပြင် အထူးသံတမန်၏ လုပ်ငန်းတာဝန်များကို အထောက်အကူပြုနိုင်ရန် အာဆီယံအတွင်းရေးမှူးချုပ်ရုံးအတွင်း အထူးယူနစ်တစ်ခု ဖွဲ့စည်းရန် ဘရူနိုင်းနိုင်ငံက အဆိုပြုထားသော်လည်း ရန်ပုံငွေနှင့် လုပ်ငန်းလည်ပတ်ရေးဆိုင်ရာ ကိစ္စရပ်များကို ဆက်လက်ညှိနှိုင်းရန် လိုအပ်နေသေးကြောင်းလည်း ၎င်းက ပြောကြားခဲ့သည်။
မနီလာမြို့၌ စုဝေးရောက်ရှိနေသည့် အာဆီယံနိုင်ငံခြားရေးဝန်ကြီးများသည် အမေရိကန်၊ တရုတ်၊ ရုရှားတို့အပါအဝင် အဓိကမိတ်ဖက်နိုင်ငံများနှင့်လည်း တွေ့ဆုံဆွေးနွေးမည်ဖြစ်ပြီး ပထဝီနိုင်ငံရေးယှဉ်ပြိုင်မှုများ၊ တောင်တရုတ်ပင်လယ်အရေး၊ မြန်မာ့အရေးနှင့် အရှေ့အလယ်ပိုင်းပဋိပက္ခများ အပါအဝင် ဒေသတွင်းနှင့် နိုင်ငံတကာ အရေးကိစ္စများကို ဆွေးနွေးလျက်ရှိကြောင်း သိရသည်။
Ref: The Straits Times