ထိုင်းဝန်ကြီးချုပ် အနုတင် ဂျပန်၊ အမေရိကန်နှင့် ဗြိတိန်နိုင်ငံများသို့ တစ်ပတ်ကြာခရီးစဉ် သွားရောက်မည်

ဘန်ကောက်၊ စက်တင်ဘာ ၁၉

ထိုင်းဝန်ကြီးချုပ် အနုတင် ချန်ဗီရာကူလ်သည် ဂျပန်၊ အမေရိကန်နှင့် ဗြိတိန်နိုင်ငံများသို့ စက်တင်ဘာ ၂၀ ရက်မှ ၂၇ ရက်အထိ တစ်ပတ်ကြာ ခရီးစဉ်သွားရောက်မည်ဖြစ်ပြီး နယူးယောက်မြို့၌ ကျင်းပမည့် ၈၁ ကြိမ်မြောက် ကုလသမဂ္ဂအထွေထွေညီလာခံ (UNGA 81) သို့လည်း ပါဝင်တက်ရောက်မည်ဖြစ်ကြောင်း သိရသည်။

ဝန်ကြီးချုပ် အနုတင်သည် ခရီးစဉ်ပထမအဆင့်အဖြစ် ဂျပန်နိုင်ငံသို့ သွားရောက်မည်ဖြစ်ပြီး နာဂိုယာမြို့၌ အာရှအားကစားပြိုင်ပွဲဝင် ထိုင်းအားကစားသမားများနှင့် တွေ့ဆုံကာ အားပေးစကားပြောကြားရန် စီစဉ်ထားသည်။

ထို့နောက် အမေရိကန်နိုင်ငံ နယူးယောက်မြို့သို့ ဆက်လက်သွားရောက်ကာ စက်တင်ဘာ ၂၄ ရက်တွင် ကုလသမဂ္ဂအထွေထွေညီလာခံ၌ မိန့်ခွန်းပြောကြားရန် စီစဉ်ထားသည်။ ခရီးစဉ်အတွင်း နိုင်ငံအသီးသီးမှ ခေါင်းဆောင်များ၊ အဆင့်မြင့်ကိုယ်စားလှယ်များနှင့် ကုလသမဂ္ဂအတွင်းရေးမှူးချုပ် အန်တိုနီယို ဂူတာရက်စ်တို့နှင့်လည်း တွေ့ဆုံရန် စီစဉ်ထားကြောင်း သိရသည်။

ကုလသမဂ္ဂအထွေထွေညီလာခံ၌ ပြောကြားမည့် မိန့်ခွန်းတွင် နိုင်ငံတကာဥပဒေကို လေးစားလိုက်နာရေးနှင့် နိုင်ငံများ၏ အချုပ်အခြာအာဏာနှင့် နယ်မြေပိုင်ဆိုင်မှုကို လေးစားရေးတို့ကို အဓိကထား ပြောကြားရန်ရှိကြောင်း ထိုင်းနိုင်ငံခြားရေးဝန်ကြီးဌာနနှင့် နီးစပ်သည့် သတင်းရင်းမြစ်များကို ကိုးကား၍ Thai PBS World က ဖော်ပြသည်။

အဆိုပါအကြောင်းအရာများသည် လက်ရှိ ထိုင်း-ကမ္ဘောဒီးယား နယ်စပ်အခြေအနေနှင့်လည်း ဆက်စပ်မှုရှိကြောင်း သတင်းတွင် ဖော်ပြထားသည်။

ခရီးစဉ်၏ နောက်ဆုံးအဆင့်အဖြစ် ဝန်ကြီးချုပ် အနုတင်သည် ဗြိတိန်နိုင်ငံ လန်ဒန်မြို့သို့ သွားရောက်ကာ အဖွဲ့အစည်းဆိုင်ရာ ရင်းနှီးမြှုပ်နှံသူများနှင့် တွေ့ဆုံ၍ ထိုင်းနိုင်ငံ၏ စီးပွားရေးအလားအလာနှင့် ရင်းနှီးမြှုပ်နှံမှုအခွင့်အလမ်းများကို ရှင်းလင်းတင်ပြသွားမည်ဖြစ်သည်။

ထို့ပြင် နှစ်နိုင်ငံအကြား ကုန်သွယ်ရေးနှင့် ရင်းနှီးမြှုပ်နှံမှု ပူးပေါင်းဆောင်ရွက်ရေး မြှင့်တင်နိုင်ရန် Virgin Atlantic နှင့် Rolls-Royce အပါအဝင် ဗြိတိန်စီးပွားရေးလုပ်ငန်းများမှ တာဝန်ရှိသူများနှင့်လည်း တွေ့ဆုံရန် စီစဉ်ထားကြောင်း သိရသည်။

Ref: Thai PBS World / UN