မလေးရှား၏ ဒေါ်လာ ၁၄၇ သန်းတန် ဒုံးကျည်အမှာစာအား ဖျက်သိမ်းရန် နော်ဝေကို အမေရိကန်က ဖိအားပေးခဲ့သည်ဟု သံသယရှိနေ

မလေးရှားနိုင်ငံထံ ရောင်းချထားသည့် ရေတပ်သုံး ဒုံးကျည်စနစ်အတွက် ပို့ကုန်လိုင်စင်များကို နော်ဝေနိုင်ငံက ပြန်လည်ရုပ်သိမ်းလိုက်ခြင်းသည် အချုပ်အခြာအာဏာပိုင် နှစ်နိုင်ငံကြားမှ လက်နက်အရောင်းအဝယ် သဘောတူညီချက်တစ်ခုကို အမေရိကန်ပြည်ထောင်စုအနေဖြင့် မည်မျှအထိ လွှမ်းမိုးဖျက်ဆီးနိုင်ကြောင်း အထင်အရှား မီးမောင်းထိုးပြလိုက်ခြင်း ဖြစ်သည်။

မလေးရှားဝန်ကြီးချုပ် အန်ဝါ အီဘရာဟင်ကလည်း သူ၏ ပြင်းထန်သော ဒေါသကို ဖုံးကွယ်ထားခြင်းမရှိပေ။ ကြာသပတေးနေ့က ပြောကြားရာတွင် သူသည် နော်ဝေဝန်ကြီးချုပ် ယိုနပ်စ် ဂါးရ် စတိုးရ်ထံသို့ ဖုန်းဖြင့်တိုက်ရိုက်ဆက်သွယ်ကာ မလေးရှား၏ “ပြင်းထန်သော ကန့်ကွက်မှု” ကို အသိပေးခဲ့သည်ဟု ဆိုသည်။

“လက်မှတ်ရေးထိုးထားတဲ့ စာချုပ်တွေဆိုတာ လေးနက်တည်ကြည်တဲ့ ကတိကဝတ်တွေပါ။ အခုလို စိတ်အလိုလိုက်ပြီး အစီအစဉ်မရှိ လွင့်ပစ်လိုက်ရမယ့် စက္ကူစုတ်တွေမဟုတ်ဘူး” ဟု အန်ဝါက ပြောကြားခဲ့သည်။ ဥရောပ ကာကွယ်ရေးပစ္စည်း ထောက်ပံ့သူများအနေဖြင့် အကျိုးဆက်တစ်ခုခုကို ခံစားရခြင်းမရှိဘဲ ယခုကဲ့သို့ ကတိဖျက်ပိုင်ခွင့်ရှိသည်ဟု ခံယူထားပါက ၎င်းတို့သည် မဟာဗျူဟာမြောက် မိတ်ဖက်များအဖြစ် မည်သည့်တန်ဖိုးမျှ ရှိတော့မည်မဟုတ်ကြောင်းကိုလည်း သတိပေးခဲ့သည်။

အင်္ဂါနေ့တွင် ကာကွယ်ရေးဝန်ကြီး မိုဟာမက် ခါလစ် နော်ဒင် (Mohamed Khaled Nordin) က ပိုမိုပြတ်သားစွာ ပြောဆိုလာပြီး မလေးရှားအနေဖြင့် ဒေါ်လာ ၂၅၁ သန်းကျော် ကာမိစေမည့် နစ်နာကြေးတောင်းခံမှုကို ဆက်လက်လုပ်ဆောင်သွားမည်ဖြစ်ကြောင်း ကြေညာခဲ့သည်။

ယင်းနစ်နာကြေးတွင် ပေးချေထားပြီးသား ငွေပမာဏများသာမက၊ သင်္ဘောတပ်ဆင်မှုများကို ပြန်လည်ပြင်ဆင်ရခြင်း၊ စစ်ရေယာဉ်အဖွဲ့သားများကို ပြန်လည်လေ့ကျင့်ပေးရခြင်းနှင့် နော်ဝေဒုံးကျည် တပ်ဆင်ရန်အတွက်သာ ကနဦးကတည်းက သီးသန့်ပုံစံထုတ် တည်ဆောက်ထားသည့် စစ်ရေယာဉ်များပေါ်တွင် ဒုံးကျည်စနစ်အသစ်တစ်ခုလုံးကို ပြန်လည်ပေါင်းစပ်ထည့်သွင်းရမည့် နောက်ဆက်တွဲ ကုန်ကျစရိတ်များပါ အကျုံးဝင်မည်ဖြစ်သည်။

ထို့ပြင် သူက ဒေသတွင်းရှိ အခြားနိုင်ငံများကိုလည်း “နော်ဝေနိုင်ငံထုတ်ပစ္စည်းများကို မဝယ်ယူမီ သေချာစဉ်းစားကြရန်” သတိပေးချက်တစ်ခုကိုပါ ထုတ်ပြန်ခဲ့သည်။

အဆိုပါ အရောင်းအဝယ်ကို ပိတ်ပင်ရာတွင် နော်ဝေအာဏာပိုင်များက နေတိုး (Nato) အဖွဲ့ဝင်များနှင့် ၎င်းတို့၏ အနီးကပ်ဆုံး မိတ်ဖက်နိုင်ငံများမှလွဲ၍ အခြားနိုင်ငံများသို့ ထိခိုက်လွယ်သော ကာကွယ်ရေးဆိုင်ရာ ပို့ကုန်များကို ကန့်သတ်မည့် မူဝါဒအသစ်ကြောင့်ဟု အကြောင်းပြခဲ့သည်။

သို့သော်လည်း နော်ဝေအစိုးရ ၏ တရားဝင် အကြောင်းပြချက်နောက်ကွယ်တွင် နော်ဝေ၏ Naval Strike Missile သည် အမေရိကန်အစိတ်အပိုင်းများအပေါ် မှီခိုနေရသည်ဟူသော အချက်ရှိနေကြောင်း ယူအီးအီး (UAE) အခြေစိုက် Rabdan လုံခြုံရေးနှင့် ကာကွယ်ရေးသုတေသနအဖွဲ့မှ သုတေသီ အဗ္ဗဒူ ရာမန် ယာကွတ်က ဆိုသည်။ ၎င်းတို့အနက် ဒုံးကျည်လမ်းညွှန်စနစ်၏ အဓိကအသက်သွေးကြောဖြစ်သော ဂျိုင်ရိုစကုပ်(Gyroscope) သည် အဓိကဖြစ်သည်။

စစ်ရေး-လူမှုရေး နှစ်ဖက်သုံး ထိခိုက်လွယ်နည်းပညာများ (Dual-use technologies) တင်ပို့မှုကို နှစ်ပေါင်းများစွာကတည်းက တင်းကျပ်လာခဲ့သည့် အမေရိကန်သည် အဆိုပါ အစိတ်အပိုင်းများကို မလေးရှားသို့ မပို့ဆောင်ရန် နော်ဝေကို ရှင်းရှင်းလင်းလင်း ပြောကြားခဲ့ပုံရသည်။

မလေးရှားကာကွယ်ရေးဝန်ကြီး၏ ပြောကြားချက်အရ စာချုပ်တန်ဖိုး၏ ၉၅ ရာခိုင်နှုန်း (သို့မဟုတ်) ယူရို ၁၂၆ သန်းခန့်ကို ပေးချေပြီးဖြစ်သော်လည်း၊ ဝါရှင်တန်က အချုပ်အခြာအာဏာပိုင် နှစ်နိုင်ငံကြား လက်နက်ဝယ်ယူရေးသဘောတူညီချက်ကို ကြားဝင်ပိတ်ပင်ခဲ့ခြင်းဖြစ်ပြီး၊ အနောက်အုပ်စုအတ္တလန္တိတ် လုံခြုံရေးမဟာမိတ်အဖွဲ့အတွင်း နက်ရှိုင်းစွာ ပါဝင်နေသည့် နေတိုးအဖွဲ့ဝင် နော်ဝေအနေဖြင့် လိုက်နာရန်မှတစ်ပါး အခြားရွေးချယ်စရာ မရှိခဲ့ဟု ဆိုလိုရာရောက်နေသည်။

ဤဖြစ်ရပ်ကြောင့် အာရှတစ်လွှားရှိ ကာကွယ်ရေးစီမံကိန်း ရေးဆွဲသူများအနေဖြင့် နောင်အနာဂတ်တွင် “အမေရိကန်အစိတ်အပိုင်း အနည်းဆုံးသာ ပါဝင်မည့် လက်နက်စနစ် သို့မဟုတ် စစ်လက်နက်ပစ္စည်းများကိုသာ ရှာဖွေရန်” သေချာပေါက် ပြန်လည်သုံးသပ်ကြရလိမ့်မည်ဟု ရာမန်က သုံးသပ်သည်။

မလေးရှားသည် အဆိုပါဒုံးကျည်များကို မတ်လတွင် လက်ခံရရှိရန် စီစဉ်ထားခဲ့ခြင်းဖြစ်သည်။