ပြည်တွင်း နိုင်ငံရေးနှင့် အစ္စရေး၏ ဂါဇာစစ်ပွဲ အစီအမံများနှင့် ပတ်သက်၍ လအတန်ကြာ သဘောကွဲလွဲမှုများဖြစ်ပြီးနောက် အစ္စရေးဝန်ကြီးချုပ် နေတန်ယာဟုက ကာကွယ်ရေးဝန်ကြီး ယိုအက်ဗ် ဂဲလန့် ကို ရာထူးမှ ထုတ်ပယ်လိုက်သည်။
အင်္ဂါနေ့က ထုတ်ပြန်ချက်တစ်ခုတွင် နေတန်ယာဟုက “ကျွန်တော်နဲ့ ကာကွယ်ရေးဝန်ကြီးအကြား ယုံကြည်မှု အက်ကြောင်းရှိခဲ့ပါတယ်” ဟု ပြောဆိုကြားခဲ့သည်။
လက်ရှိ နိုင်ငံခြားရေးဝန်ကြီး အစ္စရေးကတ်ဇ်သည် ကာကွယ်ရေးဝန်ကြီးဖြစ်လာမည်ဖြစ်ပြီး ဂစ်ဒီယွန် ဆအားရ် သည် နိုင်ငံခြားရေးဝန်ကြီးအဖြစ် ကတ်ဇ်၏ နေရာကို အစားထိုး ဝင်လာမည်ဖြစ်ကြောင်း ဝန်ကြီးချုပ်ရုံးက အင်္ဂါနေ့တွင် ပြောဆိုသည်။ ကတ်ဇ်သည် စစ်ပွဲကာလတလျှောက်လုံး အစိုးရအဖွဲ့တွင် တာဝန်ထမ်းဆောင်ခဲ့သူဖြစ်သော်လည်း စစ်ရေးအတွေ့အကြုံ ကျယ်ကျယ်ပြန့်ပြန့် မရှိပေ။
အစ္စရေး၏ အရေးပါဆုံး မဟာမိတ်ဖြစ်သော အမေရိကန်ပြည်ထောင်စုတွင် နောက်သမ္မတသစ်အတွက် ပြည်သူများ မဲပေးနေကြချိန်တွင် ယခုအပြောင်းအလဲများ ပေါ်ပေါက်လာခြင်းဖြစ်သည်။ ဂဲလန့် သည် အမေရိကန်အစိုးရအဖွဲ့အတွက် ရင်းနှီးသော ဆွေးနွေးဖက်တစ်ဦးဖြစ်ပြီး အမေရိကန်ကာကွယ်ရေးဝန်ကြီး လွိုက်အော်စတင်နှင့် နေ့စဉ် တိုင်ပင်ဆွေးနွေးနေခဲ့သူဖြစ်သည်။
ဂါဇာကမ်းမြောင်နှင့် လက်ဘနွန်တွင် သွေးထွက်သံယို စစ်ပွဲများ ဆင်နွှဲနေချိန်၊ အီရန်၏ လက်တုန့်ပြန်တိုက်ခိုက်မှုများဖြစ်လာနိုင်ခြေရှိနေချိန် အစ္စရေးအတွက် အရေးပါသော အခိုက်အတန့်ကာလတွင် ယခုကဲ့သို့ အပြောင်းအလဲဖြစ်လာခြင်း ဖြစ်သည်။
ရာထူးထုတ်ပယ်မှု ဆုံးဖြတ်ချက် လူသိရှင်ကြား ထွက်ပေါ်လာပြီး မကြာမီပင် ဂဲလန့် က “အစ္စရေးနိုင်ငံ လုံခြုံရေးသည် အမြဲတမ်း ကျွနု်ပ်၏ တစ်သက်တာဝန်ဖြစ်နေမည်” ဟု X ပေါ်တွင် ရေးသားခဲ့သည်။ သူ့ကို ထုတ်ပယ်လိုက်မှုသည် အစွန်းရောက် အော်သိုဒေါက်စ်များ စစ်မှုထမ်းပြဿနာ၊ ဓ-ါးစာခံများကို ပစ်ပယ်ထားမှုနှင့် အောက်တိုဘာ ၇ ရက်က ဟားမတ်စ်တို့၏ တိုက်ခိုက်မှုအပေါ် တရားဝင် စုံစမ်းစစ်ဆေးရန် လိုအပ်ခြင်းဟူသသော အကြောင်းခြင်းရာ သုံးခုအတွက် သဘောကွဲလွဲမှု ရလဒ်ဖြစ်သည်ဟု ရုပ်သံထုတ်ပြန်ချက်တွင် သူက ပြောဆိုခဲ့သည်။
Ref: စီအင်န်အင်န်