ရန်ကုန်၊ စက်တင်ဘာ ၂
ဒဂုံတက္ကသိုလ်ကျောင်းသူ၊ ကျောင်းသားများနှင့် ခရီးသွားပြည်သူများ သွားလာရေး ပိုမိုအဆင်ပြေချောမွေ့စေရန်အတွက် ရန်ကုန်-တိုးကြောင်ကလေး-ဒဂုံတက္ကသိုလ် ရထားခရီးစဉ်ကို (စက်တင်ဘာလ ၁ ရက်) နေ့မှစ၍ မြန်မာ့မီးရထားက စတင်ပြေးဆွဲပေးနေပြီဖြစ်သည်။
အဆိုပါ ရထားခရီးစဉ်တွင် ဘက်ထရီရထားစက်ခေါင်းနှင့်အတူ ခရီးသည် ၆၂ ဦးစီ လိုက်ပါနိုင်သော ရိုးရိုးတန်းတွဲ ၆ တွဲ ပါဝင်သည်။
ရန်ကုန်မှ ဒဂုံတက္ကသိုလ်သို ပြေးဆွဲမည့် အဆန်ရထားများမှာ ည-၁၊ ည-၃၊ ည-၅၊ ည-၇၊ ည-၉ နှင့် ည-၁၁ တိုဖြစ်ပြီး ဒဂုံတက္ကသိုလ်မှ တိုးကြောင်ကလေးမှတစ်ဆင့် ရန်ကုန်သို ပြေးဆွဲမည့် အစုန်ရထားများမှာ ည-၂၊ ည-၄၊ ည-၆၊ ည-၈၊ ည-၁၀ နှင့် ည-၁၂ တိုဖြစ်သည်။
ဒဂုံတက္ကသိုလ် ကျောင်းသား၊ ကျောင်းသူများ ကျောင်းတက်ချိန်မှာ နံနက် ၈ နာရီဖြစ်သဖြင့် ည-၁ အဆန်ရထားသည် ရန်ကုန်ဘူတာမှ နံနက် ၆ နာရီ ၁၅ မိနစ်တွင် ထွက်ခွာပြီး ဒဂုံတက္ကသိုလ်ဘူတာသို နံနက် ၇ နာရီခွဲတွင် ရောက်ရှိမည် ဖြစ်သည်။
အလားတူ ကျောင်းဆင်းချိန်ဖြစ်သည့် မွန်းလွဲ ၃ နာရီတွင် ဒဂုံတက္ကသိုလ်မှ ပြန်လည်ထွက်ခွာနိုင်ရန် ည-၁၀ အစုန်ရထားသည် ဒဂုံတက္ကသိုလ်ဘူတာမှ မွန်းလွဲ ၃ နာရီ ၁၅ မိနစ်တွင် ထွက်ခွာပြီး ရန်ကုန်ဘူတာသို ညနေ ၄ နာရီ ၃၅ မိနစ်တွင် ရောက်ရှိမည် ဖြစ်သည်။
ခရီးစဉ်အတွင်း ပုဇွန်တောင်၊ မလွှကုန်း၊ နှင်းဆီကုန်း၊ သင်္ဃန်းကျွန်း၊ ငမိုးရိပ်နှင့် တိုးကြောင်ကလေး ဘူတာတို့တွင် ရပ်တန့်ပေးမည်ဖြစ်ပြီး မည်သည့်ဘူတာအထိ စီးနင်းသည်ဖြစ်စေ လက်မှတ်ခ ကျပ် ၅၀၀ မျှသာ ကျသင့်မည်ဖြစ်သည်။
ခရီးသည်နှင့် ကျောင်းသား၊ ကျောင်းသူ စီးနင်းမှု များပြားလာပါက ရထားအကြိမ်ရေ ထပ်မံတိုးမြှင့်ပြေးဆွဲပေးသွားရန်လည်း အစီအစဉ်ရှိကြောင်း သိရသည်။