ချန်ပီယံလိဂ်ဗိုလ်လုပွဲအကြမ်းဖက်မှုများကြောင့် လူရာနှင့်ချီ၍ အဖမ်းခံရ

စနေနေ့က ပါရီစန့်ယာမန်း (ပီအက်စ်ဂျီ) အသင်း၏ ချန်ပီယံလိဂ်ဗိုလ်လုပွဲအနိုင်ကြောင့် ပါရီတွင် လူထောင်ပေါင်းများစွာ လမ်းများပေါ်ထွက် အောင်ပွဲခံချိန်တွင် ဆူပူအကြမ်းဖက်မှုများဖြစ်ခဲ့ပြီး လူ ၂၈၀ ကျော်ကို ရဲတပ်ဖွဲ့က ဖမ်းဆီးထိန်းသိမ်းခဲ့သည်။

ယမန်နှစ်က ပြိုင်ပွဲတွင်လည်း ပီအက်စ်ဂျီအသင်းအနိုင်ရခဲ့ပြီးနောက် မငြိမ်သက်မှုများဖြစ်ပွားခဲ့ခြင်းကြောင့် ယခုပွဲစဉ်အတွက် ပါရီတွင် ရဲ ၈,၀၀၀ အပါအဝင် ပြင်သစ်နိုင်ငံတစ်ဝန်း၌ ရဲတပ်ဖွဲ့ဝင် ၂၂,၀၀၀ ခန့်ကို ချထားခဲ့သည်။ နှောင့်ယှက်ဖျ-က်ဆီးမှုများကို လျှော့ချရန်အတွက် ပါရီမြို့ရှိ ဓာတ်ရထားလိုင်းများကို ရပ်ဆိုင်ထားကာ မြေအောက်ရထားဘူတာရုံများစွာကို ပိတ်ထားခဲ့ပြီး ဘတ်စ်ကားအသွားအလာများကိုလည်း ရပ်ဆိုင်းထားခဲ့သည်။

ပြင်သစ်ပြည်ထဲရေးဝန်ကြီးဌာန၏ အဆိုအရ တစ်နိုင်ငံလုံးအတိုင်းအတာအားဖြင့် လူ ၄၁၆ ဦးကို ထိန်းသိမ်းခဲ့ပြီး ၎င်းတို့အနက် ပါရီတွင် ထိန်းသိမ်းခံရသူ ၂၈၃ ဦး ပါဝင်သည်။ နောက်ထပ်စုံစမ်းစစ်ဆေးမှုများလုပ်ဆောင်ရန် လူမည်မျှ ဆက်လက်ချုပ်နှောင်ထားသည်ကိုမူ လတ်တလောတွင် မသိရသေးပေ။

ရဲတပ်ဖွဲ့ဝင် ခုနစ်ဦး ဒ-ဏ်ရာရရှိခဲ့ကြောင်းနှင့် ဆူပူမငြိမ်သက်မှုများသည် လုံးဝလက်ခံနိုင်စရာမရှိကြောင်း ပြည်ထဲရေးဝန်ကြီး လောရင့်နူ‌နေးက ပြောကြားခဲ့သည်။

ဖြစ်စဉ်အတွင်း မော်တော်ယာဉ် ခြောက်စီးနှင့် စီးပွားရေးလုပ်ငန်းနှစ်ခု ပျ-က်စီးခဲ့သည်။

ပရိသတ်အုပ်စုတစ်ခုသည် ပါရီမြို့ပတ်လမ်းအနီးအနားရှိ လမ်းမကြီးကိုလည်း ဝင်ရောက်သောင်းကျန်းခဲ့ကြပြီး ယာဉ်ကြောပိတ်ဆို့မှု ခဏတာဖြစ်ခဲ့ကြောင်းနှင့် မီးရှုးမီးပန်းပစ်လွှတ်မှုများလုပ်ခဲ့ကြောင်း အေအက်ဖ်ပီဓာတ်ပုံဆရာတစ်ဦးက ပြောကြားခဲ့သည်။

ဟန်ဂေရီနိုင်ငံ ဘူဒါပက်စ်မြို့တွင် ပင်နယ်တီအဆုံးအဖြတ်ဖြင့် အောင်ပွဲခံနေစဉ် ပရိသတ် ၂၀,၀၀၀ ခန့်သည် ပါရီမြို့၏ အထင်ကရ ရွှမ်ဇေလီဇေ လမ်းမပေါ်တွင် စုဝေးခဲ့ကြသည်ဟု ရဲတပ်ဖွဲ့က ပြောကြားခဲ့သည်။

Ref: ထိုင်းပီဘီအက်စ်ဝေါလ်