မြန်မာနိုင်ငံ၏ (၁၁)ဦးမြောက် နိုင်ငံတော်သမ္မတရွေးချယ်ရန် အမည်စာရင်းတင်သွင်းခြင်းကို မတ်လ ၃၀ရက် ယနေ့တွင် ပြည်ထောင်စုလွှတ်တော်၌ အဆိုပြုတင်သွင်းမည်ဖြစ်သည်။
နိုင်ငံတော်သမ္မတလောင်းအမည်စာရင်းကို အမျိုးသားလွှတ်တော်၊ ပြည်သူ့လွှတ်တော်နှင့် တပ်မတော်သား ကိုယ်စားလှယ်များမှ တစ်ဦးစီ တင်သွင်းမည်ဖြစ်သည်။
ထို့နောက် ပြည်ထောင်စုလွှတ်တော်တွင် သမ္မတရွေးချယ်တင်မြှောက်ရေးအဖွဲ့၏ ကော်မတီ (၃) ခုမှ တဆင့် သမ္မတလောင်းများကို ရွေးချယ်မည်။
သမ္မတရွေးချယ်တင်မြှောက်ရေးအဖွဲ့သည် ပြည်ထောင်စုလွှတ်တော်တွင် လွှတ်တော်ကိုယ်စားလှယ်များ မဲပေးရွေးချယ်စေကာ မဲအများဆုံးရရှိသည့် သမ္မတလောင်းကို နိုင်ငံတော်သမ္မတအဖြစ် တင်မြှောက်ကာ ကျန်နှစ်ဦးအား ဒုတိယ သမ္မတများအဖြစ် ခန့်အပ်မည်။
မြန်မာနိုင်ငံတွင် လွတ်လပ်ရေးရရှိခဲ့သည့် ၁၉၄၈ ခုနှစ်မှစတင်ကာ နိုင်ငံတော် သမ္မတအဖြစ် စဝ်ရွှေသိုက်၊ ဒေါက်တာဘဦး၊ မန်းဝင်းမောင်၊ ဦးနေဝင်း၊ ဦးစန်းယု၊ ဦးစိန်လွင်၊ ဒေါက်တာမောင်မောင်၊ ဦးသိန်းစိန်၊ ဦးထင်ကျော်၊ ဦးဝင်းမြင့်တို့မှ တာဝန်ယူဆောင်ရွက်ခဲ့ကြသည်။
နိုင်ငံတော်သမ္မတခေါင်းစဥ်ဖြင့် မဟုတ်သော်လည်း နိုင်ငံ့အကြီးအကဲများအဖြစ် ဗိုလ်ချုပ်မှူးကြီး စောမောင် (နိုင်ငံတော် ငြိမ်ဝပ်ပိပြားမှု တည်ဆောက်ရေးအဖွဲ့ ဥက္ကဌ)က ၁၉၈၈ စက်တင်ဘာ ၁၈ မှ ၁၉၉၂ ဧပြီ ၂၃ ထိ ၃ နှစ် ၂၁၈ ရက်၊ ဗိုလ်ချုပ်မှူးကြီးသန်းရွှေက (နိုင်ငံတော် ငြိမ်ဝပ်ပိပြားမှု တည်ဆောက်ရေးအဖွဲ့ ဥက္ကဌအဖြစ်) ၁၉၉၂ ဧပြီ ၂၃ မှ ၁၉၉၇ နိုဝင်ဘာ ၁၅ ထိ၅ နှစ် ၂၀၆ ရက်၊ (နိုင်ငံတော် အေးချမ်းသာယာရေးနှင့် ဖွံ့ဖြိုးရေးကောင်စီဥက္ကဋ္ဌအဖြစ်) ၁၉၉၇ နိုဝင်ဘာလ ၁၅ ရက်နေ့မှ မှ ၂၀၁၁ မတ်လ ၃၀ ရက်နေ့အထိ ၁၃ နှစ် ၁၃၅ ရက် တာဝန်ယူခဲ့သည်။ ဗိုလ်ချုပ်မှုးကြီးမင်းအောင်လှိုင်က ၂၀၂၁ ခုနှစ် ဖေဖော်ဝါရီလ ၁ ရက် နေ့မှယနေ့အထိ တာဝန်ယူ ဆောင်ရွက်လျက်ရှိသည်။
နိုင်ငံတော်ယာယီသမ္မတများအဖြစ် ဦးအေးကိုက ၁၉၈၈ (ဩဂုတ်လ ၁၂ ရက်နေ့ မှ ၁၉ရက်နေ့) အထိ ၇ ရက်တာဝန်ယူခဲ့သည်။ဦးမြင့်ဆွေက ၂၀၁၈ ခုနှစ် (မတ်လ ၂၁ ရက်နေ့ မှ ၃၀ရက်နေ့) အထိ၉ ရက် ပထမအကြိမ်၊၂၀၂၁ ခုနှစ်မှ ၂၀၂၄ ခုနှစ်အထိ ဒုတိယအကြိမ် အဖြစ် ၃နှစ်နှင့် ၁၇၂ ရက် တာဝန်ထမ်းဆောင်ခဲ့သည်။ ၂၀၂၄ ခုနှစ်မှ လက်ရှိအချိန်ထိ နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်က တာဝန်ယူဆောင်ရွက်လျက်ရှိသည်။