လာအိုနိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ်ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင်နှင့် ဇနီး ဒေါ်ကြူကြူလှတို့သည် ဇူလိုင် ၄ ရက် နေ့လယ်ပိုင်းတွင် ဗီယင်ကျန်းမြို့ရှိ လာအိုနိုင်ငံ၏ အမျိုးသားအထိမ်းအမှတ် အဆောက်အအုံဖြစ်သော Patuxai (Victory Gate) သို့ သွားရောက်လေ့လာခဲ့သည်။
Patuxai သို့ ရောက်ရှိရာတွင် နိုင်ငံတော်သမ္မတနှင့် ဇနီးတို့အား သက်ဆိုင်ရာတာဝန်ရှိသူများက အဆောက်အအုံ၏ သမိုင်းနောက်ခံ၊ တည်ဆောက်ပုံဗိသုကာလက်ရာများနှင့် ယဉ်ကျေးမှုဆိုင်ရာ အရေးပါမှုများကို လိုက်လံရှင်းလင်းပြသခဲ့ပြီး အဆောက်အအုံအတွင်းရှိ အနုပညာလက်ရာများကို လေ့လာကြည့်ရှုခဲ့သည်။
Patuxai (Victory Gate) သည် လာအိုနိုင်ငံ၏ လွတ်လပ်ရေးအတွက် အသက်ပေးစွန့်လွှတ်ခဲ့ကြသူများအား ဂုဏ်ပြုရည်ရွယ်၍ တည်ဆောက်ထားသော အထင်ကရ အမျိုးသားအထိမ်းအမှတ် အဆောက်အအုံဖြစ်ပြီး ဗီယင်ကျန်းမြို့၏ အရေးပါသော အမှတ်အသားတစ်ခုလည်း ဖြစ်သည်။
အဆောက်အအုံကို ၁၉၅၇ ခုနှစ်တွင် စတင်တည်ဆောက်ခဲ့ပြီး ၁၉၆၈ ခုနှစ်တွင် ပြီးစီးခဲ့ကာ ပြင်သစ်နိုင်ငံ၏ Arc de Triomphe ဗိသုကာပုံစံမှ အယူအဆရယူထားသော်လည်း လာအိုရိုးရာ ဗုဒ္ဓဘာသာနှင့် ဟိန္ဒူယဉ်ကျေးမှုဆိုင်ရာ လက်ရာများကို ပေါင်းစပ်ထည့်သွင်းထားသည်။
Patuxai ၏ အတွင်းပိုင်းတွင် နတ်သမီး၊ ကင်းနရီနှင့် ရိုးရာပန်းနွယ်အလှဆင် ပန်းပုလက်ရာများကို မြင်တွေ့နိုင်သလို အပေါ်ဆုံးရှုခင်းကြည့်စင်မှ ဗီယင်ကျန်းမြို့၏ မြင်ကွင်းကျယ်ကို ကြည့်ရှုနိုင်သဖြင့် ပြည်တွင်း၊ ပြည်ပခရီးသွားဧည့်သည်များ အများဆုံးလာရောက်လည်ပတ်သည့် ခရီးသွားဆွဲဆောင်ရာ နေရာတစ်ခုအဖြစ် ထင်ရှားလျက်ရှိသည်။