ထိုင်းမွေးမြူရေးထွက်ကုန်တင်သွင်းမှုကို ကမ္ဘောဒီးယားနှင့် လာအိုပိတ်ပင်

ဒေါင့်သန်းရောဂါ ဖြစ်ပွားမှုကို ကာကွယ်ရန်အတွက် ထိုင်းနိုင်ငံမှ မွေးမြူရေးတိရိစ္ဆာန်နှင့် တိရိစ္ဆာန်ထွက်ကုန် တင်သွင်းမှုများကို ကမ္ဘောဒီးယားနှင့် လာအိုနိုင်ငံတို့က ယာယီပိတ်ပင်လိုက်ကြောင်း သိရသည်။

ကမ္ဘောဒီးယား စိုက်ပျိုးရေး၊ သစ်တောနှင့် ငါးလုပ်ငန်း ဝန်ကြီးဌာနက ယင်းကဲ့သို့ ပိတ်ပင်လိုက်ခြင်းဖြစ်ကြောင်းနှင့် ထိုင်းနိုင်ငံရှိဒေါင့်သန်းရောဂါဖြစ်ပွားနေသည့် ဒေသများကို အနီးကပ်စောင့်ကြည့်နေကြောင်း ရှင်းဟွာသတင်းတွင် ဖော်ပြခဲ့သည်။

“လောလောဆယ်တွင် ကမ္ဘောဒီးယား၌ ရောဂါဖြစ်ပွားမှု မရှိသေးသော်လည်း ကြိုတင်ကာကွယ်မှုအနေဖြင့် ထိုင်းနယ်စပ်အားလုံးမှ မွေးမြူရေးတရိစ္ဆာန်နှင့် ဆက်စပ်တိရိစ္ဆာန်ထွက်ကုန် တင်သွင်းမှုကို ဝန်ကြီးဌာနက ယာယီပိတ်ပင်ထားသည်” ဟု သတင်းကဆိုသည်။

တားမြစ်ချက်ကို လိုက်နာဆောင်ရွက်ရန်အတွက် အာဏာပိုင်များသည် နယ်စပ်ဒေသများရှိ အစိုးရဌာနများနှင့် အနီးကပ်ပူးပေါင်းဆောင်ရွက်ခဲ့သည်ဟု ဆက်လက်ဖော်ပြခဲ့ပြီး တားမြစ်ချက်သည် အချိန်မည်မျှကြာမည်ကို ဖော်ပြခဲ့ခြင်းမရှိပေ။

တစ်ချိန်တည်းမှာပင် လာအိုနိုင်ငံသည်လည်း နိုင်ငံအတွင်း ဒေါင့်သန်းရောဂါဖြစ်ပွားလာနိုင်မှု အန္တရာယ်လျော့ပါးစေရန်အတွက် ထိုင်းနိုင်ငံမှ နွားသား၊ ကျွဲသား၊ ဆိတ်သား နှင့် သိုးသား တင်သွင်းမှုများကို မေလ ၅ ရက်နေ့မှစ၍ ပိတ်ပင်လိုက်ကြောင်း သိရသည်။

ထိုင်းနိုင်ငံတွင် ရောဂါပိုးနှင့် ထိတွေ့မှုရှိခဲ့ခြင်းကြောင့် ရောဂါကူးစက်နိုင်ခြေရှိသူ ၆၃၆ ဦးစလုံးကို ၇ ရက်တာ စောင့်ကြည့်မှု ပြီးဆုံးခဲ့ပြီဖြစ်ကြောင်း Mukdahan ပြည်နယ်ပြည်သူ့ကျန်းမာရေးရုံး အကြီးအကဲ ဒေါက်တာ Narong Chankaew က ဗုဒ္ဓဟူးနေ့တွင် ပြောကြားခဲ့သည်။

၎င်းတို့အားလုံးသည် စောင့်ကြည့်ကာလအတွင်း ရောဂါကာကွယ်ဆေးများအသုံးပြုပြီးဖြစ်ကြောင်းနှင့် လက်ရှိတွင် ၎င်းတို့သည် ပုံမှန်လုပ်ငန်းဆောင်တာများကို ဆောင်ရွက်နိုင်ပြီဖြစ်ကြောင်း ဒေါက်တာ Narong က ပြောသည်။

အဆိုပါရောဂါဖြစ်ပွားမှုကြောင့် ထိုင်းနိုင်ငံတွင် လူတစ်ဦး ‌ေ-သဆုံးခဲ့ကာ လေးဦးဆေးရုံတင်ထားရပြီး ယင်းဖြစ်စဉ်ကြောင့် လူအများသည် အမဲသားစားရန် ကြောက်နေကြဆဲဖြစ်သည်ဟု ၎င်းကပြောကြားခဲ့သည်။

Ref: ဘန်ကောက်ပို့စ်