ဆိုးလ်၊ မေလ ၁၈ ရက်
တောင်ကိုရီးယားသမ္မတ လီဂျေမျောင်း၏ လူထုထောက်ခံမှုနှုန်းသည် ပြီးခဲ့သည့်ရက်သတ္တပတ်က ယခင်အပတ်ထက် ၁.၁ ရာခိုင်နှုန်း လျော့နည်းသွားပြီး ၇၂.၅ ရာခိုင်နှုန်းသို့ ကျဆင်းသွားကြောင်း တနင်္လာနေ့တွင် ထုတ်ပြန်သည့် အပတ်စဉ် လူထုသဘောထားစစ်တမ်းတစ်ခုအရ သိရသည်။
ဒေသတွင်း စစ်တမ်းကောက်ယူရေးအဖွဲ့တစ်ခုဖြစ်သည့် Flower Research ၏ ကွန်ပျူတာအကူအညီသုံး တယ်လီဖုန်းလူတွေ့မေးမြန်းမှု (CATI) စနစ်ဖြင့် ကောက်ယူချက်အရ သမ္မတ လီ၏ နိုင်ငံစီမံခန့်ခွဲမှုကို မလိုလားသည့် အဆိုးမြင်သုံးသပ်မှု သည် ၁.၄ ရာခိုင်နှုန်း တိုးလာပြီး ၂.၅ ရာခိုင်နှုန်း ရှိလာကြောင်း သိရသည်။
အာဏာရ လစ်ဘရယ် ဒီမိုကရက်တစ်ပါတီအပေါ် ထောက်ခံမှုနှုန်းသည် ၃.၀ ရာခိုင်နှုန်း လျော့ကျကာ ၅၂.၉ ရာခိုင်နှုန်း ရှိခဲ့ပြီး အတိုက်အခံ ကွန်ဆာဗေးတစ် ပြည်သူ့အင်အားပါတီ၏ ထောက်ခံမှုနှုန်းမှာမူ ၃.၄ ရာခိုင်နှုန်း မြင့်တက်လာပြီး ၂၇.၉ ရာခိုင်နှုန်း ရှိခဲ့သည်။
လက်ဝဲယိမ်း အသေးစားပါတီတစ်ခုဖြစ်သည့် Rebuilding Korea Party နှင့် လက်ယာယိမ်း အသေးစားပါတီတစ်ခုဖြစ်သည့် New Reform Party တို့၏ ပြီးခဲ့သည့်အပတ် ထောက်ခံမှုနှုန်းမှာ ၂.၀ ရာခိုင်နှုန်းနှင့် ၂.၆ ရာခိုင်နှုန်း အသီးသီး ရှိခဲ့ကြသည်။
အဆိုပါစစ်တမ်းကောက်ယူရေးအဖွဲ့၏ အလိုအလျောက်တုံ့ပြန်မှုစနစ် (ARS) ဖြင့် သီးခြားကောက်ယူခဲ့သော စစ်တမ်းတွင်မူ သမ္မတ လီ၏ လူထုထောက်ခံမှုနှုန်းမှာ ၆၆.၃ ရာခိုင်နှုန်းရှိပြီး အဆိုးမြင်သုံးသပ်မှုမှာ ၃၁.၃ ရာခိုင်နှုန်းအထိ ရှိနေကြောင်း ဖော်ပြထားသည်။
ယင်း CATI နှင့် ARS စစ်တမ်းများကို သောကြာနေ့မှ စနေနေ့အထိ မဲဆန္ဒရှင် ၁,၀၀၁ ဦးနှင့် ၁,၀၀၂ ဦးတို့ကို အသီးသီး ကောက်ယူခဲ့ခြင်း ဖြစ်သည်။ အဆိုပါစစ်တမ်းများသည် ယုံကြည်စိတ်ချရမှုအဆင့် ၉၅ ရာခိုင်နှုန်းရှိပြီး မှားယွင်းနိုင်ခြေ အနိမ့်အမြင့်အတိုင်းအတာ အပေါင်းအနုတ် ၃.၁ ရာခိုင်နှုန်း ရှိကြောင်း သိရသည်။
Ref: ဆင်ဟွာ