လွိုင်ကော်၊ဇူလိုင်-၁၈
ကယားပြည်နယ်အတွင်းရှိ ဖရူဆို၊ ဒီးမော့ဆိုနှင့် ဘော်လခဲမြို့နယ်တို့မှ နေရပ်ပြန်ပြည်သူများအတွက် အခြေခံစားသောက်ကုန်များနှင့် ဆိုလာမီးဆိုင်းများကို နယ်စပ်ရေးရာဝန်ကြီးဌာနနှင့် ကယားပြည်နယ်အစိုးရအဖွဲ့တို့က ထောက်ပံ့ပေးအပ်ခဲ့ကြောင်း သိရသည်။
လွိုင်ကော်မြို့ရှိ ကယားပြည်နယ်ခန်းမ၌ ယမန်နေ့ (ဇူလိုင်၁၇) က ကျင်းပခဲ့ခြင်းလည်းဖြစ်သည်။
ယင်း ထောက်ပံ့ပေးအပ်ပွဲ အခမ်းအနားတွင် နယ်စပ်ရေးရာဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ဖုန်းမြတ်က နယ်မြေတည်ငြိမ်အေးချမ်းမှုရှိမှသာ ဒေသဖွံ့ဖြိုးရေးလုပ်ငန်းများကို ပိုမိုမြှင့်တင်ဆောင်ရွက်ပေးနိုင်မည်ဖြစ်သည့်အတွက် ဒေသခံပြည်သူများအနေဖြင့် နယ်မြေတည်ငြိမ်အေးချမ်းရေးလုပ်ငန်းစဉ်များတွင် ပူးပေါင်းပါဝင်ဆောင်ရွက်ကြရန် တိုက်တွန်းပြောကြားသည်။
ယခုထောက်ပံ့မှုတွင် ဒီးမော့ဆိုမြို့နယ်နှင့် ဘော်လခဲမြို့နယ်အတွင်းရှိ နေရပ်ပြန်ပြည်သူ ၆၁၀ အတွက် ဆန်၊ ဆီ၊ ပဲ၊ ဆား အခြေခံစားသောက်ကုန်များကိုလည်းကောင်း၊ ဖရူဆိုမြို့နယ် မာခရော်ရှေကျေးရွာရှိ အိမ်ထောင်စုများအတွက် ဆိုလာမီးနှင့် ဆက်စပ်ပစ္စည်း ၅၂ စုံကိုလည်းကောင်း လက်ဝယ်အရောက် ထောက်ပံ့ပေးအပ်ခဲ့ခြင်း ဖြစ်သည်။
အခမ်းအနားသို့ ကယားပြည်နယ်ဝန်ကြီးချုပ် ဦးအံ့မော်၊ ဒေသကွပ်ကဲရေးမှူး၊ ပြည်နယ်ဝန်ကြီးများနှင့် တာဝန်ရှိသူများ တက်ရောက်ခဲ့ကြကြောင်း သိရသည်။