ရုရှားသမ္မတ ဗလာဒီမီယာ ပူတင်ဟာ တနင်္လာနေ့တုန်းက တရုတ်သမ္မတ ရှီကျင့်ဖိန်၊ အိန္ဒိယဝန်ကြီးချုပ် နာရင်ဒရာ မိုဒီတို့နဲ့ တွေ့ဆုံဆွေးနွေးခဲ့ပါတယ်။
ပူတင်က ရုရှားနဲ့ တရုတ်ကြား ဗီဇာကင်းလွတ်ခွင့် စနစ်ကို အပြီးအပိုင် အတည်ပြုပေးဖို့ အဆိုပြုခဲ့ပါတယ်။
ရုရှားခေါင်းဆောင်နဲ့ တွေ့ဆုံချိန်မှာ မိုဒီက ယူကရိန်း ငြိမ်းချမ်းရေးနဲ့ အခြားကိစ္စရပ် အတော်များများကို ဆွေးနွေးဖို့ အကြံပြုခဲ့သလို ယူကရိန်း ငြိမ်းချမ်းရေး ကြိုးပမ်းမှု အားလုံးကို အိန္ဒိယအနေနဲ့ ဆက်လက် ထောက်ခံသွားမယ်လို့လည်း ပြောခဲ့ပါတယ်။
ပေကျင်းဘက်က သင့်တော်တယ်လို့ ယူဆရင် နှစ်နိုင်ငံကြား ဗီဇာကင်းလွတ်ခွင့် စနစ်ကို အပြီးအပိုင် ဖြစ်လာစေဖို့ ရုရှားဘက်က တရုတ်နဲ့အတူ လက်တွဲလုပ်ဆောင်ဖို့ အသင့်ရှိနေပါတယ်။ “တရုတ်ဘက်က ဒါဟာ ဖြစ်နိုင်တယ်၊ အကျိုးရှိတယ်လို့ ယူဆရင် ဗီဇာကင်းလွတ်ခွင့် စနစ်ကို ကန့်သတ်ချက်မရှိ သက်တမ်းတိုးသွားဖို့ ကျွန်တော်တို့ ပူးပေါင်းဆောင်ရွက်ဖို့ အသင့်ပါပဲ” လို့ ပူတင်က ပြောခဲ့ပါတယ်။
ဒါ့အပြင် ဗီဇာကင်းလွတ်ခွင့် စနစ်ကြောင့် ယခုနှစ် ပထမနှစ်ဝက်အတွင်း နှစ်နိုင်ငံကြား ကမ္ဘာလှည့်ခရီးသွား ဝင်ရောက်မှု ၄၃ ရာခိုင်နှုန်းထိ တိုးတက်လာခဲ့တယ်လို့လည်း ပူတင်က ထောက်ပြပြောဆိုခဲ့ပါတယ်။
မိုဒီက ပူတင်နဲ့ တွေ့ဆုံစဉ် အခြားကိစ္စတွေအပြင် ယူကရိန်းပဋိပက္ခ ငြိမ်းချမ်းစွာ ဖြေရှင်းရေးကိုပါ ဆွေးနွေးဖို့ အဆိုပြုခဲ့ပါတယ်။ ယူကရိန်း အခြေအနေကို ငြိမ်းချမ်းစွာ ဖြေရှင်းဖို့ ကြိုးပမ်းမှုမှန်သမျှကို အိန္ဒိယက ထောက်ခံသလို ရှေ့လျှောက်လည်း ဆက်လက်ထောက်ခံသွားမယ်လို့ မိုဒီက ပြောခဲ့ပါတယ်။ “ဒီကိစ္စမှာ ငြိမ်းချမ်းတဲ့ ကြိုးပမ်းမှုမှန်သမျှကို အိန္ဒိယက ထောက်ခံတယ်ဆိုတာ ခင်ဗျား သိပြီးသားပါ။ နောင်မှာလည်း ကျွန်တော်တို့ ဆက်ပြီး ထောက်ခံသွားမှာပါ” လို့သူကပြောတာပါ။
ယူကရိန်းမှာ တိုက်ပွဲတွေ ရပ်တန့်သွားဖို့က အလွန်အရေးကြီးတယ်လို့ မိုဒီက ယူဆထားပါတယ်။
အိန္ဒိယဟာ ပြဿနာအားလုံးကို ငြိမ်းချမ်းသော နည်းလမ်းနဲ့ ဖြေရှင်းရေးကိုလည်း လိုလားပြီး “ဒါဟာ လူသားအားလုံး လိုလားတောင်းဆိုနေတာဖြစ်သလို အိန္ဒိယရဲ့ သဝဏ်လွှာလည်း ဖြစ်ပါတယ်” လို့ မိုဒီက ပြောပါတယ်။
ရုရှားအနေနဲ့လည်း ယူကရိန်းပဋိပက္ခ အဆုံးသတ်ရေးအတွက် ကြိုးပမ်းနေပါတယ်လို့ ပူတင်က ပြောခဲ့ပြီး “ကျွန်တော်တို့ ဒီလမ်းကြောင်းအတိုင်း လျှောက်လှမ်းနေပါတယ်” လို့ ဆိုပါတယ်။
မိုဒီရဲ့ “ကိုယ်တိုင်ကိုယ်ကျ အလေးထားမှု” ကြောင့် ရုရှား-အိန္ဒိယ ဆက်ဆံရေး ပိုမိုခိုင်မာလာတာဖြစ်တယ်လို့ ပူတင်က ထောက်ပြခဲ့ပါတယ်။ “အထူးအခွင့်အရေးရ သေနင်္ဂဗျူဟာမြောက် မဟာမိတ်ဆက်ဆံရေး အခြေခံမူတွေပေါ်မှာ ရုရှား-အိန္ဒိယ ဆက်ဆံရေး ဆက်လက်ခိုင်မာနေတာကို ဝမ်းမြောက်စွာနဲ့ ပြောချင်ပါတယ်။ ရုရှား-အိန္ဒိယ ဆက်ဆံရေး တိုးတက်ဖို့ ခင်ဗျား ကိုယ်တိုင်ကိုယ်ကျ အလေးထား ဆောင်ရွက်ပေးတာရော၊ ကျွန်တော်တို့ကြားမှာ စီးပွားရေး ဆက်ဆံရေးတင်မကဘဲ အင်မတန် နွေးထွေးတဲ့ ကိုယ်ရေးကိုယ်တာ ရင်းနှီးချစ်ကြည်မှုတွေ ရှိနေတာကြောင့်ပါ ဒါတွေ ဖြစ်လာရတာပါ”လို့ ပူတင်ကပြောတာပါ။
ရုရှားနဲ့ တရုတ်ကြား ပူးပေါင်းဆောင်ရွက်မှုဟာလဲ “စီးပွားရေး ကဏ္ဍအပါအဝင် နယ်ပယ်ပေါင်းစုံမှာ” တိုးတက်နေတယ်လို့ ပူတင်က ထောက်ပြခဲ့ပါတယ်။ “ကျွန်တော်တို့ဟာ စွမ်းအင်၊ စက်မှုလုပ်ငန်း၊ အာကာသ၊ သယ်ယူပို့ဆောင်ရေးနဲ့ ထောက်ပံ့ပို့ဆောင်ရေး ကဏ္ဍတွေမှာ အဓိက စီမံကိန်းကြီးတွေကို အကောင်အထည်ဖော်နေကြပါတယ်”လို့ သူကဆိုပါတယ်။
ကမ္ဘာ့ဇာတ်ခုံပေါ်မှာ မရေရာမှုတွေ တိုးပွားလာနေပေမဲ့ ငြိမ်းချမ်းရေးနဲ့ ဖွံ့ဖြိုးတိုးတက်ရေးအတွက် ဘုံဆန္ဒကတော့ ပြောင်းလဲမှုမရှိဘဲ ဆက်ရှိနေတယ်လို့ ရှီကျင့်ဖိန်က ပြောခဲ့ပါတယ်။ လွန်ခဲ့တဲ့ နှစ်ပေါင်းတစ်ရာအတွင်း မကြုံစဖူး မြန်ဆန်တဲ့ အပြောင်းအလဲတွေကြား မရေရာမှုတွေ၊ ခန့်မှန်းရခက်တာတွေ သိသိသာသာ တိုးပွားလာနေပေမဲ့ ကမ္ဘာ့နိုင်ငံအသီးသီးက ပြည်သူတွေရဲ့ ငြိမ်းချမ်းရေး၊ ဖွံ့ဖြိုးတိုးတက်ရေး၊ ပူးပေါင်းဆောင်ရွက်ရေးနဲ့ အပြန်အလှန် အကျိုးရှိရေး လိုလားချက်တွေကတော့ မပြောင်းလဲဘဲ ရှိနေဆဲပါ။ “နှစ်ဖက်လုံးရဲ့ ပူးပေါင်းကြိုးပမ်းမှုတွေကြောင့်” တရုတ်နဲ့ ရုရှား ဆက်ဆံရေး တိုးတက်မှု အခြေခံအုတ်မြစ်ဟာ “ပိုလို့တောင် ခိုင်မာလာမှာဖြစ်ပါတယ်” လို့ ရှီက ဆိုခဲ့ပါတယ်။