ထုံးဘို – မြစ်ငယ် တိုးဂိတ် လမ်းပိုင်း ဝဲ၊ ယာ တိုးချဲ့ပြုပြင်ဆောင်ရွက်နေမှုများကြောင့် နံနက်ပိုင်း၊ ညနေပိုင်း လူသွားလူလာများပြားသည့်အချိန်များတွင် သာမကသာမန်အချိန်များတွင်ပါ ယာဉ်ကြောပိတ်ဆို့မှုဖြစ်ပွားလျှက်ရှိသည်။
“အခုက ဒီလမ်းကပဲ အကုန်သုံးကြရတာ၊ အမြန်လမ်းက ဒုဌဝတီတံတားကျိုးထားတော့လမ်းဟောင်းပဲသုံးပြီးမှ ပြန်တက်ကြတာ၊ အဲဒီတော့ ရန်ကုန်သွားမယ့် Highway ကား၊ အိမ်စီးကားအကုန်ဒီလမ်းပဲ၊ အဲဒီတော့ကားတွေက ပိတ်နေတာ”ဟု အဆိုပါ လမ်းပိုင်းကိုအသုံးပြုသွားလာနေသည့် ဒေသခံအမျိုးသားတစ်ဦးက ပေါ်ပြူလာနယူးကို ပြောသည်။
မန္တလေးငလျင်ကြီးကြောင့် အမြန်လမ်းဒုဌဝတီတံတားကျိုးပြီးနောက် ကုန်တင်ကားများ၊ ကားများ အသုံးပြုမှုများပြားမှုကြောင့် လမ်းပိုင်းလည်း ပျက်စီးသွားခဲ့သည့်အတွက် အဆိုပါလမ်းပိုင်းကိုပြုပြင်နေမှုကြောင့် ယာဉ်ကြောများပိတ်ဆို့မှုလည်း ဖြစ်ပေါ်နေခြင်း ဖြစ်သည်။
“တံတားဦးလေဆိပ်သွားမယ့်ခရီးသွားများ တတ်နိုင်သမျှစောထွက်စေချင်ပါတယ်။ တနေ့ကလည်းလေဆိပ်မှာ လေယာဉ်မမှီပဲကျန်ခဲ့တာဆယ်ယောက်ကျော်လောက်ရှိတယ်၊ ဒါတောင် လေယာဉ်ကခဏစောင့်ပေးသေးတယ်”ဟု ဖြစ်စဉ်ကို သိရှိသူအမျိုးသမီးတစ်ဦးကလည်း သူမ၏လူမှုကွန်ရက်တွင် မျှဝေထားသည်။
နောက်ခရီးသွားတစ်ဦးကလည်း “ကျွန်မတို့လည်းလေယာဉ်ပေါ်လူချည်းလိုက်လာရတယ်၊ အထုတ်တွေထားခဲ့ရတယ်၊ Check in counter ပိတ်သွားလို့” ဟု ထပ်ဆင့်မျှဝေထားသည်။
လမ်းပိုင်း ဝဲ၊ ယာ တိုးချဲ့ပြုပြင်ဆောင်ရွက်နေမှုကြောင့် ယာဉ်ကြောပိတ်ဆို့လျှင် အနည်းဆုံးနာရီနှင့်ချီကြာမြင့်မှုကြောင့် ဒေသခံများကလည်း လမ်းပိုင်းပြင်ဆင်မှုကို အမြန်ပြီးစီးစေချင်နေကြသည်။
“ညဘက်တွေလုပ်လို့ရောမရနိုင်ဘူးလားပေါ့၊ ညဘက်ဆိုဘယ်သူမှမထွက်ဘူးလေ၊ အဆိုင်းချပြီးခင်းဒီလမ်းခဏပါပဲ” ဟု မြို့ခံတစ်ဦးက မှတ်ချက်ပေးသည်။
လက်ရှိ၌ ထုံးဘို-မြစ်ငယ် တိုးဂိတ်၏ အရှေ့ဘက်ခြမ်းနှင့်အနောက်ဘက်ခြမ်းတစ်လျှောက်မြို့တော်စည်ပင်နယ် နိမိတ်အစဖြစ်သည့် (ရန်-မန်း) လမ်းမကြီး (၃၉၂ မိုင် ၄ ဖာ လုံ) အထိ စက်ယန္တရားများ အသုံးပြု ၍ အရှေ့ဘက်ခြမ်း၌ (၁၂) ပေခန့် အကျယ် တစ်လမ်းသွားလမ်း၊ အနောက်ဘက်ခြမ်းတွင် စက်ဘီး၊ ဆိုင်ကယ်လမ်း အပါအဝင် လေးလမ်းသွားလမ်း ပြုလုပ်ရန်အတွက် တိုးချဲ့ဖောက်လုပ်ခြင်းကို ဆောင်ရွက်နေခြင်းလည်း ဖြစ်သည်။