နေပြည်တော်တွင် ကိုဗစ်-၁၉ ရောဂါတွေ့ရှိမှုနှုန်းများ လျော့ကျလာ၍ positive စင်တာ နှင့် ကွာရန်တင်းစင်တာများအားလုံးနီးပါးပိတ်သိမ်း
နေပြည်တော် အောက်တိုဘာ ၁၁
နေပြည်တော်ပြည်ထောင်စုနယ်မြေအတွင်း ကိုဗစ်-၁၉ ရောဂါတွေ့ရှိမှုနှုန်းများ လျော့ကျလာနေပြီဖြစ်၍ နေပြည်တော်ရှိ Positive စင်တာနှင့် ကွာရန်တင်းစင်တာများအားလုံးနီးပါးပိတ်သိမ်းထားပြီးဖြစ်ကြောင်း နေပြည်တော်ပြည်သူ့ကျန်းမာရေးဦးစီးဌာနမှ သိရသည်။
နေပြည်တော်တွင် ပြီးခဲ့သည့် ဇွန်လအတွင်း ရက်သတ္တပတ်တစ်ပတ်ချင်းစီတိုင်းတွင် ကိုဗစ်-၁၉ ရောဂါပိုးတွေ့လူနာ အများဆုံး ဦးရေ ၄၀၀ ကျော်ထိရှိခဲ့ပြီး ဇူလိုင်လအတွင်းတွင်လည်း တတိယပတ်တွင် ပိုးတွေ့လူနာဦးရေ ၁၈၀၀ ခန့်ထိတွေ့ရှိခဲ့ရကြောင်း၊ ဩဂုတ်လ ပထမပတ်တွင်လည်း ၁၁၈၇ ဦးထိပိုးတွေ့လူနာရှိခဲ့ပြီး စက်တင်ဘာလ နောက်ဆုံးအပတ်တွင် ပိုးတွေ့လူနာဦးရေမှာ ၂၆၁ ဦးသာ တွေ့ရှိခဲ့ရကြောင်း၊ လက်ရှိတွင် နေပြည်တော်အတွင်းရှိ လူဦးရေတစ်သိန်းတွင် ပိုးတွေ့မှုနှုန်းမှာ ၂၈ ဦးခန့်သာ ပိုးတွေ့နှုန်းရှိခြင်းကြောင့် ပိုးတွေမှုနှုန်း များစွာကျဆင်းမှုရှိကြောင်း၊ ထိုသို့ ပိုးတွေ့မှုန်နှုန်းများစွာကျဆင်းလာ၍ နေပြည်တော်ရှိ ပိုးတွေ့လူနာထားရှိသည့် စင်တာနှင့် ကွာရန်တင်းစင်တာများကို ပိတ်သိမ်းထားပြီး စည်ပင်(၁)နှင့် ရွာတော်ကွာရန်တင်းစင်တာတို့သာ ကျန်တော့ကြောင်း သိရသည်။
” အခုက နေပြည်တော်မှာက ပိုးတွေ့နှုန်းက နေပြည်တော်က လူဦးရေအနေနဲ့ဆို ၀ ဒသမ ၀၂ ရာခိုင်နှုန်း လောက်ပဲရှိပါတော့တယ်။ တော်တော်လေးကျသွားပြီလို့ပြောလို့ရပါတယ်။ ဒါကြောင့် အခုလူနာအခြေအနေအရ အရင်ကတိုးချဲ့ဖွင့်လှစ်ခဲ့တဲ့ positiveစင်တာတွေ၊ ကွာရန်တင်းစင်တာတွေကို ပြန်ရုတ်သိမ်းလိုက်ပြီ။ အခုဆိုရင် စည်ပင် (၁) positive လူနာစင်တာမှာ လူနာ ၃၀ ကျော်ပဲရှိပါတော့တယ်။ စည်ပင်(၁) ကိုလဲ မကြာခင်ပိတ်သိမ်းဖို့ လုပ်နေပါတယ်။ positive လူနာတွေကို ဆေးရုံတွေမှာပဲ ထားဖို့လုပ်နေပါတယ်” ဟု နေပြည်တော်ပြည်သူ့ကျန်းမာရေးဦးစီးဌာနမှ တာဝန်ရှိသူတစ်ဦးက ပြောသည်။
ယခင်က နေပြည်တော်တွင် ပိုးတွေ့လူနာများပြားခြင်းကြောင့် positive စင်တာများနှင့် ကွာရန်တင်းစင်တာများကို တိုးချဲ့ဖွင့်လှစ်ခဲ့ရာ positive လူနာများကို ဆေးရုံများနှင့် မင်္ဂလာဗျူဟာသာသနာ့ဗိမ္မာန် positive စင်တာ၊ လယ်ဝေးရှိ positive စင်တာ၊ စည်ပင် ဧည့်ရိပ်သာ (၁)နှင့် (၂) တို့တွင်ထားခဲ့ရပြီး ကွာရန်တင်းလူနာများကို ဟိုတယ်၊ ရွာတော်ကွာရန်တင်းစင်တာ၊ စည်ပင်ဧည့်ရိပ်သာတို့တွင် ထားခဲ့ရပြီး လက်ရှိတွင် ပိုးတွေ့လူနာတွေ့ရှိမှုကျဆင်းပြီဖြစ်၍ တိုးချဲ့စင်တာများအားလုံးပိတ်သိမ်းပြီးဖြစ်ကာ ကျန်ရှိသည့် စည်ပင် ဧည့်ရိပ်သာ (၁) positive စင်တာကိုလည်း မကြာခင်ပိတ်သိမ်းသွားမည်ဖြစ်ကြောင်း၊ လက်ရှိတွင် စည်ပင် ဧည်ရိပ်သာ(၂) နှင့် ရွာတော်ကွာရန်တင်းစင်တာတို့တွင်သာ စောင့်ကြည့်လူနာများထားရှိထားကြောင်း သိရသည်။
ယခုဖော်ပြထားသောပုံများမှာ ယခင်ပုံများဖြစ်သည်။
