ရဲကော်မရှင်နာ ဂျက်စီကာ တစ်ချ် (Jessica Tisch) က ရဲတပ်ဖွဲ့ဝင်တွေဟာ အဲဒီအမျိုးသမီးကို လက်နက်ချဖို့ လေးမိနစ်ကြာ အကြောင်းပြ ဖြောင်းဖြခဲ့ပေမဲ့ သူမက ရဲတွေကို “ငါ ဘာမှ မချပေးနိုင်ဘူး။ မင်းတို့ နှစ်ယောက်လုံးကို သ-တ်ပ-စ်လိုက်ရတာကမှ ပိုကောင်းဦးမယ်” လို့ ပြန်ပြောခဲ့တယ်လို့ ဆိုပါတယ်။
ဒီရုန်းရင်းဆန်ခတ်မှုဟာ မွန်းလွဲ ၄ နာရီ ၃၀ မိနစ် မတိုင်မီလေးမှာ စတင်ဖြစ်ပွားခဲ့တာပါ။ မစ္စတစ်ချ်ရဲ့ ပြောကြားချက်အရ အသက် ၄၉ နှစ်အရွယ် ပမဲလား ဆစ်စနဲရော့စ်(Pamela Cisneros) ဆိုသူ အမျိုးသမီးဟာ ဇနီးဖြစ်သူနဲ့အတူ မြေအောက်ရထားပေါ်ကဆင်းလာတဲ့ အသက် ၆၈ နှစ်အရွယ် အမျိုးသားဆီကို လမ်းလျှောက်သွားခဲ့တာပါ။ အဲဒီဇနီးမောင်နှံဟာ ၄၁ မြောက်လမ်း အနောက်ဘက်နဲ့ ၇ မြောက် အေဗင်နူး (West 41st Street and Seventh Avenue) ထောင့်မှာ လမ်းကူးဖို့ စောင့်နေစဉ်မှာပဲ မစ္စဆစ်စနဲရော့စ်ဟာ သူ့ရဲ့ ရာဘာအိတ်နီထဲကနေ ဓားတွေကို ထုတ်ပြီး အဲဒီအမျိုးသားရဲ့ ဝမ်းဗိုက်ဘေးဘက်ကို ထိုးလိုက်ကာ ၄၂ မြောက်လမ်းဘက်ကို ဦးတည် ထွက်ခွာသွားခဲ့တယ်လို့ မစ္စတစ်ချ်က ပြောပါတယ်။
အသ-က်ဆုံးရှုံးခဲ့ရတဲ့ ထိုးခုတ်မှုဟာ အဲဒီနောက် စက္ကန့် ၂၀ တောင် မပြည့်ခင်မှာ ဖြစ်ပွားခဲ့တာလို့ ရဲတပ်ဖွဲ့က ပြောပါတယ်။ နေကာမျက်မှန်နဲ့ ဘေ့စ်ဘောဦးထုပ်တွေ ရောင်းချတဲ့ အလီယူ ဒီယေး (Aliou Dieye) ကလဲ တိုက်ခိုက်သူဟာ ဓားတစ်ချောင်းကို ကိုင်ပြီး အခြားအမျိုးသမီးတစ်ဦးဆီ သူ့ဆိုင်ရှေ့တည့်တည့်မှာတင် တိုးကပ်သွားတာကို တွေ့လိုက်ရတယ်လို့ ပြောပါတယ်။
”သူမ ဘာမှ မပြောဘူး” လို့ အသက် ၆၂ နှစ်အရွယ် မစ္စတာဒီယေးက ပြောပါတယ်။ “သူမက အဲဒီအမျိုးသမီးဆီ လမ်းလျှောက်သွားပြီး ဗိုက်ကို ဓားနဲ့ ထိုးလိုက်တာပဲ။”
ဓားထိုးခံရသူဟာ ပလက်ဖောင်းပေါ် လဲကျသွားခဲ့ကြောင်း၊ ဓားထိုးသူ မြောက်ဘက်ကို ဦးတည်ထွက်ခွာသွားချိန်မှာပဲ သူနဲ့ သူ့သူငယ်ချင်းက 911 ကို ဖုန်းဆက် အကြောင်းကြားခဲ့တာဖြစ်ကြောင်း မစ္စတာဒီယေးက ပြောပါတယ်။ မစ္စတစ်ချ်က အဆိုပါ ဓားထိုးမှုကို “အဓိပ္ပာယ်မရှိတဲ့ တို-က်ခိုက်မှု” လို့ ခေါ်ဆိုခဲ့ပြီး အသက် ၃၂ နှစ်အရွယ် အမျိုးသမီးဟာ ဆေးရုံအရောက်မှာ ေ-သဆုံးသွားကြောင်း အတည်ပြုခဲ့တယ်လို့ ဆိုပါတယ်။ အသက် ၆၈ နှစ်အရွယ် အမျိုးသားကတော့ စိုးရိမ်စရာမရှိတဲ့ အခြေအနေမှာ ရှိနေတယ်လို့ မစ္စတစ်ချ်က ပြောပါတယ်။ စိစစ်ချက်အရ ထိခိုက်ခံရသူ နှစ်ဦးလုံးရဲ့ အမည်များကိုတော့ သတင်းထုတ်ပြန်ထားခြင်း မရှိသေးပါဘူး။