ဒေါက်တာဇော်မြင့်မောင်အား အဂတိအမှုငါးမှုဖြင့် ထောင်ဒဏ် ၂၁ ချမှတ် အယူခံဆက်တက်မည်
မန္တလေးတိုင်းဒေသကြီးဝန်ကြီးချုပ် ဒေါက်တာဇော်မြင့်မောင်ကို စွဲဆိုထားသော အဂတိ ၅မှုအတွက် ယနေ့တွင် ထောင်ဒဏ်၂၁ နှစ်ချမှတ်လိုက်ကြောင်း တရားရုံးနှင့်နီးစပ်သူအသိုင်းအဝိုင်းများထံကသိရသည်။
ယနေ့တွင် ဒေါက်တာဇော်မြင့်မောင်အား မန္တလေးအိုးဘိုထောင်တွင်းအထူးတရားရုံးက အဆိုပါထောင်ဒဏ်များကိုချမှတ်လိုက်ခြင်းဖြစ်ပြီး၊ ယင်းအပေါ် ဒေါက်တာဇော်မြင့်မောင် က ပြည်ထောင်စုအဆင့်တရားလွှတ်တော်ချုပ်သို့ အယူခံဆက်တက်မည်ဖြစ်ကြောင်းသိရသည်။
” အခုက တိုင်းတရားရုံးအဆင့်ကချမှတ်လိုက်တာဆိုတော့ ပြည်ထောင်စုအဆင့်ကိုတက်မှာပါ။ ဒီနေ့ လိုအပ်တဲ့စာရွက်စာတမ်းတွေမိတ္ထူကူးနေပါပြီ။ သူ့ကျန်းမာရေးကောင်းပါတယ်”ဟု ဆိုသည်။
ယနေ့ထောင်ဒဏ်ချမှတ်မှုတွင် စီးပွားရေးလုပ်ငန်းရှင် ဦးမောင်ဝိတ်နှင့်ပတ်သက်၍စွဲဆိုထားသော ရာကြီးမှုအမှတ် ၆နှင့်၇ အမှုအတွက် ထောင်ဒဏ်ငါးနှစ်စီချမှတ်ခဲ့ပြီး၊ စီးပွားရေးလုပ်ငန်းရှင် ဦးရဲမြင့်နှင့်ပတ်သက်၍ စွဲဆိုထားသော ရာကြီးမှုအမှတ် ၈အတွက် ထောင်ဒဏ်ငါးနှစ်ချမှတ်လိုက်ခြင်းဖြစ်ကြောင်းသိရသည်။
ထို့အပြင် ပြင်ဦးလွင်နှင့်မြင်းခြံမြို့တို့တွင် NLD ရုံးဆောက်လုပ်ရန် မြေနေရာချထားပေးရာ၌ အဂတိလိုက်စာသည်ဟုဆိုကာ စွဲဆိုထားသော ရာကြီးမှုအမှတ် ၉နှင့်၁၀ အမှုတို့အတွက် ထောင်ဒဏ်သုံးနှစ်စီချမှတ်လိုက်ခြင်းဖြစ်သည်။
ထို့ကြောင့် ဒေါက်တာဇော်မြင့်မောင်အနေဖြင့်သဘာဝဘေးပုဒ်မဖြင့် ထောင်ဒဏ် နှစ်နှစ်၊ ရာဇသတ်ကြီး ၅၀၅(ခ)ဖြင့် ထောင်ဒဏ် နှစ်နှစ် ၊ ရွေးကောက်ပွဲ ပုဒ်မ ၁၇၁(စ)ဖြင့် ထောင်ဒဏ် တစ်နှစ်၊ အဂတိအမှု ငါးမှုဖြင့် ထောင်ဒဏ် ၂၁နှစ် စုစုပေါင်းထောင်ဒဏ် ၂၆နှစ်ချမှတ်ခံထားရကြောင်းသိရသည်။