မြန်မာနိုင်ငံအတွင်း ပဋိပက္ခနှင့် နေရပ်စွန့်ခွာရမှုဒဏ်ကို ပြင်းထန်စွာ ခံစားနေရသည့် အမျိုးသမီးများနှင့် မိန်းကလေးငယ်များအတွက် ရည်ရွယ်ပြီး ကုလသမဂ္ဂလူဦးရေရန်ပုံငွေအဖွဲ့ (UNFPA) က ယူရို (၁ဒသမ၃) သန်း ကူညီမည်ဖြစ်ကြောင်း ယမန်နေ့ မေလ ၂၁ ရက်နေ့က ထုတ်ပြန်ထားသည်။
“Safe and Whole” (ဘေးကင်းလုံခြုံပြီး ပြည့်စုံအသက်ဝင်စေဖို့) ဟု အမည်ပေးထားသည့် အဆိုပါစီမံကိန်းကို ဥရောပသမဂ္ဂ လူသားချင်းစာနာထောက်ထားမှုဆိုင်ရာ အကူအညီပေးရေးအဖွဲ့ (EU Humanitarian Aid) က ယူရို ၁ ဒသမ ၃ သန်း (EUR 1.3 million) ပံ့ပိုးကူညီထားခြင်း ဖြစ်ကြောင်း အသိပေးထုတ်ပြန်ထားသည်။
စီမံကိန်းကာလအတွင်း စစ်ကိုင်းတိုင်းဒေသကြီး၊ ပဲခူးတိုင်းဒေသကြီး (အရှေ့ပိုင်း)၊ ချင်းပြည်နယ်၊ ရခိုင်ပြည်နယ်နှင့် ကချင်ပြည်နယ်တို့ရှိ အကျပ်အတည်းဒဏ်ခံ ပြည်သူစုစုပေါင်း ၈၄,၄၇၁ ဦး (ယင်းအနက် ၇၅,၃၈၁ ဦးမှာ အမျိုးသမီးများနှင့် မိန်းကလေးငယ်များထံ အကူညီများပေးမည်ဖြစ်ကြောင်း သိရသည်။
လက်ရှိတွင် မြန်မာနိုင်ငံတစ်ဝန်း၌ ဖြစ်ပွားနေသော ပဋိပက္ခများ၊ မလုံခြုံမှုများနှင့် ဝန်ဆောင်မှုလမ်းကြောင်းများ ပြတ်တောက်နေမှုကြောင့် ကိုယ်ဝန်ဆောင်မိခင်များအနေဖြင့် ဘေးကင်းစိတ်ချရသော မီးဖွားခြင်းဝန်ဆောင်မှုများ ရရှိရန် ရုန်းကန်နေရပြီး၊ ကျား၊ မ အခြေပြု အကြမ်းဖက်မှု (GBV) မှ လွတ်မြောက်လာသူများအနေဖြင့်လည်း လျှို့ဝှက်စိတ်ချရသော ကူညီပံ့ပိုးမှုများ ရယူနိုင်ရန် အတားအဆီးများနှင့် ရင်ဆိုင်နေရကြောင်း ထုတ်ပြန်ဖန်ချက်တွင် ဖော်ပြထားသည်။
ယခုစီမံကိန်းမှတစ်ဆင့် UNFPA နှင့် မိတ်ဖက်အဖွဲ့အစည်းများသည် ဘေးကင်းသော ကိုယ်ဝန်ဆောင်စောင့်ရှောက်မှု၊ မိသားစုစီမံကိန်း၊ မရှိမဖြစ်လိုအပ်သော မျိုးပွားကျန်းမာရေးသုံးပစ္စည်းများ ဖြန့်ဝေခြင်း၊ အကြမ်းဖက်ခံရသူများအတွက် ဆေးဝါးကုသမှုပေးခြင်း၊ စိတ်ပိုင်းဆိုင်ရာနှင့် လူမှုရေးဆိုင်ရာ ပံ့ပိုးကူညီမှု (Psychosocial Support) ပေးခြင်း၊ ဂုဏ်သိက္ခာထိန်းသိမ်းမှုဆိုင်ရာ အသုံးအဆောင်ပစ္စည်းများ (Dignity Kits) ထောက်ပံ့ခြင်းနှင့် အရေးပေါ်အခြေအနေ ကြုံတွေ့နေရသူများအတွက် ရည်ရွယ်သည့် ငွေကြေးထောက်ပံ့မှု (Cash Assistance) များကို အဆိုပါ အကျပ်အတည်းဖြစ်ပွားရာ ဒေသများရှိ လူမှုအသိုက်အဝန်းများထံ တို-က်ရို-က်အရောက် သွားရောက်ပံ့ပိုးပေးမည် ဖြစ်ကြောင်းလည်း ဖော်ပြထားသည်။
မြန်မာနိုင်ငံဆိုင်ရာ UNFPA ဌာနေကိုယ်စားလှယ် ဂျေမီ နာဒယ် ရွိုက် (Jaime Nadal Roig) က “အကျပ်အတည်းဒ-ဏ် ခံစားနေရတဲ့ အမျိုးသမီးတွေနဲ့ မိန်းကလေးငယ်တွေအတွက် ဘေးကင်းပြီး လျှို့ဝှက်ချက်ထိန်းသိမ်းပေးနိုင်တဲ့ ဝန်ဆောင်မှုတွေကို အချိန်မီရရှိခြင်းဟာ အသက်နဲ့သေခြင်းတရားကြားမှာ ကွာခြားသွားနိုင်လောက်အောင် အရေးကြီးပါတယ်။ အခုလို EU ရဲ့ ပံ့ပိုးမှုက ဝန်ဆောင်မှုတွေ အရေးပေါ်လိုအပ်နေတဲ့ လူမှုအသိုက်အဝန်းတွေဆီ ကျန်းမာရေး၊ လုံခြုံရေးနဲ့ ဂုဏ်သိက္ခာတွေကို ကာကွယ်ပေးနိုင်မယ့် ပေါင်းစပ်ဝန်ဆောင်မှုတွေ ပေးအပ်နိုင်ဖို့ လမ်းပွင့်သွားစေပါတယ်” ဟု ပြောကြားထားသည်။
အဆိုပါ စီမံကိန်းလုပ်ငန်းစဉ် အားလုံးကို ဒေသခံအရပ်ဘက် လူမှုအဖွဲ့အစည်းများ၊ အမျိုးသမီးအဖွဲ့အစည်းများ၊ ကျန်းမာရေးကဏ္ဍမှ တာဝန်ရှိသူများနှင့် ပူးပေါင်းကာ ဆိုးကျိုးမဖြစ်စေရမူ (Do No Harm)၊ ကာကွယ်စောင့်ရှောက်ရေးနှင့် ထိခိုက်ခံစားရသူကို ဗဟိုပြုသည့် မူဝါဒများအတိုင်း ဆောင်ရွက်သွားမည်ဖြစ်ကြောင်း၊ အထူးသဖြင့် ဆယ်ကျော်သက်မိန်းကလေးများ၊ ကိုယ်ဝန်ဆောင်မိခင်များ၊ နေရပ်စွန့်ခွာရသူများနှင့် မသန်စွမ်းသူများ၏ ဘေးကင်းလုံခြုံရေးနှင့် လျှို့ဝှက်ချက် ထိန်းသိမ်းမှုကို အလေးထား ဆောင်ရွက်သွားမည်ဖြစ်ကြောင်း သတင်းထုတ်ပြန်ချက်အရ သိရသည်။
Credit – UNFPA